Опубликовано Общество - вс, 09/01/2019 - 09:42

Акафист святому блаженному Макарию, Христа ради юродивому, Новопсковскому и Марковскому чудотворцу.

 

Кондак 1

Возбранный чудотворче и предивный угодниче Христов, верным людем скорую помощь неоскудно подаваяй и от бед и скорбей пречудно избавляяй, восхваляем тя, блаженне отче Макарие: ты же, яко имеяй велие дерзновение ко Господу, от враг видимых и невидимых нас избави да с любовию зовем ти: Радуйся, Макарие, скорый помощниче и предивный чудотворче.

Икос 1

Ангельскою ревностию по Бозе Вседержителе в житии своем пламенеюще, Макарие блаженне, отступников от веры Православныя и хулителей канонов церковных небоязненно обличил еси, подвизающе сим верныя глаголати ти сице:
Радуйся, благочестиваго корене отрасле;
радуйся, дивное прозябение праведности;
Радуйся, наследниче родительских добродетелей;
радуйся, вместилище любви Христовой;
Радуйся, богоизбранный сосуде Духа Святаго.
радуйся, богозданный храме Божества.
Радуйся, проповедниче истины;
радуйся, ревнителю правды;
Радуйся, чистоты рачителю;
радуйся, источниче благодати;
Радуйся, копие, имже беси поражаются;
радуйся, мечу, имже козни демонския посецаются;
Радуйся, Макарие, скорый помощниче и предивный чудотворче.

Кондак 2

Видяще суетность мирскаго жития, отче преблаженне, издетска богоудное житие всем сердцем возлюбил еси, вышния мудрости рачитель изрядный показався. Господу же усердно тепле моляся, воспевал еси: Аллилуиа.

Икос 2

Разум просвещен от Господа имуще, житие свое, яко некую жертву благоуханную Творцу своему принести потщался еси, угодниче Христов Макарие. Сие твое благое произволение похваляюще, сице вопием:
Радуйся, шипок,благоухаяй богоугодным житием;
радуйся, грозде многоплодная лозы Христовой;
Радуйся, отроческаго благочестия правило;
радуйся, юношеския чистоты зерцало;
Радуйся, христианского супружества образе;
радуйся, плотския страсти побеждение;
Радуйся, путем заповедей Христовых ходяй;
радуйся, словесы божественными питайся;
Радуйся, в мире живый, умом в горних почиваяй;
радуйся , в посте и молитве непоколебимо пребываяй;
Радуйся, ума просвещение стяжавый;
радуйся, чистоты сердечныя достигнувый;
Радуйся, Макарие, скорый помощниче и предивный чудотворче.

Кондак 3

Силою благодати Божией осенененный, яко добрый воин Христов, на брань со духи злобы поднебесныя подвигнулся еси, пламенем молитвы своея бесы попаляюще, крестным знамением козни их, яко паучину разрушающе, да прославляется тебе ради имя Божие песнию: Аллилуиа.

Икос 3

Имеяше себе, яко звезду путеводящую, блаженную Параскеву Старобельскую, ея благословением укрепленный, путем юродства Христа ради потекл еси, вышнюю мудрость от Господа стяжевающе. Преемником же старцев богомудрых явившися, ныне купно с ними на небесех пребываеши, от нас же слышиши сия:
Радуйся, преподобныя Параскевы чадо духовное;
радуйся, преподобныя Фаины чтителю благоговейный;
Радуйся, юродству блаженного Емелиана последователю:
радуйся, добродетели старца Иосифа стяжавый;
Радуйся, горнилом скорбей, яко злато очищенный;
радуйся, мнимый безумием премирную мудрость явивый;
Радуйся, руно, орошенное благодатию;
радуйся, кадило, облагоуханное молитвою;
Радуйся, свеще любовию ко Христу и людем пламенеющая;
радуйся, звездо святостию блистающая;
Радуйся, древним подвижником равный;
радуйся, воине Христов непобедимый;
Радуйся, Макарие, скорый помощниче и предивный чудотворче.

Кондак 4

Бурю безбожия в земли своей зряще, ревностию по славе Божией возгорелся еси, грозными прореченьми беззаконных устрашающе, силою Христовою их дерзость низлагающе, да посрамятся на веки уста, не глаголющии Творцу Своему: Аллилуиа.

Икос 4

Слышаще о твоих, угодниче Божий, подвизех и чудесех преславных, ихже благодатию Божией совершил еси, умиляемся сердцем и вопием ти:
Радуйся, орле земный над прелестьми греховными возвысивыйся;
радуйся, агнче Христов, терпением своим злобу мира сего поправый:
Радуйся, адаманте веры Православныя;
радуйся, благоухание праведности;
Радуйся, воздержания столпе;
радуйся, чистоты сияние;
Радуйся, молитвы пламенение;
радуйся, силы бесовския сокрушение;
Радуйся, книго одушевленная грозных проречений;
радуйся, свитче духовных утешений;
Радуйся, бисере, блистаяй многими чудотвореньми;
радуйся, мироварнице, исполненная неоскудными исцеленьми;
Радуйся, Макарие, скорый помощниче и предивный чудотворче.

Кондак 5

Боготечная звезда в Церкви Истинно-Православней возблиставшая, явился отче Макарие, епископы и священницы союзом со безбожными связавшиеся, небоязненно обличающе, верныя же в вере Православней укрепляюще, воспевал еси Христу Богу: Аллилуиа.

Икос 5

Видеша спира гонителей безбожных твое богоугодное житие, отче Макарие, в темницу ввергоша тя, лютым мучениям предавше. Ты же Господом укрепляем, в вере непоколебим пребыл еси, демонския ухищрения победивше. Сего ради вернии соплетаху ти словеснии венцы сии:
Радуйся, силы бесовския сокрушение;
радуйся, беззаконных гонителей посрамление;
Радуйся, глашатаю истины;
радуйся, вещателю правды;
Радуйся, Христа ради темничныя заключения претерпевый;
радуйся, дивное терпение в лютых мучениях явивый;
Радуйся, сетей диавольских, яко паучины растерзание;
радуйся, ярости безбожных посрамление;
Радуйся, мучения за исповедание веры Христовой приявый;
радуйся, исповеднический подвиг преславно совершивый;
Радуйся, о помиловании нашем Господа со Царственными мучениками умоляющий;
Радуйся, о спасении нашем пред Пречистой купно со Новомученниками и Исповедниками Российскими ходатайствующий;
Радуйся, Макарие, скорый помощниче и предивный чудотворче.

Кондак 6

Проповедник покаяния явился еси, отче наш Макарие, во дни велией брани Отечественной,распутство и неверие в человецех грозно обличающе, многими же чудесами людие в вере утвердивше, наставлял еси молитися Господу усердно, поя Ему: Аллилуиа.

Икос 6

Возсиял еси, яко светозарное светило, утешением и отрадою во дни грозныя брани человецы озаряюще, в недоумении сущих вразумляюще и всем вся на потребу подающе. За сие же ныне слышиши сия:
Радуйся, духоносный старче;
радуйся, богомудрый наставниче;
Радуйся, тайных согрешений обличение;
радуйся, нераскаянных вразумление;
Радуйся, скверну греховную очищаяй;
радуйся, раны греховныя исцеляяй;
Радуйся, слез горьких изсушение;
радуйся, в скорбех и печалех утешение;
Радуйся, православных воинов покровителю;
радуйся, сердец человеческих тайнозрителю;
Радуйся, стада Христова крепкая оградо;
радуйся, врагом видимым и невидимым крепкая преградо;
Радуйся, Макарие, скорый помощниче и предивный чудотворче.

Кондак 7

Хотяще богоборцы заградити вещание богодухновенных устен твоих, отче преблаженне, новым мукам предаша тя, да престанеши верныя наставляти благочестию и воспевати Богу: Аллилуиа.

Икос 7

Новыя сатанинския ухищрения измышляюще, нечестивии мучители твоя, отче наш Макарие, к безумным ввергоша тя. Вернии же твое велие терпение похваляюще, тако тебе воспеваху:
Радуйся, Макарие премудре, к безумным причтенный;
радуйся, непоколебиме, телесными муками не побежденный;
Радуйся, грозное обличение злобы человеческия;
радуйся, пречудное усмирение силы бесовския;
Радуйся, дивное сияние Божественныя благодати;
радуйся, немолчное проповедание Православныя веры;
Радуйся, неверных страх и удивление;
радуйся, верных похвало и веселие;
Радуйся, безумным для мира бывый;
радуйся, мудрость премирну явивый;
Радуйся, яко ранами телесными соткася неизреченное сияние души твоея;
радуйся, яко биеньми лютыми исковашася венцы небесныя славы на главу твою;
Радуйся, Макарие, скорый помощниче и предивный чудотворче.

Кондак 8

Странныя твоя чудеса зряще, верныя в исповедании веры утверждахуся, маловерныя в вере укрепляхуся, заблудшия познанием истины просвещахуся, о тебе же благодаряще Господа песнию: Аллилуиа.

Икос 8

Весь, яко пламенем, ревностию по Бозе Вседержителе объят бывше, Макарие премудре, истинну небоязненно вещал еси, неверие и нечестие в людех грозно обличающе. Мы же, недоумевающе, како тя возможно достойно восхвалити, токмо сице вопием:
Радуйся, пророку Илии в ревности по Бозе Вседержителе подражание;
радуйся, Предтече Иоанну в обличении нечестия уподобление;
Радуйся, проповедию веры апостолом последование;
радуйся, стопами пророка Ионы в призывании к покаюнию шествование;
Радуйся, святителю Николаю во мнозех чудесех ревнование;
радуйся, врачебныя благодати Великомученика Пантелеимона во исцелениих болящих предивное явление;
Радуйся, подвигов святаго Андрея Юродиваго возлюбление;
радуйся, молитв о всем мире Макария Великого рачение;
Радуйся, крепости святых мучеников унаследование;
радуйся, подвигов преподобных отцев понесение;
Радуйся, незлобия святаго Архидиакона Стефана в душе утверждение;
радуйся, печалования о Отечестве страждущем преподобнаго Сергия унаследование;
Радуйся, Макарие, скорый помощниче и предивный чудотворче.

Кондак 9

Всякое сокровенное деяние и помышление человеческое не возможе укрытися от прозорливых очес твоих о, Макарие предивне. Душевнии же недузи премудро врачующе, коварство нечистых духов в прах претворял еси, вопия: Аллилуиа.

Икос 9

Ветий суемудренных, отступствы в Церкви Христовой творящих, грозно обличил еси; премудре Макарие. Каноны церковныя же неослабно исполняти верныя научил еси, от них же вознесесея ти сия похвала:
Радуйся, Церкви Христовой столпе огненный, досязаяй небеси;
радуйся, богозданный облаче, покрываяяй верныя от обновленческия ереси.
Радуйся, ревностное исполнение святоотеческих преданий;
радуйся, упразднение бесовских мечтаний;
Радуйся, сергианския прелести твердое обличение;
радуйся, тайных содружеств с безбожными поношение.
Радуйся, стрело, поражаяй волцы, стадо Христово расхищающих;
радуйся, громе, зело устрашаяяй вернии соблазняющии;
Радуйся, лести и лжи обнажение;
радуйся, истины явление;
Радуйся, поборниче правды неустрашимый;
радуйся, вещателю истинны непоколебимый;
Радуйся, Макарие, скорый помощниче и предивный чудотворче.

Кондак 10

Спасти хотя погибающия души человечестии, день и нощь пред Богом в молитвах предстоял еси, слезными токи лице свое орошающе, мы же твоей велией ревности о спасении ближних дивящеся, благодарне о тебе Богу поем: Аллилуиа.

Икос 10

Стена нерушимая,врагами неодолимая, явился еси, Макарие преславне, верныя от враг видимых и невидимых ограждающе. Молитвами же своими милость Божию чтущим тя испросивше, приял таковыя возносимыя ти похвалы:
Радуйся, младенцев незримое защищение;
радуйся, отроков благочестию научение;
Радуйся, юношей благоразумию поучаяй;
радуйся, дев целомудрию наставляяй;
Радуйся, в супружестве сущих любовию связуяй;
радуйся, вдовствующих от падений греховных ограждаяй;
Радуйся, просящим твоея помощи скоропослушный молитвенниче;
радуйся, исцеления от тебе требующим, врачу благодатный;
Радуйся, усладителю в горести сущих;
радуйся, утешителю в печали пребывающих;
Радуйся, верным тихая отрадо;
радуйся, любящим тя, крепкая защито;
Радуйся, Макарие, скорый помощниче и предивный чудотворче.

Кондак 11

Пение похвальное ти приносяще, отче Макарие, молим тя усердно: не остави нас, чтителей своих, во гресех погибнути, но подавши руку помощи, от тины греховныя исхити, да спасение улучивше, воспоем благодарне Христу Богу: Аллилуиа.

Икос 11

Светозарное светило в земли новопсковстей зашедшее, мощи твоя святыя верным на исцеление и утешение оставил еси, всякого притекающего к ним благодатию своею освящающе. Сего ради тя похваляем и со умилением зовем:
Радуйся, землю Новопсковскую мощами своими освятивый;
радуйся, весь Марковку последними деньми земнаго жития озаривый;
Радуйся, град Старобельск предивными подвигами облагоухавый;
радуйся, сватовстии людие терпением своим удививый;
Радуйся, собора святых, в земли Луганстей просиявших, предрагое украшение;
радуйся, живущих в стране Донбасской похвало и веселие;
Радуйся, о грядущей грозней брани живущим на земли предрекавый;
радуйся, о грядущих бедствиих сокрушавыйся и о избавлении нас от сих усердно моливыйся;
Радуйся, о низпослании Господом на землю благодати пророчествовавый;
радуйся, сим проречением сердца верных утешавый;
Радуйся, мученическаго подвига Царственных Великомучеников чтителю усердный;
радуйся, лику Новомучеников и Исповедников сопричтенный;
Радуйся, Макарие, скорый помощниче и предивный чудотворче.

Кондак 12

Благодати источник неоскудный в тебе ведуще, со усердием к тебе припадаем, оживити изсохшия души наша просяще, да прозябнут из них добродетели молитвами твоими, святе Макарие. От них же плод сторичный Господу принесши, воспоем благодарне Ему: Аллилуиа.

Икос 12

Поюще твое, отче Макарие, праведное житие, прославляем предивныя подвиги и чудеса твоя, ими же, яко бисером украсився, Церкви Христовой новое светило явился еси, неоскудно небесное благословение подающе всем, чтущим тя и воспевающим песни сия:
Радуйся, рабе Господень благий и верный;
радуйся, Пречистую о нас неустанно умоляющий;
Радуйся, со святыми Церкви Катакомбныя прославляемый;
радуйся, верными на всяк день восхваляемый;
Радуйся, последних времен дивный подвижниче;
радуйся, путеводителю ищущих спасения;
Радуйся, спящих совестей пробуждение;
радуйся, каменных сердец умягчение;
Радуйся, чародеев грозное наказание;
радуйся, упразднение суеверий и гаданий;
Радуйся, бесных от демонскаго дручения свобождаяй;
радуйся, тайных рабов Божиих во благочестнем житии укрепляяй;
Радуйся, Макарие, скорый помощниче и предивный чудотворче.

Кондак 13

О, предивный угодниче Христов, преславный чудотворче и теплый о нас молитвенниче, отче Макарие! Приемше сие малое моление, источи нам токи своея скорыя помощи, избави геенны огненныя и вечнаго мучения, да всегда с тобою купно воспеваем Богу: Аллилуиа.

Молитва

О, преславный угодниче Божий и предивный чудотворче, отче наш Макарие! К тебе, скорому помощнику и теплому предстателю по Бозе и Богородице усердно притекающе, молим тя усердно: услыши ны, чада своя духовнии, любовию твоею отеческою во едино стадо Христово собраннии. Днесь прославляем житие твое прехвальное, в нем же чудотворец предивный и крепкий исповедник веры Христовой показался еси.
О, преблаженне Макарие! Яви крепкое заступление верным чадам Церкви Христовой, волцы хищнии и лукавии наемницы от них далече отжени. Умоли Господа нашего воздвигнути в Державе нашей престол Православных Царей и дерзость безбожных низложити. Пошли свое благословение Государю нашему Цесаревичу Георгию Михайловичу и покори под нозе его всякого врага и супостата.
Всем же чтущим тя даруй мир, любовь нелицемерную, здравие телесем, паче же спасение душам. Ниспосли благорастворение воздухов и изобилие плодов земных. Во всех нуждах и потребах источай неоскудную помощь, да посрамлени будут лукавии дуси, во мрак уныния и отчаяния хотящии нас коварно низвергнути. Козни диавольския, яко паучину растерзай и всю их дерзость, движимую на ны, далече отжени.
Таже испроси народу нашему покаяние в отступстве от Помазанника Божия, Благоверного Императора нашего Николая Второго. Да его и твоими молитвами укрепляеми, улучим вечное спасение душ наших и сподобимся стати одесную Престола Божия, идеже предстоиши ныне, отче праведнее, и молиши о нас усердно Единаго в Троице Бога, Отца и Сына и Святаго Духа. Аминь.

Величаем тя, святый блаженный отче наш Макарие; и чтим святую память твою, ты бо молиши о нас Христа Бога нашего.

Память 22 ноября (по н.ст.)

Тропарь, глас 7.

Безумную мудрость века сего обличивше, / мнимым безумием божественную мудрость сокрывал еси, / блаженне отче наш Макарие,/ днесь предстоя престолу Божию/ молися прилежно Христу Богу/ мир верным людем даровати,/ крепость беззаконных низложити/ и спасти души наша.

Кондак, глас 7.

Страждущим людем скорый помощник/ явился еси, святе Макарие/ болезни человеческия пречудно исцеляюще,/ скорбныя и унылыя ободряюще,/ верныя в Истинней вере укрепляюще/ и любити Творца своего научающе,/ бесовския же полчища молитвами попаливше,/ беззаконных дерзость посрамил еси, / темже молим тя, праведниче, прилежно/- защити от враг видимых и невидимых чтущия тя.