Опубликовано Общество - ср, 11/06/2019 - 20:17

Акафист преподобному Макарию, исповеднику Рубежанскому

 

 

Кондак 1

 

Избранный светильниче Церкви Православныя, землю Луганскую лучами благодати своея озаряющий, исповедниче Христов и теплый молитвинниче, ныне предстоя Престолу Божию, молися прилежно о всех чтущих тя и приносящих сицевыя похвалы: Радуйся, Макарие, исповедниче Христов предивный.
 

Икос 1

 

Ангельских чинов сожителя и святых соборов равностоятеля преподобнаго отца Макария, придите воспоим, верни, праведное житие его воспоминающе, похвалы же приносяще таковыя:

Радуйся, ангельским житием землю освятивый;

радуйся, святостию своею небеса озаривый;

Радуйся, воспевателю величия Пресвятыя Троицы;

радуйся, созерцателю Божественныя славы;

Радуйся, благоуханный крине рая Иисусова;

радуйся, благоплодная лозо винограда Христова;

Радуйся, звездо, еюже озарися земля Луганская;

радуйся, стено, еюже оградишася от бед людие рубежанстии.

Радуйся, Макарие, исповедниче Христов, предивный.

 

Кондак 2

 

Видяще суетность мирского жития, отче Макарие, возлюбил еси, равноангельское житие, иноком восхотевше быти. Господу же тепле моляся, да управит стопы твоя ко спасению, воспевал умиленно: Аллилуиа.
 

Икос 2

 

Разум непоколебим в желании иноческаго жития утвердивше, брачных уз отвратился еси, мнимое безумие свое показующе. Темже тя за сие похваляюще, сице вопием:

Радуйся, от юности Христа возлюбивый;

радуйся, сердце свое Господу отдавый;

Радуйся, земныя обручницы не восхотевый;

радуйся, монашеское житие возжадавый.

Радуйся, яко греховныя услаждения не прельстиша тя;

радуйся, яко волнами житейския суеты не потопился еси;

Радуйся, младый еленю взыскавый источницы спасения;

радуйся, орле небесный, тинет лукаваго избегий;

Радуйся, Макарие, исповедниче Христов предивный.

 

Кондак 3

 

Сила любви ко Христу приведе тя в обитель Святогорскую, идеже в посте и молитве подвизаяся воспевал благодарне Богу: Аллилуиа.
 

Икос 3

 

Имеюще Крепкую Заступницу, Пречистую Богородицу, обитель Святогорскую покровом своея милости покрывающую, на брань со духи злобы поднебесной подвигнулся еси. Крепкую веру в душе, яко щит имуще. Темже убо похваляюще тя, сице вопием:

Радуйся, воине Христов неустрашимый;

радуйся, жития преподобных рачителю;

Радуйся, крестом, яко копием бесы поражаяй;

радуся, молитвою, яко пламенем, супостаты попаляяй;

Радуйся, смирением горе возвысивыйся;

радуйся, добродетельми монашескими душу украсивый;

Радуйся, обители Святогорския шипок благовонный;

радуйся, земли Донбасския безценный бисере.

Радуйся, Макарие, исповедниче Христов, предивный.

 

Кондак 4

 

Буря безбожнаго гонения достиже обители Святогорския, ты же, отче Макарие, предал еси себе воли Божией, моляся усердно и вопия Вседержителю Богу: Аллилуиа.

 

Икос 4

 

Слышаще о предивном житии преподобных отцев Святогорских, потщался еси подражати им, отче Макирии, добродетельми монашескими, яко звезда пресветлая сияюще. Сие похваляюще, тако тебе зовем:

Радуйся, блаженства тезоименитый;

радуйся, зерцало подвижническаго жития;

Радуйся, избранный сосуд благодати Божией;

радуйся, образе богоугоднаго жития;

Радуйся, плоть свою покорну духу сотворивый;

радуйся, имя Иисусово на сердце начертивый;

Радуйся, святогорских преподобных отцев учениче;

радуйся, старческия благодати достойный приемниче;

Радуйся, Макарие исповедниче Христов предивный.

 

Кондак 5

 

Боготечной звезде подобно возсиял еси, отче преподобне, в Успенско-Серафимовской обители, праведностию жития своего блистающе, иночествующих же и мирских научал еси паче всего возлюбити Господа, Ему же непрестанно ангели вопиют: Аллилуиа.

 

Икос 5

 

Видеша инокини обители Раздобаровой богоугодное житие твое, преподобне, благодарение возсылаху Господу, тебе же воспеваху сице:

Радуйся, свеще, обитель Успенско-Серафимовскую озарившая:

радуйся, хартие богомудрых наставлений;

Радуйся, достойнейший служителю алтаря Господня;

радуйся, благоговейнейший совершителю служб церковных;

Радуйся, неустанное прославление Имени Божия;

радуйся, умиленное воспевание величия Пресвятыя Богородицы.

Радуйся, безмолвием уста украсивый;

радуйся, сердце свое храмом Святаго Духа сотворивый.

Радуйся, Макарие, исповедниче Христов предивный.

 

Кондак 6

Проповедница Истины, преподобная мати Парескева видяще доброту души твоея, отче Макарие, чадом своим духовным тя сотвори, непоколебимым вере бытии наставляюще, Богу же молитися непрестанно научающе, Ему же святых собори випиют непрестанно: Аллилуиа.

 

Икос 6

 

Возсия в тебе, отче, пастырь истинный, овцы стада Христова от обновленческой прелести ограждающий. Людие же зряще твое непоколебимое в вере Православной утверждение, зваху ти таковая:

Радуйся, веры Христовой столпе непоколебимый;

радуйся, стада Христова пастырю неусыпный;

Радуйся, человецы в вере утверждаяй;

радуйся, волцы хищнии далече отгоняяй;

Радуйся, обновленчества строгий обличителю;

радуйся, уставов церковных ревностный исполнителю;

Радуйся, безбожных прещений не устрашивыйся;

радуйся, пострадати за Господа не убоявыйся;

Радуйся, Макарие, исповедниче Христов предивный.

 

Кондак 7

 

Хотяще безбожнии гонители тя в вере поколебати, в темницу ввергоша. Ты же Господом укрепляем, мужественно терпел еси темничное заключение, моляся усердно, да сподобишися на небесех купно со всеми пострадавшими за Христа воспевати ангельскую песнь Творцу всяческих: Аллилуиа.
 

Икос 7

 

Новый исповедник веры Христовой, явился еси, отче Макарие, терпением своим дерзость гонителей низложивше и пречудно смерти избавившеся. Егда бо мучители видяще соузников твоих погибших, тебе же жива и неврежденна пребывающа, в велие изумление преидоша. Сие воспоминающе, тако вопием:

Радуйся, исповедническаго собора новое украшение;

радуйся, гонителей лукавых велие посрамление;

Радуйся, пострадавый за Христа;

радуйся, уповавый на Господа;

Радуйся, темничным заключением небеснаго пространства достигнувый;

радуйся, Господом вразумляемый, лукавого умервльщения избавивыйся;

Радуйся, неустанный путниче пути теснаго и многоскорбнаго;

радуйся. страданиями убеливый душу свою;

Радуйся, Макарие, исповедниче Христов предивный.

 

Кондак 8

 

Странник убогий, не имеяй где главы приклонити, явился еси, отче, по избавлении своем от темничнаго заключения. Вся же утеснения и скорби безропотно терпяще, воспевал еси Пострадавшему за ны Христу: Аллилуиа.
 

Икос 8

 

Весь скорби велией исполненный, усердно Пречистой молился еси, да явит о тебе благую волю Свою. От Нея же вразумление приявше, благодарение Скорой Помощнице возсылал еси. Мы же Господом наставляеми, приносим ти похвалы таковыя:

Радуйся, Пречистыя рабе возлюбленный;

радуйся, от Нея вразумление пречудное приемый;

Радуйся, граде Рубежное предивное украшение;

радуйся, людей рубежанских похвало и веселие;

Радуйся, расточенные овцы стада Христова во едино собравый;

радуйся, пришествием своим верным велию радость даровавый;

Радуйся, нищетою духовною обогащенный;

радуйся, любовию ко Христу и ближним одеянный;

Радуйся, Макарие, исповедниче Христов предивный.
 

Кондак 9

 

Всякия скорби человеческия утолял еси, отче Макарие, богомудрыми словесы наставляюще, молитвою же зело укрепляюще. Таже и службами церковными души верных услаждал еси, причастия святых Христовых Таин сподобляющее, Людие же о тебе Господу благодарение возсылаху, вопиюще: Аллилуиа.

 

Икос 9

 

Ветия многовещаннии не возмогут достойно изобразити твое праведное житие, сокровенных подвигов исполненное. Мы же недоумевающе, како тя восхвалити достойно, токмо сице вопием:

Радуйся, утешение скорбных;

радуйся, плате, утираяй слезы горькия;

Радуйся, прозорливче и теплый молитвенниче;

радуйся, старче богомудрый и духоносный;

Радуйся, милости и сострадания исполненный;

радуйся, благодатию святаго Духа просвещенный;

Радуйся, наставниче истиннаго покаяния;

радуйся, учителю благочестия;

Радуйся, Макарие, исповедниче Христов предивный.
 

Кондак 10

 

Спасения человеческаго враг исконный воздвиже на тя гонение новое, да не воможеши спасению человеческому послужити и верныя вести путем спасения, поя Христу: Аллилуиа.

 

Икос 10

 

Стен каменных твердейшия явишася сердца людей, иже тя, старца немощнаго и гонимаго, в домы своя не восхотеша прияти. Мы же похваляюще тя, гонение от безбожных доблественно претерпевшаго, тако вопием:

Радуйся, столпе праведности;

радуйся, росо благодатная души оживляющая;

Радуйся, кимвале, совести пробуждающий;

радуйся, свирель, унылыя утешающая;

Радуйся, не имевый где главы приклонити;

радуйся, в обителех праведных ликовствующий;

Радуйся, многоскорбным житием вечныя радости достигнувый;

радуйся, Отцем Небесный в Горнее Отечество приятый;

Радуйся, Макарие, исповедниче Христов предивный.

 

Кондак 11

 

Пение надгробное, совершаюше чада твоя духовныя, плакахуся горько, яко в тебе пастыря и отца духовнаго лишишася, но уповающе , яко и по отшествии своем от земнаго жития их без помощи не оставиши, поминовение о тебе усердно совершаху, поющее Богу: Аллилуиа.
 

Икос 11

 

«Светоносный светильниче благодати, отче наш духовный, како сиротами нас оставил еси» - тако со слезами горце взываху чада твоя духовныя, отче Макарие. Ты же и по кончине своей не оставил их, тепле о них моляся и помощь скорую являюще. Темже приими под покров молитв твоих и нас, тако ныне воспевающих:

Радуйся, непрестанный о нас молитвенниче;

радуйся, чтущих тя крепкий заступниче;

Радуйся, щите от бед защищаяй;

радуйся, стено от врагов ограждаяй;

Радуйся, любящим тя незримо споспешествующий;

радуйся, молящимся ти, в нуждах помогающий;

Радуйся, мощами своими Луганскую землю освятивый;

радуйся, благодатию своею верных души усладивый;

Радуйся, Макарие. исповедниче Христов предивный.
 

Кондак 12

 

Благодать подаждь всем чтущим святую память твою, преподобне Макарие. Да многообразных сетей диавольских избавившися достигнем вечнаго спасение и воспоем купно с тобою Творцу своему: Аллилуиа.
 

Икос 12

Поюще праведное житие твое, отче Макарие, поминаем страдания и узы твоя, яже за Христа понесл еси, воспеваем любовь к людем, еюже во дни богоборческаго гонения верных в вере укреплял еси. Ныне же предстоя Престолу Божию, поминай богомудре, нас соплетающих ти словесныя венцы сицевыя:

Радуйся, красото церковная;

радуйся, проповедниче Истины;

Радуйся, божественныя славы причастниче;

радуйся, вечныя радости наследниче;

Радуйся, апостольской ревности подражателю;

радуйся, мученической крепости явление;

Радуйся, преподобнаго жития благоухание;

радуйся, ангелов и святых сожителю;

Радуйся, Макарие, исповедниче Христов предивный.
 

Кондак 13

 

О, преподобноисповедниче Христов отче Макарие, приимы сие похвальное пение и предстоя Престолу Небеснаго Царя молися о спасении всех верно вопиющих о Тебе Богу: Алилуиа.
 

(Сей кондак читается трижды, потом Икос1 и Кондак1)

 

 

Молитва

 

О, преподобне и богоносне отче Макарие, в земли Луганской, яко звезда пресветлая просиявый ныне на небесех пребывающе у Престола Божия молися тепле ко Господу, да оградит Церковь Святую Свою от ересей расколов и всех враждующих на Ню. Испроси Пастырем имети ревность о спасении душ человеческих, монашествующих укрепи в добродетельном житии, всем верным яви скорую помощь и заступление. Супругам любовь испроси, чада послушными родителем сотвори, в помрачении ума сущих просвети, заблудшия на путь истины настави, вдовицам и сиротам милостивый и сострадателен споспешник буди, младенцы воспитай, юныя от растления духовнаго сохрани.
Призри милостивым оком на Благовернаго Государя нашего Цесаревича Георгия ихайловича и во всех богоугодных делех небесный покровитель Ему буди. Вси врази его низложи и от козней врага рода человеческаго сохрани.

Таже в житейских нуждах помози, болящия и в скорбных обстояниих посети, благорастворение воздухов испроси, и всем по коего же потребе полезная даруй. Паче же всего молися прилежно о спасении нашем, да отшедше от земнаго скоропреходящего жития, сподобимся стати одесную Престола Божия. Идеже всегда будем благодарение о Тебе возсылати Пресвятей Троице, Отцу и Сыну и Святому Духу, всегда ныне и присно и во веки веков. Аминь.
 

Тропарь глас 7

 

Служение Христу, паче мирския суеты возлюбивше/ святостию монашескаго подвига просиял еси/ венцами же на небесех, яко исповедник Христов, блистающе,/ пред Господем ныне теплыя молитвы возносиши/ да помиловании будут в день судный/ вси чтущия тя, Макарие, преподобне.

 

Кондак глас 3

 

Днесь на небесех предстоит Престолу Божию, / преславный исповедник веры Христовой Макарий/ и теплыя молитвы Господеви возносяще/ молится со всеми новомучениками и исповедниками усердно/ да покаянием народ Святой Руси/ избегнет праведнаго наказания/ и муки вечныя/ Его же молитвами Христе Иисусе / яко Милосерд и Человеколюбец/ спаси души наша.
 

Величание

 

Величаем тя, преподобноисповедниче Макарие, и чтим святую память твою, наставниче монахов и собеседниче ангелов.