Акафист преподобной матери нашей Фаине, Старобельской чудотворице.

Кондак 1

Избранней из млада на служение Господу Иисусу, Его избранному сосуду, Духом Святым освященной, великой молитвеннице и чудотворице, подвиг исповеднический добре понесшей и в горняя селения беспреткновенно восшедшей, преподобней матери нашей Фаине предивней, воспоим вернии, песнь сию со умилением вопиюще: Радуйся, преподобная мати Фаино, преславная, людей православных добрая наставница.

Икос 1                  

Ангельского образа достойная носительница, явилася еси, о мати Фаино блаженная, монашеское бо житие ангелоподобное, паче мирския суеты возлюбивше, всем сердцем своим к Сладчайшему Господу Иисусу, Жениху своему, прелепилася еси. Вземше же крест свой, до конца жития своего путем узким и тернистым шествовата восхотела еси, спасение души своея возжелевше. Сего ради восхваляем тя, угоднице Христова и вопием ти сице:

 Радуйся, Господня рабо, преподобно пожившая;

 радуйся, волю Божию, паче воли своея возлюбившая.

 Радуйся кладезю воды животворныя, благодатию нас напоящая;

 радуйся кадило благовонное, молитвы своя о нас, яко фамиам, Господу возносящая.

 Радуйся, монашествующих похвало и украшение;

 радуйся, в мире живущим, скорое вспоможение.

 Радуйся, ко спасению нас призывающая; 

радуйся, чтущих тя, в бедах и напастех не оставляющая.

 Радуйся, чудотворице предивная, помощь скорую подающая;

радуйся, целительнице милосердная, недузи телесныя и душевныя врачующая.

 Радуйся, обители Скорбященския крепкий покрове;

 радуйся, града Старобельска от бед и напастей твердая оградо.

Радуйся, преподобная мати Фаино, преславная, людей православных добрая наставница.

Кондак 2

Видяще Господь доброту души твоея, преподобная мати, избра тя в лик угодниц Своих, да отвергше прелести мира сего, лукаваго, поработаеши Творцу и Богу своему. Ему же вся силы небеснии непрестанно со страхом и трепетом вопиют: Аллилуиа.

Икос 2

Разум от Господа просвещенный имуще преподобный Алексий Голосеевский, узревше в тебе новую угодницу Христову, благослови тя, предрече ти, яко великой молитвенницей будеши и за веру Христову много постраждеши. Мы же сему к тебе благоволению Божию дивящеся вопием ти тако:

 Радуйся, в день Преображения Господня рожденная;

 радуйся, еще младенцем сущая, монашескою нареченная.

 Радуйся, издетска мяса вкусити не восхотевшая;

 радуйся, пост и воздержание с ранних лет возлюбившая.

 Радуйся, смирения ради своего Господом избранная;

 радуйся, чистоты ради своея к ангелом сопричтенная.

 Радуйся к святыням киевским на поклонение притекшая;

 радуйся, преподобным Алексием в Киеве благословенная.

 Радуйся, от него предречение о себе приявшая; 

 радуйся, шествовати путем тесным   многоскорбным   возлюбившая.

 Радуйся,   агнице   Христова   стада,   на   пажити спасительной упасшаяся;

 радуйся, голубице непорочная, в селения горняя возлетевшая.

Радуйся, преподобная мати Фаино, преславная, людей православных добрая наставница.

Кондак 3

Сильно распаляше тя любовь к житию иноческому, егда услышала еси от сродницы своея словеса блаженныя матери Параскевы Старобельския, яко Матерь Божия избра тя в лик инокинь обители Своея, Скорбященския, идеже непрестанно молитвы возносят Господу и вопиют смиренно Ему песнь: Аллилуиа

Икос 3 

Имеюще богомудрую наставницу, великую Христову угодницу, блаженную Параскеву, безбедно от стрел вражиих ко спасению текла еси, у нея в послушании пребывающе и ея наставления усердно исполняюще. Сего ради бесстрастие от Господа вскоре стяжавше, благодать сугубую от старицы своея восприяла еси, многим в житии сем многоскорбнем помогающе и на путь спасения заблудших наставляюще, от них же слышиши ныне благодарственныя песни сии:

 Радуйся, Пречистою под покров обители Скорбященския приятая;

радуйся под духовное водительство блаженною Параскевою  избранная.

Радуйся, воли своея отвергшаяся;

радуйся, сетей лукаваго избегшая.

Радуйся, лукаваго беса в уныние приведшая;

радуйся, от него вопль: "пропала, девица пропала", со сродники своими слышавшая.

Радуйся, образе истинного послушания; 

радуйся, возлюбившая нестяжание.

Радуйся, змием сребролюбия не прельщенная;

радуйся, похотью плоти не побежденная.

Радуйся, гордость лукавую далече отгнавшая;

радуйся, на уста своя печать безмолвия возложившая. 

Радуйся, преподобная мати Фаино, преславная, людей православных добрая наставница.

Кондак 4 

Буря искушений бесовских не поколебаша душу твою, блаженная мати, Фаино, имела бо еси пристань благоотишную, старицу блаженную Параскеву предивную, на путь истинный тя наставляющую и от сетей диавольских тя сохраняющую, о ней же ныне благодарно вопием Богу: Аллилуиа

Икос 4

Словеса дивныя услышала еси от духоносныя наставницы своея, мати Фаино преподобная, яко акафистное пение приносити людие ти будут вопиюще: «Радуйся, Фаино, свиния пасшая». Указующе сими словесы, яко нас, свиниям уподобившихся, духовно наставляти на спасение будеши. Сие убо предречение ныне исполнившееся зряще, страха и трепета исполняемся, яко воистину в житии своем, скотом бессловесным подобни есьмы. Ты же, о мати милосердная, упаси нас, от пути истинного заблудших и приведи к покаянию и спасению всех вопиющих ти сице:

Радуйся, древним преподобным женам равная;

радуйся, жизни вечныя в селениих райских достойная.

Радуйся, наставница наша богопросвещенная;

радуйся, в милосердие и любовь к людям облеченная.

Радуйся, стадо Христово добре упасшая;

радуйся, от него хищных волков далече отгнавшая. 

Радуйся, светильниче пресветлый, ослепление наше просвещающая;

радуйся, чада своя духовныя манною духовною насыщающая.

Радуйся, древо при исходищи вод насажденная, плод мног принесшая;

радуйся, девство свое нерастленно, Жениху своему Христу сохранившая. 

Радуйся, яко во всеоружие облеклася еси;

радуйся, яко враги невидимыя победила еси.

Радуйся, преподобная мати Фаино преславная, людей православных добрая наставница.

Кондак 5

Богопротивнии обновленцы во святую обитель, яко волцы хищнии восшедше, стадо агниц Христовых к отступлению от Истинныя веры склоните восхотеша. Ты же, мати Фаино, купно со старицею и сестрами духовными на камени веры крепко стояще, тех словеса лукавии отвергли есте, даже до смерти пострадати за Господа возжелевше, да в будущем веце не лишени будете купно со ангелы пети Богу: Аллилуиа

Икос 5

Видеша твердую и непоколебимую веру невест Христовых, гонители лукавии озлобишася зело и гонение воздвигше лютое, изгнаша инокинь из обители Скорбященския. Ты же, о мати преподобная, купно с ними крест тяжкий лишений и страданий, гонений и темничных заключений, терпеливно понесла еси, сего ради достойна явилася похвал сих:

Радуйся, столпе   непоколебимый  Церкви  Православныя; 

 радуйся,   шипок   благовонный  обители славныя.

Радуйся, душу свою в горниле страданий очистившая;

радуйся, многия скорби и лишения безропотно претерпевшая.

Радуйся, обновленчества лукаваго грозная обличительнице;

радуйся, людей в Православии добрая наставница.

Радуйся, агнице Христова, волков лютых не убоявшаяся;

радуйся, упованием на Господа укреплявшаяся.

Радуйся, крине благоуханный земли Луганския;

радуйся, в сонме святых пресветло блистающая.

Радуйся, Церковь гонимую, иже в катакомбех, озарявшая;

радуйся, безбожныя власти богоугодным житием своим озлоблявшая.

Радуйся, преподобная мати Фаино преславная, людей православных добрая наставница.

Кондак 6 

Прозреваше твое величие духовное, блаженная Параскева поемше тя, в обитель Ростабарову Успенско-Серафимовскую стопы своя направи и притек в ню, представи тя монашескому пострижению, яко достойную сего. Ты же со смирением покорившись воли Божией взывала в сердце Богу: Аллилуиа

Икос 6

Возсия в тебе исповедница новая, мати Фаино преподобная, ссылки бо и темничныя заключения  за   веру  Христову  от  безбожных   претерпела   еси.   Но   ничтоже   от  любви Христовой не возможе тя отвергнута. Сего ради прославляюще подвиги, терпение и труды твоя, вопием ти со умилением таковая:

Радуйся, светлости тезоименитая;

радуйся, Христу Богу себе уневестившая.

Радуйся, от безбожных гонение лютое претерпевшая;

радуйся, в малодушие и уныние от сего не впавшая.

Радуйся, с бессловесными пищу вкушавшая;

радуйся, Бога за все благодарившая.

Радуйся, образ жития нам показующая;

радуйся, в скорби сущих укрепляющая.

Радуйся, невинно гонимая;

радуйся, неправедно осужденная.

Радуйся, сугубую благодать от блаженныя Параскевы приявшая;

радуйся, дщерь ея духовная.

Радуйся, преподобная мати Фаино преславная, людей православных добрая наставница.

Кондак 7

Хотяще безбожницы крепость твою, мати Фаино, поколебати, на тяжкия труды лагерныя предаша тя.Ты же, яко агница незлобивая все безропотно претерпела еси, вопия Пастырю своему: Аллилуиа 

Икос 7

Новую Свою угодницу яви в тебе нам Господь. Яко по возвращении своем в страну Донбасскую, явилася источником благодати неоскудевающим, светильником пресветлым, нас благодатию просвещающая, милосердною целительницей, недузи наша врачующей и подвизающей нас прославляти Господа дивного во святых Своих. От нас же ныне приими сия приносимыя тебе похвалы:

 Радуйся, страны Донбасския угодница прехвальная;

 радуйся, за чистоту Православия добрая воительница.

 Радуйся, в сонме святых Господа прославляющая;

 радуйся, землю Русскую молитвами своими освятившая.

Радуйся, старице духоносная; 

радуйся, прозорливице смиренномудрая.

Радуйся, погибающих в море житейском спасающая; 

радуйся, погрязших во гресех, к покаянию воздвизающая.

 Радуйся, хладныя сердца наша любовия ко Христу распаляющая;

радуйся, бесов лукавых в трепет повергающая.

Радуйся, нечистых духов из людей изгонительница; 

радуйся, в болезнех сущих скорая целительница.

Радуйся, преподобная мати Фаино преславная, людей православных добрая наставница.

Кондак 8

Странницею в земнем житии своем явилася еси, угоднице Христова предобрая, не имела бо где главы своея приклонити. Возжелела бо паче всего селения горняя, идеже лицы ангельстии славословят Творца всяческих божественною песнию: Аллилуиа

Икос 8

Всем притекающим к тебе была еси материю сердобольною. Многих бо на путь покаяния и спасения наставила еси. Чудеса и исцеления многая совершающе, смирением велиим себе покрыла еси, славы суетныя человеческая, яко огня геенского избегающе, от себе далече гордость и тщеславие отгнавше, едину славу от Господа улучити возжелела еси. Сие зряще, вопием ти со умилением сицевая: 

Радуйся, столпе благосветлый, на путь истинный наставляющая;

радуйся, столпе облачный, фараона мысленного к нам не допускающая.

Радуйся, целомудрие хранити нас научающая;

радуйся, страсти многообразныя от нас отгоняющая.

Радуйся, чада своя духовныя молитвами не оставляющая;

радуйся, их своим заступлением, яко крылами покрывающая.

Радуйся, сердец наших от лукавства очищение;

радуйся, умов наших помраченных просветление.

Радуйся, поста подвиг одеяньми многими сокрывавшая;

радуйся, поношения невинно от людей претерпевшая.

Радуйся, к Богу о нас присная молитвенница; 

радуйся, пред Благодатной Богородицей Девой о нас всегдашняя предстательница.

Радуйся, преподобная мати Фаино, преславная, людей православных добрая наставница.

Кондак 9

Всякаго притекающего к тебе не отринути и без твоея благодатныя помощи не оставити обещалася еси, милосердная мати. Аще бо и телом от нас преставилася еси, но душею своею праведною ныне Престолу Божию предстоиши и усердно молитвы своя возносиши о всех с верою притекающих к тебе и вопиющих о тебе Господу: Аллилуиа

Икос 9

Ветия многовещанныя не возмогут по достоянию прославити тя, подвижнице Христова. В житии бо своем многотруднем Господа прославила еси, ныне же Творец всех и Владыка прослави тя, нетление мощем твоим дарова. Таже и благодатная помощь и многая исцеления от тебе истекают, Господь бо сим тя, верную рабу Свою, прославляет и научает нас, чтущих тя, пети ти сице:

Радуйся, Господом на небеси и на земли прославленная; 

радуйся, к лику преподобных жен причтенная.

Радуйся, яко нетлением мощей прославлена еси;

радуйся, яко мощи твоя святыя источником исцелений явилися еси.

Радуйся,яко и земля от гроба твоего, цельбы многия содевает;

радуйся, яко елей от мощей твоих многия недужныя исцеляет.

Радуйся, от враг видимых и невидимых оградо;

радуйся, вхождению в нас злых страстей крепкая преградо.

Радуйся, детоубийства во чреве строгая обличительница; 

радуйся, от падения во глубину зол верная хранительница.

Радуйся, страждущим и нуждающимся в земнем житии своем помогавшая; 

радуйся, по преставлении своем нас не оставившая.

Радуйся, от отчаяния сохраняющая;

радуйся, печаль нашу в радость претворяющая;

Радуйся, преподобная мати Фаино, преславная, людей православных добрая наставница.

Кондак 10

Спасительницей утопающих в море житейстем, явилася еси, великая угоднице Христова Фаино. Мнозии бо тобою спасение душ обретоша. Духа Святаго бо благодать на тебе преизобильно почиваше, таже и многими благодатными дарами тя Господь украси, да ими людей православных на путь спасения наставиши и научиши пети Избавителю Богу: Аллилуиа

Икос 10

Стеною крепкою, от бед и напастей нас ограждающей, явилася еси о, мати Фаино. Яко ради спасения ближних себе никогдаже пощадила еси. Кто бо достойно изобразити возможет многия труды твоя, ради ближних подъятыя, молитвы деннонощныя ко Господу и Пречистой тобою за народ наш воссылаемии, слезы теплыя ко Творцу за чада свои духовнии пролитыя, таже и подвиги сокровении, их же Сам Господь весть. Мы же по скудоумию своему нечистыми усты своими восхволяем тя тако: 

Радуйся, мати многотрудная, себе не щадившая;

радуйся, молитвеннице теплая, слезы своя в молитвах о чадех духовных проливавшая.

Радуйся, от одра болезни многия воздвигшая;

радуйся, водою от святаго источника свой дар исцелений сокрывавшая.

Радуйся, дожди благовременныя молитвами своими на землю низводившая;

радуйся, славы человеческия и похвалы никогдаже приявшая.

Радуйся, хулившим тя добро творившая;

радуйся, зла и обиды в сердце своем не имевшая.

Радуйся, радости вечныя достойная; 

радуйся, Творцом зело прославленная.

Радуйся, пище крепкая, духовный глад насыщающая;

радуйся, светлый покрове, наготу нашу греховную покрывающая.

Радуйся, преподобная мати Фаино преславная, людей православных добрая наставница.

Кондак 11 

Поюще подвиги твоя, восхваляем и смирение твое велие, ублажаем таже и кончину твою праведную. Многия бо леты богоугодно поживше, к исходу в жизнь вечную притекла еси. Сердцем же своим о чадех духовных болезнуя, некиих от них пред кончиною своею, мантиею, аки крылами кокош птенцы своя, покрыла еси, тепле о них моляся и вопия Богу: Аллилуиа

Икос 11

Возженное кандило пред кончиною своей созерцала еси, мати Фаино, сама же яко светильник святостию сияще, душу свою праведную в руце Божия пред образы святыми безболезненно предала еси. Сию убо праведную кончину прославляюще, воспеваем ти похвалы таковыя:

Радуйся, красоты неизреченныя созерцательнице;

радуйся, вечнаго живота наследнице.

Радуйся, пред кончиною своею многие дни земные пищи и пития не вкусившая;

радуйся, наслаждение вечное приявшая.

Радуйся, кончину свою предвозвестившая;

радуйся, мантиею чада духовный своя, яко крылома покрывшая.

Радуйся, о вечной жизни помышляти научающая; 

радуйся, падших во греси восставати призывающая.

Радуйся, мытарей немилосердных избегшая; 

радуйся, дерзость тех посрамившая.

Радуйся, кандило многосветлое, земное кандило пред кончиной созерцавшая; 

радуйся, страннице, на небесех жилище вечное себе обретшая.

Радуйся, преподобная мати Фаино преславная, людей православных добрая наставница.

Кондак 12

Благодать подаждь всем чтущим память твою святую, мати Фаино преславная, да богоугодно поживше, кончины христианския сподобимся и избегнем мытарств горьких, прославляюще о сем Господа песнию: Аллилуиа

Икос 12

Песни похвальныя благодарне воссылают ти людие, помощь скорую от тебя получивше. Яко же бо кладезь неисчерпаемый благодати духовныя и вспоможения прескораго явилася еси, помошнице наша. Нас бо страстьми палимих прохлаждавши, от ослепления духовнаго исцеляеши, на путь истинный спасительный наставляеши и без помощи своея не оставляеши всех, вопиющих ти сице:

Радуйся, удице златая, из рова погибели извлекающая;

радуйся, окаменелыя сердца умягчающая.

Радуйся, трубо благозвучная, от сна греховнаго пробуждающая;

радуйся, громе, лукавство и лесть обнажающая.

Радуйся, острейшая стрело, враги невидимыя уязвляющая;

радуйся, молние замыслы   злые   в   прах   претворяющая. 

Радуйся,   росо   благодатная,   изсохшия   души орошающая;

радуйся, чаше златая, отрадою души напояющая.

Радуйся, кимвале доброгласный, глаголы жизни вечныя вещающая;

радуйся, щите крепкий от навет вражиих ограждающая.

Радуйся, наставнице наша предобрая;

радуйся, благодетельнице наша прещедрая.

Радуйся, преподобная мати Фаино преславная, людей православных добрая наставница.

Кондак 13

О, преподобная и богоносная мати наша Фаино! Призри свыше на нас, к тебе ныне притекающих и теплыя молитвы от всего сердца тебе приносящих. Не отврати лица Твоего от нас к тебе усердно молящихся и на помощь твою скорую уповающих. Вознеси о нас недостойных теплыя молитвы ко Пресвятей Троице, да в страшный день судный помиловани будем и сподобимся купно со всеми праведными пети: Аллилуиа, Аллилуиа, Аллилуиа

 (Сей кондак читается трижды, затем Икос 1 и Кондак 1)

МОЛИТВА 1

О великая и преславная угоднице Христова, преподобная мати Фаино! Теплая за нас молитвенница, земли Донбасския преславное украшение, обители своея и града Старобельска крепкая покровительница, всех же прибегающих к тебе скорая помощница и заступница! Услыши ныне вопль наш сердечный от юдоли скорбей и печалей возносимый. Мати наша духовная, не лиши нас твоего милостиваго заступления, приими нас под твое крепкое покровительство. Просвети очи наша, грехами ослеплении, просвети умы наша, помыслы непотребными осквернении, души наша, язвами и струпами греховными покрытыя милостию своею исцели. Помощнице наша скорая, в нуждах житейских нам помози, на путь покаяния и исправления настави. Злую волю нашу укроти, подаждь нам оставшиеся дни жития нашего в покаянии и угождении к Богу провести. Монашествующим буди добрая наставница, на спасение тех наставляюще и како жити подобает богоугодно, свыше вразумляюще. Обитель же сию, в ней же добре подвизалася еси, молитвами своими не остави и к духовному преуспеянию жительствующих в ней приведи. Благодетелям же ея испроси оставление грехов и спасение душ их. Сиротам и вдовицам буди скорая помощница. Девствующим чистоту и непорочность сохранити помози. Супругам любовь и согласие даруй. Старость поддержи, юныя от тлетворности века сего огради. Церковь же Святую Соборную и Апостольскую от ересей и расколов сохрани. Пастырей пасти овец Христовых укрепи, волцы же хищныя от стада Христова далече отжени. Земли плодоносие и благорастворение воздухов молитвами своими ниспошли. О стране нашей, в мерзости богоотступства поверженой, молитву теплую сотвори. И всех нас, чтущих святую память твою, матернего своего заступления не лиши, да беспреткновенно достигнем селений райских, идеже купно с тобою прославим Всесвятое имя Отца и Сына и Святаго Духа во веки веков. Аминь.

МОЛИТВА 2

О, пречудная великая угоднице Христова, преподобная мати наша Фаино! Ты яко светильник пресветлый ныне во граде Старобельске просияла еси. Чудесами же и исцеленьми многими прославилася еси, нам недостойным сия источающе. Яви нам милосердие твое, чтущим память святую твою и восхваляющих житие твое преславное. Не остави нас сирых и убогих, явися нам, милосердная мати и заступнице. Защити нас от враг видимых и невидимых и всякаго зла. Предстательством своим пред Господем испроси прощение согрешений наших. Подаждь благорастворение воздухов и изобилие плодов земных. Паче же сохрани Церковь нашу Православную от ересей, расколов и навет вражиих. Управи ум наш в правой вере, сохрани нас от падений греховных и соблазнов мира сего. Изгони от нас дух злобы и уныния, дух гордости и тщеславия, дух ненависти и корыстолюбия, дух сребролюбия и блуда. Отжени от нас помыслы и чувствия оскорбляющие Господа и Пречистую Матерь Его. Испроси нам прощение согрешений наших и подаждь непостыдную христианскую кончину жития нашего. Таже молитвами твоими подаждь телесем нашим здравие, душам спасение и все благопотребное в житии сем, да купно с тобою воспрославим всесвятое имя Отца и Сына и Святого Духа и твое милостивое предстательство всегда ныне и присно и во веки веков. Аминь.

Величание

УБЛАЖАЕМ ТЯ, ПРЕПОДОБНАЯ МАТИ НАША ФАИНО, И ЧТИМ СВЯТУЮ ПАМЯТЬ ТВОЮ, НАСТАВНИЦЕ МОНАХОВ И СОБЕСЕДНИЦЕ АНГЕЛОВ.

День рождения 6(19) августа

День преставления 1(14) января

День тезоименитства 18 (31) мая.

День обретения мощей 24 апреля (7 мая)

Тропарь, гл.4.

От юности возлюбила еси Христа преподобная мати, и Тому Единому в житии своем поработати восхотев, дом отеческий, жития ради иноческого оставила еси, подвиг же исповеднический достойно понесла еси, духовной наставницей людем православным явилася еси, сего ради почитающе память твою, вопием ти: Радуйся, Фаино, преподобная мати наша.

Ин тропарь, гл 4.

Града Старобельска светило преславнае за чистоту Православия добрая воительница, исповедница и чудотворица, преподобная мати наша Фаино, днесь предстоя Престолу Божию, молися прилежно о нас, чтущих тя.

Кондак, гл 3

Яко звезда пресветлая, на мысленный тверди светящая, явилася еси, преподобная мати Фаино, нас грешных просвещающе, от скорбей и бед спасающе, и от недуг исцеляюще. Темже убо вопием ти: не лиши твоего теплого предстательства нас, ныне чтущих тя.

Ин. Кондак, гл. 8

Красоту мира лукавого возненавидев, Жениху Христу от юности уневестилася еси. Многая благодатныя дары от Него прияв, страдущим помогала еси, Фаино преславная.