Опубликовано Общество - ср, 11/06/2019 - 17:59

Служба святому праведному Димитрию Горскому, Осиновскому затворнику.

 

 

Вечер, на Господи воззвах, стихиры, глас 4

Благодатию божественною,/ яко источником неоскудным,/ напояеши жаждущих спасения./ Изсохшия души оживляюще,/ окаменелыя сердца умягчаеши,/ скверну греховную омываеши/ и благоплодными сотворяеши/ сердца чтущих тя усердно,/ отче Димитрие преславне.
Мира лукаваго отвратився,/ Единому Господу служити восхотел еси,/ яко же спасительное прибежище обретше,/ затворническим житием безстрастия достигл еси,/ преподобных похвало и радование,/ верных покров и веселие,/ наше же крепкое заступление,/ отче Димитрие преславне.
Сосуд благодати Духа Святаго,/ тя, преславне, Господь сотвори./ Верою бо крепкою сияеши,/ смирением велием благоухаеши,/ святостию же верных сердца озаряеши./ Покаяния же образ показуя,/ на милосердие Божие уповати наставляеши нас,/ отче Димитрие преславне.
 

Слава, глас 8

Кто не восхвалит богоугодное житие твое, кто не прославит подвиги твоя. Умом бо в горняя возлетевши, ангельское житие на земли показал еси, о погибающих же душах болезнуя, богоугодному житию верныя наставлял еси. Ныне же предстоя Христу Богу, молися прилежно о чтущих тя.
 

И ныне, Богородичен:

Радуйся, Богоизбранная Отроковице; радуйся, Невесто Неневестная. Радуйся, Мати Христа Бога нашего; радуйся, Агнице, рождшая Агнца Христа. Радуйся, Честнейшая херувим; радуйся, Славнейшая серафим. Радуйся, огнезрачный Престоле Господень; радуйся, Носившая Носящаго вся. Радуйся, верныя заступающая; радуйся, погибающия спасающая. Радуйся, вся покровом Своим покрывающая, Мати Божия.
 

Крестобогородичен:

Сына Своего возлюбленнаго на кресте зряще, Мати Божия, плачущи глаголала еси: Чадо, что се страждеши плотию и Мя Едину оставляеши; потщися прославитися, яко да возвеличуся страстию Твоею.
 

На стиховне стихиры, глас 1

Наста преславное торжество,/ верных сердца возвеселяющее,/ преславная память/ угодника Христова Димитрия,/ егоже прославляюще,/ молимся о спасении душ наших.
Стих: Честна пред Господем смерть преподобных Его.
Страсти безсловесныя умертвив,/ плоть духови покорил еси,/ преславный угодниче,/ праведне отче Димитрие,/ со ангелы и святыми предстояще,/ молися прилежно Богу/ о спасении душ наших.
Стих:Блажен муж бояйся Господа, в заповедех Его восхощет зело.
Свыше укрепляем,/ яко добрый воин Христов,/ на лютую брань со врагом нашего спасения/ безбоязненно потекл еси,/ смирением и молитвою силу вражию попаляюще,/ слезными токи коварство нечистых попаляюще,/ отче Димитрие,/ молися прилежно/ о душах наших.
 

Слава, глас 8

Верных множества наставником благочестия явился еси, праведне отче Димитрие, заповеди Господни исполняти наствляюще, греха же яко огненнаго запаления, отбегати научающе, милостыню и всякое благо творити заповедав, молитвенник теплейший показался еси о спасении душ наших.
 

И ныне, Богородичен:

Безневестная Дево, яже Бога неизреченно заченши плотию, Мати Бога Вышняго, Твоих рабов мольбы приими, Всенепорочная, всем подающи очищение прегрешений: ныне же наша моления приемлющи, моли спастися всем нам.
 

Крестобогородичен:

Горце рыдаше Пречистая, распятие Твое,Господи, зряще; и глаголаше Ти со слезами: О, Сыне Мой, како Мя едину оставляеши, тщишися Мене безчадну сотворити, воскресни и прославлюся, и воспою велие милосердие Твое.
 

На литии самогласны, глас 8

Приидите верных множества,/ восхвалим покаяния проповедника,/ пустынных отцев жития рачителя,/ христианского благочестия наставника,/ великославного Димитрия,/ имже ныне земля Луганская/ яко безценным камением украсися./ Егоже прославляюще,/ Господу благодарение возносим.
Веселися земля Луганская,/ ликуйте осиновстии и новопсковстии людие,/ се бо в Церкви Православней/ новый светильник возсия,/ великославный затворник Димитрий,/ его же молтвы непрестаннии/ яко фамиам благоуханный ко престолу Божию восходит./ Его же прославляюще,/ Господу благодарение возносим.
 

Слава и ныне: глас тойже

Звезду на востоце зряще,/ волсви от востока преидоша/ поклонитися от Девы Рождшемуся/ Спасу Христу и Богу./ Егда же узреша Богомладенца на руцех Пречистыя,/ велия радости исполнившися,/ принесши же злато, ливан и смирну,/ во свою страну отыдоша,/ славяще Рождшагося Господа.

 

Тропарь, глас 4

Пустыннаго жития ревнитель явился еси,/ затворническаго жития подвиг добре понесши,/ от Господа же благодатныя дары прияв,/ спасения многих благий виновник показался еси,/ праведне отче Димитрие,/ моли Христа Бога/ спастися душам нашим.
 

Слава, и ныне, Богородичен или Крестобогородичен.

 

 

На утрени, на Бог Господь, тропарь тойже.
По первом стихословии седален, глас 2.

Сокровенныя подвиги и труды подъявше, древним преподобным благий подражатель явился еси, храмом Пресвятей Троице душу свою соделавше, и паче света солнечного святостию просиявше, ныне со праведными веселишися, Димитрие преславне.(Дважды).
 

Слава, и ныне, Богородичен:

Бедствующия рабы Твоя спаси Богоодице, Тебе бо скорую Помощницу имуще и на Твое матернее милосердие всегда уповающе, от вечныя погибели Тобою избавляемся, Мати Божия.

 

По втором стихословии, глас 1

Праведного жития образе и любви ко Господу зерцало, праведне отче Димитрие, молися прилежно, да будем подражати богоугодному житию твоему.(Дважды).
 

Слава, и ныне, Боородичен:

Пресвятая Дево, высше ангельских чинов на небесех показалася еси, Милосердною Матерью на земли явилася еси; от погибели вечныя, имя Твое преславное призывающих, всегда избавляющая.
 

По хвалите Имя Господне припев:

Величаем тя, святый праведный отче Димитрие, и чтим святую память Твою, ты бо молиши о нас Христа Бога нашего.
 

Псалом избранный: Терпя потерпех Господа.....

 

По полиелее, седален, глас 5

Возсия днесь память святаго затворника Димитрия, сей бо теснотою пещерною пространства небесного достигнув и достойныя награды от Господа сподобився, ныне усердныя молитвы возносит о спасении нашем.(Дважды).
 

Слава, и ныне, Боородичен:

Велие Свое милосердие показующи, от Чистыя Девы, Господи, плоть Свою восприял еси, да род человеческий спасеши от погибели вечныя: Господи, слава Тебе.
 

Степенна, 1 антифон, 4 гласа

Прокимен: Честна пред Господем смерть преподобных Его.
Стих: Что воздам Господеви о всех, яже воздаде ми.
 

Всякое дыхание:
Евангелие преподобническое:
По 50 псалме стихира глас 6.

Праведне отче Димитрие, яко звезда пресветлая явился еси, землю Русскую озаряюще. Верныя же лучами благодати облиставая, ко испралению жития и покаянию наставляеши, болящия пречудно исцеляеши, и во всяких нуждах скорый помощник являешися, да прославляется Имя Христово тебе ради.

 

Канон, глас 8

 

Песнь 1

Ирмос: Воду прошед яко сушу и египетскаго зла избежав, израильтянин вопияше: Избавителю и Богу нашему поим.
Припев: Святый праведный отче Димитрие, моли Бога о нас.
Ангельских ликов и святых соборов сожителю, радуйся Димитрие, яко пресветлый светильник святости явился еси, вся притекающия к тебе просвещаяй.
Благочестнаго жития наставниче, радуйся, тобою бо житие исправляюще, угождати Господу научаемся.
Слава: О согрешении своем велие покаяние принесши, мир душевный обрел еси, спасению многих добре потрудився.
И ныне: Богородице Марие, Неисусомужная Мати, молися прилежно о спасении нашем Рождшемуся из Тебе.

 

Песнь 3

Ирмос: Ты еси утверждение притекающих к Тебе, Господи, Ты еси свет омраченных и поет Тя дух мой.
Мирскаго жития прелести отбегше, уединеннаго жития ревнитель показался еси, в молитве непрестанно пребывающе.
Ангели дивятся предивному житию твоему, отче наш Димитрие, человецы же память твою ныне чтуще, похвальныя песни ти приносят.
Слава: Воин Христов добропобедный, на брань со духи нечистыми неустрашимо подвигнулся еси, отче Димитрие, радуйся, от Господа бо тебе победа даровася.
И ныне: Во объятиях Своих носивше Создателя мира, Мати Божия, ширшая небес показалася еси, необъемлемаго объемлюще.
 

Седален, глас 4

Сердцем своим горе возвысився, восстания плоти, мира и диавола преславно сокрушил еси, праведне Димитрие. О погибающих же душах болезнуя, сладостию медоточных уст своих горесть греха на сладость покаяния преложил еси, ко спасению усердно наставляюще, сего ради чтим тя, преславне.
 

Слава, и ныне, Богородичен:

От враг видимых и невидимых покровом Твоим, Богородице, покрываемии, прославляем матернюю любовь Твою и вопием усердно: радуйся, спасение душ наших.
 

Крестобогородичен:

Пресвятая Дево, кто достойно возможет изрещи скорбь велию Твою, егда видела распинаема Сына и Бога Своего, Его же моли прилежно о спасении нашем.

 

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.
Преподобных последователю, радуйся Димитрие, яко постом и молитвою лукаваго далече от себе отгнал еси, козни его яко паучину растерзающе.
Смирение зело возлюбивше, о своем недостоинстве всегда помышлял еси, ныне же на небесех и от земных достойно прославляешися, Димитрие преславне.
Слава: Слезныя токи, яко питие имеюще, душу словесами божественными напитал еси, ныне же лицезрением Сладчайшаго Иисуса наслаждаяся, молишися о помиловании нашем.
И ныне: Преблагословенная Владычице, радуйся, Тобою бо весь род человеческий спасеся и глава древняго змия сотреся преславным Рождеством Твоим.

 

Песнь 5

Ирмос: Утренююще вопием Ти: Господи, спаси ны: Ты бо еси Бог наш, разве Тебе иного не вемы.
Земли Луганския похвало и веси Осиновския украшение, радуйся, отче праведне, яко верных сердца радости исполняеши и вечнаго блаженства искати наставляеши, моляся о спасении нашем.
Лучами благодатныя помощи озари души наша, грехми помрачении, да тобою укрепляеми, путем тесным спасительным неослабно шествовати будем.
Слава: Аще и в волнах житейскаго моря на всяк день потопляеми есьмы, в тебе, отче Димитрие, тихое пристанище спасения обретаем, руку помощи от тебе приемлюще.
И ныне: Всемилостивая Заступнице, Мати Всепетая, подаждь от Бога спасение нам грешным, купно со праведным Димитрием о нас Того моля.
 

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся яко Иона: от тли Боже возведи мя.
Сребролюбия отбегающе, нищету в сокровище вменял еси, образ верным показующе, да нетленное богатство искати будут.
Слышавше о твоем предивном житии, отче Димитрие, боголюбивии людие умиляхуся сердцем, любовию ко Христу пламенеюще.
Слава: Усердию ко храму Божию люди научающе, образ верным явился еси, службы церковныя неустанно посещающе. тем же и нас, во тьму лености погруженных,сия богоугодныя ревности исполни.
И ныне: Радуйся, прибежище верным; радуйся, скорящих Радосте; радуйся Матернее попечение о нас всегда имущая, яко и по Успении Своем нас не оставляеши.
 

Кондак, глас 3

Светло празднуя, ликовствует земля Луганская,/ покровом молитв твоих от бед покрывемая./ Преславне угодниче Димитрие,/ праведным житием Церковь Христову украсил еси,/ мощи же святыя нам на утешение оставив,/ токи благодати от них неоскудно источаеши,/ болящия скоро исцеляеши,/ всем чтущим тя скорую помощь даруеши,/ да прославляется Имя Христово во веки.
 

Икос

Талант ти Господом дарованный преумножив, подвиги своими яко сокровищем украсился еси, плодами же духовными изобилуя, алчущия спасения добре напитал еси, сердца их любовию ко Христу исполняюще. Сего ради похвальныя песни тебе приносяще, радостно вопием: Радуйся, Димитрие, наставниче наш и покровителю.

 

Песнь 7

Ирмос: От Иудеи дошедше отроцы в Вавилоне иногда, верою Троическою пламень пещный попраша, поюще: отцев Боже, благословен еси.
Святе Димитрие, радуйся, яко Царствия Небесного достигл еси, душею праведною воспаривше в горняя селения, идеже ныне пребывающе, не забуди любовию чтущия тя.
Егда прозрел свое скорое от земли отшествие, Таин Христовых причастился еси, душу со Христом соединивше, сего и нас, угодниче Божий, сподоби.
Слава: От враг видимых и невидимых огради нас, отче Димитрие, да непреткновенно шествуя ко спасению, вечнаго блаженства достигнути да сподобимся.
И ныне: Премилостивая Мати Божия, от греховныя язвы исцели ны недугующия, да здрави телом и душею, радости вечныя улучити сподобимся.

 

Песнь 8

Ирмос: Богоглаголивии отроцы в пещи, со огнм пламень попирающе пояху: благословите дела Господня Господа.
О страждуших от смертоносныя язвы милосердуя, скорую помощь даровал еси, сего ради тя, яко угодника Божия, прославляем.
Радости велия исполняяся, людие осиновстии благоговейно мощи твоя вземше, со свещами и пением ко храму принесоша, память твою усердно чтуще.
Слава: Яко светильник пресветлый, мощи своя святые верным даровал еси, мрак греховный от чтущих тя далече отгоняюще.
И ныне: Вода неисчерпаемая еси, Богородице, от скверны греховныя верныя омывающая, жаждущия же спасения напояющая благодатию Сына и Бога Своего.
 

Песнь 9

Ирмос: Устрашися всяк слух неизреченна Божия снисхождения, яко Вышний волею сниде даже и до плоти, от Девическаго чрева быв человек: темже Пречистую Богородицу вернии величаем.
Стрелами греховными души своя уязвленни имуще, к тебе прибегаем, отче Димитрие, яко да подаси исцеление нам, верою и любовию тя чтущим.
Столп праведности, Церковь Христову украшающий, явился еси, святе Димитрие, нас в вере укрепляюще, да мысленнаго фараона избегнути возможем.
Слава: Шипок благовонный райских обителей, радуйся, Димитрие, всем нам радость подающий, молитвами же своими пленения греховнаго нас избаляющий.
И ныне: Богородице Дево, избави от бед рабы Твоя, да уповающе на Тя не посрамимся.
 

Светилен.

Звезда пресветлая, Церковь Христову украшающая, явился еси, отче Димитрие, во мраце греховнем путь спасения нам указующе, сего ради чтим и воспеваем тя усердно.
 

Богородичен:

От икон Своих источаеши чудеса, Пресвятая Дево, нас в вере и любви Христовой укрепляюще; матернюю же любовь изливающе, да геены огненныя избегнем.

 

На хвалитех стихиры, глас 2

Помощниче скорый и недугов врачевателю, милости сокровищнице и в нуждах житейских изрядный споспешниче, Димитрие преблаженне, услыши ны, вопиющия ти, и от скорбей и болезней избавление нам даруй.(Дважды).
Храм священный Пресвятыя Троицы явился еси, отче Димитрие, в житии своем душу от вожделений греховных очистив и добродетельми многими украсив, благодатию же Святаго Духа освятился еси. Сего ради приими сия возносимыя тебе похвалы и очищение от скверны греховныя нам даруй.
Радости духовныя исполняемся, мощи твоя святыя лобызающе, от них же целебную силу приемлюще, молим тя, святе Димитрие, от недугов душевных и телесных исцеление нам даруй.
 

Слава, глас 6

Праведне отче Димитрие, в житии своем слезами многими грехи омыл еси, в сердце же память страстей Христовых всегда имеюще, плоть со страстьми и похотьми распял еси, крест тяжкий и многоскорбный терпеливно понесши, ныне же, предстоя престолу Царя Славы, славою небесною сияеши.
 

И ныне, Богородичен:

На небеса с плотию возшедше, на земли сущих не оставила еси, Богоизбранная Отроковице. Покровом же честным рабы Своя покрывающе и токи слез источающе, от бед и погибели вечныя избавление всем подаеши.
 

Крестобогородичен:

Пречистая Богородице, зряще Сына Своего на кресте повешена, горце плачуще глаголала еси: Боже и Сыне мой, како терпиши страсть поносную.
 

Молитва

О, преславный угодниче Христов, предивный затворниче и теплый молитвенниче, праведне отче Димитрие! Ныне предстоя Престолу Царя Славы и вечнаго блаженства со святыми наслаждаяйся, призри на ны недостойныя, к твоему отеческому заступлению с верою и любовию усердно прибегающия.
Покрый покровом молитв своих нас, в бедах, скорбех и болезнех сущих. Вемы бо вемы, угодниче Христов, яко достойная по делом нашим приемлем, ибо на всяк день прогневляем Создателя своего. Но веруем, яко много может молитва праведного, во благо споспешествуема. Сего ради, угодниче Христов, молим тя: испроси у Господа прощение многих согрешений наших, да избегнем мук вечных. Огради нас от враг видимых и невидимых и всякого зла. Исцели болезни наша и греховное помрачение ума просвети.
Таже ниспосли свое небесное благословение на богоугодныя дела наша, в нуждах житейских помози, в недоумениях вразуми. Подаждь благорастворение воздухов и изобилие плодов земных.
Молим тя, отче Димитрие, пролий теплую молитву о Благоверном Государе нашем Цесаревиче Георгие Михайловиче и от всякаго зла сохрани.
Защити Отечество наше и покаяние народу нашему во гресе клятвопреступления и отступства от веры Православныя у Господа испроси.
Предстательством твоим даруй нам мир, тишину, веры в сердцах укрепление и жития греховнаго исправление. Исходатайствуй чтущим тя вечное спасение, да избавившись огня вечнаго, купно со всеми угодившими Богу прославим Пресвятую Троицу, Отца и Сына и Святаго Духа, всегда, ныне и присно, и во веки веков. Аминь.