Акафист святому праведному Димитрию Горскому, Осиновскому затворнику.
Кондак 1
Избранному жилищу Пресвятыя Троицы, Духом Святым освященному, угоднику Христову и покаяния проповеднику, преславному Димитрию воспоим вернии, со умилением и любовию зовуще: Радуйся, Димитрие, милосердный помощниче всем жаждущим спасения.
Икос 1
Ангельское житие твое, отче Димитрие, воспевающе, прославляем подвиги твоя. Мирскаго бо жития греховнаго прелесть возненавидев, покаянием и молитвою горе возвысился еси, чистотою души своея блистающе. Сего ради вопием ти сицевая:
Радуйся, херувимския чистоты сияние;
радуйся, серафимския любви ко Творцу пламенение.
Радуйся, ангельских чинов радование;
радуйся, святых угодников Божиих похваление.
Радуйся, покаяния правило;
радуйся, богоугоднаго жития рачителю.
Радуйся, Димитрие, милосердный помощниче всем жаждущим спасения.
Кондак 2
Видяще себе в сети диавольския уловленна, в сокрушение велие о гресе своем пришел еси, отче Димитрие. Господу же на всяк день покаяние приносяще, горце со слезами воспевал еси: Аллилуиа
Икос 2
Разумев бурю помышлений, душу твою стужающих, богопросвещенный старец уповати на милосердие Божие тя наставляше. Мы же дивящеся твоему велию о гресе сокрушению, сице вопием:
Радуйся, добродетелей зерцало;
радуйся, покаянных слез фиале.
Радуйся, покаяние велие принесый;
радуйся, слезами душу свою омывый.
Радуйся, утех греховных отвративыйся;
радуйся, потопления греховнаго избавивыйся.
Радуйся, Димитрие, милосердный помощниче всем жаждущим спасения.
Кондак 3
Силы покаяния твоего не терпяще, демони злобнии восташа на тя, в тяжкий грех усечения десницы уловиша. Ты же, отче, свыше вразумление приявше, новаго покаяния подвиг понесл еси, поя: Аллилуиа
Икос 3
Имеяше велие рачение о спасении души своея, дом отеческий оставил еси, путем многоскорбным ко спасению шествуя. Вернии же зряще твое житие предивное, воспеша тебе тако:
Радуйся, земный странниче, небесного Отечества возжелевый;
радуйся, стопы своя в Горний Иерусалим направивый.
Радуйся, мир и вся яже в нем оставивый;
радуйся, нетленное богатство обретый.
Радуйся, предивный искателю спасения;
радуйся, преблагий любителю покаяния.
Радуйся, Димитрие, милосердный помощниче всем жаждущим спасения.
Кондак 4
Бурю смятения души своея покаянием и слезными молитвами в тишину и мир духовный претворив,благоотишныя пристани безстрастия достигл еси, умиленно воспевая Богу: Аллилуиа
Икос 4
Слышаще о дивном житии твоем, преблаженне отче, вернии зело дивящеся, яко древним отцем преподобным благий подражатель явился еси. Боголюбивии же людие тя похваляюще, воспеваху ти тако:
Радуйся, безмолвием уста своя украсивый;
радуйся, молитву Иисусову дыханием имевый.
Радуйся, постом душу усладивый;
радуйся, бдением лукавых духов поразивый.
Радуйся, милосердия Божия проповедниче;
радуйся, величия Богоматери воспевателю.
Радуйся, Димитрие, милосердный помощниче всем жаждущим спасения.
Кондак 5
Божественным светом озаренный, яко светильник пресветлый души верных благодатию озарил еси, мрака греховнаго избавляюще, да вси благодарне вопиют Богу: Аллилуиа
Икос 5
Видеша боголюбивии людие тя, умом в горняя воспаривша, глубину же сердец человеческих предивно прозревающаго, умиляхуся сердцем и воспеваху тебе тако:
Радуйся, ангеле земный;
радуйся, небесный человече.
Радуйся, умом высоту небесную созерцающий;
радуйся, глубину сердечную прозревающий.
Радуйся, книго богомудрых наставлений;
радуйся, хартие душеспасительных поучений.
Радуйся, Димитрие, милосердный помощниче всем жаждущим спасения.
Кондак 6
Проповедник благочестия и богоугоднаго жития явился еси, святе Димитрие, образ верным житием своим показующе, да тебе подражающе, наследят вечное спасение и воспоют в радости своему Творцу: Аллилуиа
Икос 6
Возсия в тебе новый подвижник Христов, святе Димитрие. В затворе бо неустанно подвизаяся и сокровенныя подвиги творяще, на высоту добродетелей возлетел еси. Сего ради тя похваляем сими словесы:
Радуйся, лучу пресветлый;
радуйся, столпе благочестия.
Радуйся, древо рая Иисусова;
радуйся, лозо винограда Христова.
Радуйся, яко нивочтоже себе вменил еси;
радуйся, яко сего ради Господь тя превознесе.
Радуйся, Димитрие, милосердный помощниче всем жаждущим спасения.
Кондак 7
Хотя Всевидец Господь прославити тя, преблаженне отче, дарова ти божественную благодать, да послужиши спасению ближних, смиренно вопиюще Христу Богу: Аллилуиа
Икос 7
Новый источник благодати в тебе явися, преславне Димитрие. Изсшохшия бо страстьми души оживил еси, помраченныя умы просветил еси, погибающия во гресех на путь спасения наставил еси. За сие вознесеся ти таковая похвала:
Радуйся, неисчерпаемый кладезю благодати;
радуйся, елею, исцеляющий греховныя раны.
Радуйся, мироварнице утешений духовных;
радуйся, нектаре, услаждающий скорбных.
Радуйся, учителю благочестия;
радуйся, обличителю нечестия.
Радуйся, Димитрие, милосердный помощниче всем жаждущим спасения.
Кондак 8
Странником себе на земли вменяюще, любостяжания и сребролюбия конечне отбегл еси. Богатство же вечных благ обрести желающе, день и нощь о спасении души велие попечение имел еси, вопия Господу: Аллилуиа
Икос 8
Весь добродетельми исполненный, ко исходу от земных себе преуготовил еси, душу зело смирением украсивше. Мы же к тебе прибегающе, вопием таковая:
Радуйся, наставниче словесных овец;
радуйся, просвещение помраченных сердец.
Радуйся, врачу благодатный;
радуйся, укрепителю малодушных.
Радуйся, научаяй покаяние приносити;
радуйся, обличаяй тайные грехи.
Радуйся, Димитрие, милосердный помощниче всем жаждущим спасения.
Кондак 9
Всякия козни бесовския доблественно побеждал еси, затворниче преславный. От Господа же силу благодатную приявше, дуси нечистии пламенем молитв своих попалил еси, вопия Богу: Аллилуиа
Икос 9
Ветия многовещании не возмогут изрещи вся твоя подвиги, яже в затворе понесл еси. Мы же недоумеюще, како возможно тя достойно вохвалити, вопием таковая:
Радуйся, воине Христов добропобедный;
радуйся, ратоборче неустрашимый.
Радуйся, его же дуси нечистии трепещут;
радуйся, его же молитвами козни бесовския попаляются.
Радуйся, страсти Христовы на сердце своем начертавый;
радуйся, о часе смертнем всегда помышлявый.
Радуйся, Димитрие, милосердный помощниче всем жаждущим спасения.
Кондак 10
Спасительный свой подвиг преславно совершивше, душею праведною в райския обители воспарил еси, идеже ныне со всеми святыми славословиши Пресвятую Троицу ангельскою песнию: Аллилуиа
Икос 10
Стена Необоримая верным и мира Заступница, Пресвятая Дева благоволи, да мощи твоя во храме пречестнаго Ея Успения почивати будут, от них же источаеши токи благодати всем с верою зовущим ти сице:
Радуйся, Руси Святой благоухание;
радуйся, страны Донбасския красото.
Радуйся, земли Луганския украшение;
радуйся, веси Осиновския покрове.
Радуйся, в мощах своих нам утешение даровавый;
радуйся, ими же изливаеши милости верным.
Радуйся, Димитрие, милосердный помощниче всем жаждущим спасения.
Кондак 11
Пение похвальное возносим ти, угодниче Христов Димитрие, воспоминающе чудное заступление твое, его же даровал еси людем осиновским, сии бо тобою от смертоносныя пагубы избавльшеся, прославиша Господа песнию: Аллилуиа
Икос 11
Светозарною звездою, мощами своими, ко храму Богоматерню шествуя, людем осиновским велию радость и утешение подал еси, они же тя прославляюще, воспевху сия:
Радуйся, стено, от бед защищающая ;
радуйся, врачебнице, смертоносныя язвы потребляющая.
Радуйся, милосердия глубино;
радуйся, утешения высото.
Радуйся, от видимых враг избавление;
радуйся, от стел бесовских крепкая защито.
Радуйся, Димитрие, милосердный помощниче всем жаждущим спасения.
Кондак 12
Благодать божественную испроси нам у Господа, праведне отче Димитрие, да последующе стопам твоим, покаяние ревностно о гресех своих приносити будем, поя верно Богу: Аллилуиа
Икос 12
Поюще твое богоугодное житие,отче Димитрие, восхваляем Господа,даровавшего тебе благодать Свою. Ты бо в брани духовней неускусен, древним отцем преподобным уподобился еси, мудростию духовною сияюще. Сие поминающе, тщимся звати сице:
Радуйся, любовию своею нас покрывающий;
радуйся, молитвами своими нам помогающий.
Радуйся, уклонятися от зла научаяй;
радуйся, прилеплятися спасительному наставляяй.
Радуйся, како вечных мук избегнути вразумляющий ;
радуйся, вечнаго спасения улучити сподобляющий.
Радуйся, Димитрие, милосердный помощниче всем жаждущим спасения.
Кондак 13
О, преславный угодниче Божий Димитрие, приими сие малое моление наше, в похвалу тебе возносимое, да твоими молитвами избегнем вечнаго мучения и сподобимся пети Царю Славы ангельскую песнь: Аллилуиа
(Этот кондак читается трижды, потом Икос 1 и Кондак 1)
Молитва
О, преславный угодниче Христов, предивный затворниче и теплый молитвенниче, праведне отче Димитрие! Ныне предстоя Престолу Царя Славы и вечнаго блаженства со святыми наслаждаяйся, призри на ны недостойныя, к твоему отеческому заступлению с верою и любовию усердно прибегающия.
Покрый покровом молитв своих нас, в бедах, скорбех и болезнех сущих. Вемы бо вемы, угодниче Христов, яко достойная по делом нашим приемлем, ибо на всяк день прогневляем Создателя своего. Но веруем, яко много может молитва праведного, во благо споспешествуема. Сего ради, угодниче Христов, молим тя: испроси у Господа прощение многих согрешений наших, да избегнем мук вечных. Огради нас от враг видимых и невидимых и всякого зла. Исцели болезни наша и греховное помрачение ума просвети.
Таже ниспосли свое небесное благословение на богоугодныя дела наша, в нуждах житейских помози, в недоумениях вразуми. Подаждь благорастворение воздухов и изобилие плодов земных.
Молим тя, отче Димитрие, пролий теплую молитву о Благоверном Государе нашем Цесаревиче Георгие Михайловиче и от всякаго зла сохрани.
Защити Отечество наше и покаяние народу нашему во гресе клятвопреступления и отступства от веры Православныя у Господа испроси.
Предстательством твоим даруй нам мир, тишину, веры в сердцах укрепление и жития греховнаго исправление. Исходатайствуй чтущим тя вечное спасение, да избавльшися огня вечнаго, купно со всеми угодившими Богу прославим Пресвятую Троицу, Отца и Сына и Святаго Духа, всегда, ныне и присно, и во веки веков. Аминь.
Тропарь, глас 4
Пустыннаго жития ревнитель явился еси,/ затворническаго жития подвиг добре понесши,/ от Господа же благодатныя дары прияв,/ спасения многих благий виновник показался еси,/ праведне отче Димитрие,/ моли Христа Бога/ спастися душам нашим.
Кондак, глас 3
Светло празднуя, ликовствует земля Луганская,/ покровом молитв твоих от бед покрываемая./ Преславне угодниче Димитрие,/ праведным житием Церковь Христову украсил еси,/ мощи же святыя нам на утешение оставив,/ токи благодати от них неоскудно источаеши,/ болящия скоро исцеляеши,/ всем чтущим тя скорую помощь даруеши,/ да прославляется Имя Христово во веки.
Величание
Величаем тя, святый праведный отче Димитрие, и чтим святую память Твою, ты бо молиши о нас Христа Бога нашего.