Служба преподобной и богоносной матери нашей Параскеве Старобельской, Лисичанской чудотворице.

На велицей вечерни
На Господи воззвах
Стихиры, глас 5
Подобен: «Радуйся Живоносный Кресте».

Преподобная мати наша Параскево,/ великой угодницей Христовой явилася еси,/ чистотою души на высоту небесную возлетевше,/ смирением, яко лучами солнечными блистающе/ Жениху своему и Богу/ себе в жертву непорочную принесла еси,/ ангельским нравом души украсившись,/ девства благоуханием,/ любви ко Творцу пламенением,/ в вере непоколебимым стоянием/ и многими добродетельми яко солнце просияла еси.
Преподобная мати наша Параскево,/ издетска монашеское житие возлюбила еси,/ подвиги тайныя совершающе,/ постом плоть смиряюще,/ мира же лукаваго отвратившись,/ вся прелести греховныя попрала еси,/ гордости, яко огня избегающе,/ страсти душевнии искореняющее,/ сребролюбие, яко корень зла от себе отсекше,/ нестяжание же и чистоту возлюбив,/ монашескими подвигами яко солнце просияла еси.
Преподобная мати наша Параскево,/ юродства подвиг тяжкий понесла еси,/ себе безумной показующе,/ добродетели же своя сокрывающе,/ безумную мудрость века сего,/ блаженная мати, обличила еси,/ силу бесовскую разрушающе,/ дерзость нечистых молитвою попаляюще/ и вся сети лукаваго яко паучину растерзающе,/ таже многими иными подвиги/ яко солнце пресветлое просияла еси.

Ины стихиры, глас 2,
Подобен: «Егда от древа».

Егда призва тя Господь/ шествовати путем монашеского жития,/ мир и яже в нем/ оставила еси, преподобная мати./ Обители Скорбященския достигше,/ преподобную Ангелину умолила еси/ сопричислити тя ея богоизбранному стаду./ Ныне же с нею купно молися/ спасти и просветити души наша.
Егда узрела еси, блаженная мати,/ в обитель Скорбященскую/ преподобную Фаину грядущую,/ познала в ней великую угодницу Христову./ Сего ради под свое старческое руководство ю приявше,/ многими монашескими добродетельми,/ яко камением драгим, украсила еси./ Ныне же с нею купно молися/ спасти и просветити души наша.
Егда воста спира нечестивых/ на Церковь Христову,/ многия агницы обители Скорбященския/ мученичества и исповедничества подвиг понесоша./ Инех бо мучиша и убиша,/ нециих же живыми погребоша,/ таже многия темничное и лагерное заключение претерпеша./ Ныне же с ними, преподобная, предстояще Христу,/ молися спасти и просветити души наша.

Слава, глас 6.

Приспе днесь память твоего всечестного успения,/ преподобная мати Параскево./ Се бо в житии своем преславном,/ не имеюще где главы преклонити,/ странницею на земли явилася еси,/ безумною себе показующе/ и преславная чудеса совершающе./ Многия же погибающия души/ во едино стадо овец Христовых/ божественною благодатию собрала еси,/ в Горний же Иерусалим за собою приведши,/ причастники спасения вечного сих сотворила еси./ Ныне же предстоя Престолу Божию/ молися прилежно/ о нас, чтущих тя.

И ныне, глас той же.

Кто Тебе не ублажит, Пресвятая Дево; кто ли не воспоет Твоего пречистого Рождества; безлетно бо от Отца возсиявый Сын Единородный, Той же от Тебе Чистыя пройде, неизреченно воплощься, естеством Бог сый, и естеством быв человек нас ради, не во двою лицу разделяемый, но во двою естеству неслитно познаваемый. Того моли Чистая Всеблаженная, помиловатися душам нашим.

Чтения 3, преподобническая
На литии самогласны
Глас 1

Христа жениха возлюбивше,/ дом отеческий и родители своя/ спасения ради оставила еси./ Плотския страсти умерщвльщающе,/ горделивость ума смиряюще,/ послушанию же и молитве прилежаще,/ образ монашеского жития явила еси./ Сего ради тя похваляем,/ преподобная мати Параскево.
Ум свыше просвещен имуще,/ спасения ради многих потрудилася еси./ Медоточными усты своими/ богомудрыя словеса источающе/ и сокровенныя грехи обличающе,/ добродетельному житию и покаянию/ верныя наставила еси./ Сего ради тя похваляем,/ преподобная мати Параскево.

Слава и ныне, глас той же.

Любовию матернию вся объемлеши/ и честным покровом покрываеши,/ Пресвятая Дево, Мати Божия./ Аще бо Ты не предстояла Престолу Божию,/ тепле моляся Сыну и Богу Своему,/ да помилует люди согрешившия,/ праведный гнев Господень/ достойно постигл бы ны./ Темже воспевающе Твое неизреченное милосердие,/ вопием Ти:/ Радуйся, Благодатная, Крепкий Покрове и Заступление наше.

На стиховне стихиры
Глас 2.
Подобен: «Доме Евфрафов»:

Возсия во все концы/ слава подвигов и чудес твоих,/ славная мати Параскево./ Чтуще же память твою,/ похвальное пение усердно ти возносим.
Стих: Дивен Бог во святых Своих.
Приидите вернии,/ воспоем великую угодницу Христову,/ Старобельск подвигами озарившую,/ Лисичанск чудесы прославившую,/ Северодонецк же мощами своими зело возвеселившую.
Стих: Честна пред Господем смерть преподобных Его.
Чудотворицу предивную,/ подвижницу великославную,/ исповедницу Христову,/ преподобную матерь Параскеву/ восхваляют ангели и воспевают человецы.

Слава, глас и подобен той же.

Преславная мати Параскево/ всем прибегающим к тебе/ являеши скорую помощь и заступление/ сего ради тя восхваляюще,/ молим тя, не оставити нас.

И ныне, глас и подобен той же.

Всех Скорбящих Радосте/ явилася Мати Божия/ в бедах и скорбех посещающе,/ от враг видимых и невидимых защищающе,/ болящия исцеляюще/ и всех бедствующих в море житейстем/ в тихую пристань Своея матерния любви приемлющая.

Тропарь, глас 5

Яко к целебному источнику, притекаем к тебе, преподобная мати Параскево. Ты бо нас на путь спасения наставляеши, смирению, терпению и любви научаеши. Скорбныя сердца наша утешаеши, от враг видимых и невидимых избавляеши. Моли Господа и Заступницу Усердную, да помиловании будем в день судный.

На Утрени
На Бог Господь
Тропарь той же. По ī стихословии седален, глас 5

Яко воин добропобедный, на брань со духи злобы поднебесной мужественно ополчилася еси, великославная Параскево. Козни же диавольские разрушив, супостаты далече прогнала еси, победный венец от руки Господней приявше (дважды).

Слава, и ныне. Богородичен.

Во глубине зол пребывая и мраком греха погруженна, Благодать Твоя, Пречистая, конечно погибнути ми не дает, да покаяние принесши, спасение вечное улучити сподоблюся.

По īī стихословии седален, глас 4.

Девства чистотою благоухающе, добродетельми же многими себе украсив, в нетленный чертог восшла еси, мати Параскево, яко жертву непорочную Небесному Жениху себе принесши, Его же паче всего возлюбила еси (дважды).

Слава, и ныне. Богородичен.

Небесному Судии предстояще, Пресвятая Богородице, о нас, многогрешных моли, да помиловани будем в день судный.

По Хвалите имя Господне:
Припев:

Ублажаем тя преподобная мати наша Параскево и чтим святую память твою: наставнице монахов и собеседнице ангелов.

Псалом избранный: Терпя потерпех Господа
По полиелеи седален, глас 8

Безбожных шатания не убоялася еси, славная Параскево, мужественно веру Христову исповедуя, чудесами многими гонителей посрамила еси, дерзость тех низложивше (дважды).

Слава, и ныне, Богородичен.

Радуйся, Богоизбранная Отроковице; радуйся, Господня Агнице; радуйся, Порфиро Небесного Царя. Радуйся, Еюже вечныя смерти избавихомся; радуйся, Еюже двери Райстии нам отверзаются.

Степенна, 1 антифон 4 гласа

Прокимен: Дивен Бог во Святых Своих Бог Израилев.
Стих: В церквах благословите Бога, Господа от источник Израилевых.

По 50 – м псалме стихира глас 6

Невесто Христова,/ преподобных жития подражательнице,/ дивная подвижнице,/ чудотворице и молитвеннице,/ исповеднице и верных наставнице,/ мати Параскево./ Прилежно о нас молися,/ да последующе стопам твоим,/ Горняго Иерусалима достигнути сподобимся.

Канон, глас 8.

Егоже краестрочие:

Преподобная мати Параскево, молитвами своими нас ограждай.

Песнь 1

Ирмос: Колесницегонителя фараоня погрузи чудотворяй иногда Моисейский жезл, крестообразно поразив и разделив море, Израиля же беглеца, пешеходца спасе, песнь Богови воспевающе.
Припев: Преподобная мати наша Параскево моли Бога о нас.
Преподобную Параскеву достойно воспети сподоби, Господи, благодатию Своею мя озаривше, уста же похвальных словес исполняюще.
Родительских молитв плод богодарованный явилася, мати, от чрева матерня благодати Духа Святого исполнившися.
Егда узреша родители твоя благодать божественную на тебе почившую, умилишася сердцем, благодарение Господу возсылающе.
Преподобным подражати восхотевше, родители и сродницы оставила еси, в обитель Скорбященскую стопы своя направивше.
Слава: От мира лукавого, яко горлица от сетей, избегше, к стопам преподобной Ангелины припала еси, в обитель тя прияти умоляюще.
И ныне: Душевную скорбь родителей Твоих на радость рождением Твоим Господь преложи, Пречистая, веселием несказанным старость их озаривше.

Песнь 3

Ирмос: Небесного круга верхотворче, Господи,/ и Церкви Зиждителю,/ Ты мене утверди в любви Твоей,/ желаний краю, верных утверждение,/ Едине Человеколюбче.
Озаренный свыше ум имеюще, мати Ангелина в тебе сосуд благодати Святаго Духа узревше, с радостию словесным агницам обители своея сопричте тя.
Благодатные дары от всех сокрывающе, мнимое безумие на себе восприяла еси, поношения и посмеяния терпеливно претерпевше.
Невестой Христовой быти восхотевше, монашеское житие ревностно провождала еси, инокинь Скорбященския обители в благоговейное изумления приводяще.
Ангельским нравом душу свою украсивше, преподобная, наставницей монашеского жития явилася еси, духовных сестер от козней луковаго пречудно избавляюще.
Слава: Яко милосердная мати под духовный покров преподобную Фаину прияла еси, своею духовною дщерью ю сотворивше.
И ныне: Матерь Бога Вышняго в Тебе Захария узревше, во Святая Святых со страхом и благоговением введе Тя.

Седален, глас 4

Небесных обителей достигнути восхотевше, путь тесный и многоскорбный возлюбила еси, преподобная мати Параскево. Многия же за собою ко спасению приведше, наследниками блаженныя жизни содеяла еси, приснославная.

Слава и ныне. Богородичен.

Престолу Божию предстояще, Пречистая, со ангелы и святыми моли даровати нам грехов очищение и велию милость.

Крестобогородичен.

Распятому на кресте Сыну и Богу предстояще, со слезами горце вопияла еси: како Ты, Господи, волею распятие терпеши.

Песнь 4

Ирмос: Ты моя крепость, Господи,/ Ты моя и сила,/ Ты мой Бог, Ты мое радование,/ не оставль недра Отча/ и нашу нищету посетив./ Тем с пророком Аввакумом зову Ти:/ силе Твоей слава, Человеколюбче.
Адския злобы исполнении безбожницы святаго Владимира, митрополита Киевского, убиша. Ты же со блаженною Фаиною тело священномученика узревше, горькими слезами рыдала еси.
Твердо на камени веры Христовой стояще, купно с сестрами о Христе ты, мати Параскево, лесть обновленческую отвергла еси, отступничество их обличающе.
Изгонима бывше из обители своея, преподобная, лице свое слезами орошала еси «Прощай, мать – обитель святая», - вопиюще. Инокинь же, в скорби велией сущих, укрепляла еси за веру даже до смерти пострадати.
Поемше стадо свое духовное, в обители Раздабаровой вселилася еси, тамо живущих лучами благодати своея озаряюще.
Слава: Ангельское житие твое зряще, к тебе монашествующии и мирстии притекаху, богомудрых словес слышати ищуще.
И ныне: Радуйся, Благодатная, Господь с Тобою! Тако Тебе, Дево Святая, Гавриил возопи, Матерь Бога Вышняго Тя разумеюще.

Песнь 5

Ирмос: Вскую мя отринул еси/ от лица Твоего, Свете Незаходимый,/ и покрыла мя чуждая тьма, окаянного,/ но обрати мя и к свету заповедей Твоих,/ пути моя направи молюся.
Адскою злобою дышуще, безбожницы обитель Успенско – Серафимовскую закрывше, тя, купно со всеми о Христе сестрами, изгнаша. Ты же, мати Параскево, молитвою и богомудрыми словесы инокинь укрепляла еси путем многоскорбным ко спасению шествовати.
Странническое житие купно со чадами духовными провождающе, мати преподобная, искати горняго Отечества наставляла еси твоим наставлениям внемлющих.
К тебе, яко богомудрой наставнице, многия притекоша, указания пути ко спасению ищуще.
Евангельскими словесами душу напитавше, Параскева блаженная, нектаром медоточных устен своих горесть греха в душах услаждала еси, ко спасению тещи призывающе.
Слава: Врази веры Православныя сияние благодати твоея зряще, распыхахуся злобою, многажды тя в темницы ввергающе.
И ныне: О Рождестве Спасителя мира от Тебе, Пречистая, пастырие ангелами извещени бывше. Притекоша к пещере и Искупителя Своего на руцех Твоих зряще. Радуйся, селение Бога Вышняго, Тебе со умилением возопиша.

Песнь 6

Ирмос: Молитву пролию ко Господу/ и Тому возвещу печали моя,/ яко зол душа моя исполнися/ и живот мой аду приближися/ и молюся, яко Иона:/ от тли, Боже, возведи мя.
Многия чудеса совершающе, в вере Христовой люди укрепляла еси, безбожнаго гонения не боятися научающе.
О спасении людей попечение матернее имуще, мати Параскево, неустанно труждалася еси, молитву пламенную о всех Господу возносяще.
Лествица, на небеса возводящая, явилася еси, преподобная, многих к Горним Обителям приведши.
Имуще от Господа хранителя крепкаго, святаго великомученика Георгия, гонителей своих посрамляла еси, дерзость и силу тех в прах претворяюще.
Слава: Тщеславие и гордость от себе отгнавше, блаженная мати, себе нивочто же вменяла еси, смирению ревновати нас научающе.
И ныне: Во храм Иерусалимский Сына Своего на поклонение Господу купно со праведным Иосифом принесла еси, Богомати. Идеже праведный Симеон приявше на руце Своя Богомладенца, Его своим Владыкой именова.

Кондак, глас 2

Любовию к Небесному Жениху Христу уязвися, все житие Ему добре поработала еси. Многия подвиги и труды подъяв, велие стадо овец заблудших к Пастыреначальнику Христу привела еси. Юродством благодатныя дары в себе сокрывающе, безумную мудрость века сего обличила еси. Ныне же предстоя Престолу Божию, моли спастися душам нашим.

Икос:

Ангельскую чистоту твою похваляюще, преподобная, соплетаем ти венцы словесныя, вопиюще ти тако: радуйся, земный Херувиме; радуйся, огненный Серафиме; Радуйся, ангельских чинов сожительнице; Радуйся, бесплотное житие на земли пожившая; Радуйся, храме Пресвятыя Троицы; Радуйся, сосуде благодати Святаго Духа; Радуйся, ангела – Хранителя своего непрестанное радование; Радуйся, человеков утешение и отрадо; Радуйся, мати Параскево преславная.

Песнь 7

Ирмос: От Иудеи дошедше, отроцы/ в Вавилоне иногда/ верою Троическою пламень пещный попраша, поюще:/ отцев Боже, благословен еси.
Аще и в темницу многажды ввержена была еси, исповедница Христова, но ничтоже не возможе тебе от Небесного Жениха отлучити, Его же ради бо все радостно терпела еси.
Мучителей безбожных гонение терпяще, ссылки мужественно претерпела еси. От них же чудесно Победоносцем Георгием избавляема бывше, паки о спасении ближних попечение неустанное имела еси.
Изнемогающе телом, духом непрестанно бодрствовала еси, молитвами своими чада своя духовнии, далече от тебе сущая, от бед покрывающе.
С небесе от Господа пророческий дар имуще, грядущая яко настоящая, людем возвещала еси, все упование на Бога имети научающе.
Слава: Видяще прозорливо глубину сердец человеческих, тайныя грехи и беззакония обличала еси, верныя к покаянию наставляюще.
И ныне: Обрадованная преславным Воскресением Сына Твоего, все земное житие свое велие желание имела еси, Пречистая, паки со Христом неразлучно быти.

Песнь 8

Ирмос: Седмерицею пещь/ халдейский мучитель/ богочестивым отроком неистовно разжже,/ силою же лучшею спасены, сия видев,/ Творцу и Избавителю вопияше:/ отроцы благословите,/ священницы, воспойте,/ людие, превозносите во вся веки.
Источник благодати неоскудный явилася, мати Параскево премудрая, души грехами изсохшия оживляюще, из них же прозябоша добродетелей класы.
Матерь Божию моляше преподобная, да возмет душу ея в горняя обители, тяжестию грехов человеческих изнемогая.
Исцеления токи болящим источила еси, угоднице Христова прехвальная, от недугов телесных исцеляюще, помраченныя умом просвещающе и всякия болезни исцеляюще, да прославляется имя Христово, тебе ради, во веки.
Нас немощных посети, преподобная, да здравие душ и телес тобою улучивше, работати неленостно Господеви подвигнемся.
Аще и телом от нас разлучилася еси, мати Параскево, но душою праведною со чтущими тя пребывающе, от всякого зла их ограждай.
Слава: Слезныя токи землю окрест гроба твоего преизобильно орошаше. Мнозии бо чада твоя духовнии о своем сиротстве помышляюще, горце рыдаху, глаголя: «О, мати Параскево како без тебе на земли жити будем?! » Ты же им утешение ниспослала еси, от мощей чудеса и исцеления источающе.
И ныне: От земли на небеса к Сыну и Богу восшедше, Обрадованная, о роде человеческом болезновати не престала еси, по Успении своем без милости Своея его не оставивше.

Песнь 9

Ирмос: Ужасеся о сем небо/ и земли удивишася концы,/ яко Бог явися человеком плотски,/ и чрево Твое было пространнейшее небес./ Тем Тя, Богородицу, ангелов и человек чиноначалия величают.
Господу Богу со всеми святыми предстояще, непрестанно молитвы возносиши еси, да пробавит Он милость Свою нам, верою и любовию тя чтущим.
Радостию велией жителей Северодонецка озарила еси, мощи своя им на утешение даровавше.
Аще и душою на небеси пребываеши, града Лисичанска не забыла еси, от мощей токи благодатныя в нем источающе.
Житием своим во граде Старобельске просиявше, без милости своей сей не оставила еси, обитель Скорбященскую от разрушения молитвами своими сохранивше.
Демони от человеков далече отгоняеши еси, преподобная, от мощей своих незримо благодать источающе, силу же бесовскую в прах и пепел претворяюще, да прославляется тебе ради имя Христово во веки.
Слава: Ангелом Хранителем обители Скорбященския буди, мати Параскево, о ней купно со преподобною Фаиною теплыя молитвы возносяще.
И ныне: Имеюще в Тебе крепкую Заступницу, людие Цареградстии Покровом Твоим покрываеми, от нашествия врагов избавишися.

Светилен:

Светом чудес своих землю Луганскую озаривше, преподобная, новый светильник, Фаину предивную, нам явила еси. Да вси к заступлению вашему прибегающии, от бед и скорбей избавлени будут.

Слава: и ныне; Богородичен.

Свет Божества из чрева Твоего явися, Пречистая, имже род человеческий от тьмы вечныя избавися.

На хвалитех стихиры
Глас 8
Подобен: « О, преславнаго чудесе!»

О, преславнаго чудесе!/ Се бо над землею Луганскою/ восходит звезда боголепная,/ мрак неверия разгоняюще,/ веру в сердцах возжигающе,/ людем же ищущим спасения/ путь к вечному блаженству указующая./ Темже молим тя, Параскево преподобная,/ просвети умы и сердца наша.
О, преславнаго чудесе!/ Се бо во граде Лисичанске/ пристань спасительная пребывает,/ мощи твоя святыя./ Ими же буря греховная утишается,/ от бед и скорбей вернии избавляются,/ болящие же от недугов свобождаются./ Темже молим тя, Параскево преподобная,/ врачевание скорое нам ниспослати.
О, преславнаго чудесе!/ Се бо во граде Северодонецке/ чудо велие явися,/ мощи твоя святыя./ Ими же токи благодати источаеши,/ скорбныя души утешаеши,/ веру в сердцах укрепляеши,/ темже молим тя, Параскево преподобная,/ в нуждах житейских нам помощь даровати.

Слава, глас 6.

Днесь на небеси Престолу Божию/ предстоят новомучеников и исповедников собори,/ Царствении Великомученицы,/ святители и иереи,/ монаси и мирстии,/ с ними же и мати Параскева,/ усердныя молитвы возносяше/ о спасении народа нашего,/ да покаяние о богоотступстве принесше/ Прощение от Господа улучити сподобимся./ Темже молим тя усердно, преподобная,/ от бед избави чтущия тя.

И ныне, Богородичен
Глас той же.

Предстояще Праведному Судии,/ Преблагословенная Мати Божия,/ теплую молитву о нас всех сотвори,/ да помиловани от Господа будем/ и вечныя радости наследницы явимся.