Акафист преподобным Христа ради юродивой Ангелине и Екатерине Харьковским
Кондак 1
Избранную двоицу невест Христовых, преподобным житием своим Небесному Жениху угодившим и в последния сия времена дивнаго жития образ верным явившим, теплым молитвенницам и скорым помощницам воспоим вернии, тако им со умилением вопиюще: Радуйтеся, Ангелино и Екатерино, ко Господу и Пречистой о нас молитвенницы непрестании.
Икос 1
Ангели ли земнии наречем вас, преблаженнии, яко ангельскому житию подражали есте. Человецы ли небеснии, яко в Горних обителех пребываете есте. Мы же не могуще вас достойно прославити, токмо сице вопием:
Радуйтеся, Небесного Иерусалима предрагое украшение;
Радуйтеся, земли Харьковския благодатное освящение;
Радуйтеся, крылами чистоты на небесную высоту воспарившии;
Радуйтеся, смирения ради своего в райских обителях возвеличении;
Радуйтеся, небеснии светильницы, мрак греховный разгоняющии;
Радуйтеся, пламенем любви Христовой сердца возжигающии;
Радуйтеся, монашествующих в истиннем житии утверждение;
Радуйтеся, боголюбивых и смиренных душ благодатное укрепление;
Радуйтеся, старицы духоносные и смиренномудрии;
Радуйтеся, Ангелино и Екатерино, ко Господу и Пречистой, о нас молитвенницы непрестаннии.
Кондак 2
Видяще диавол доброту души твоея, мати Ангелино преславная, восхоте чародеицей некоей погубити тя. Сия бо дщерь диаволя помрачи ум твой и содела тя безумною, да не возможеши пети Богу: Аллилуиа.
Икос 2
Разум твой помраченный зряще, родительница твоя ужасеся зело. От земных же врачев помощи не обретшее, к святому великомученнику Пантелеимону со усердием притече. Мы же воспоминающе велия твоя страдания, сице тебе вопием:
Радуйся, девственной красоты образе;
Радуйся, христианских добродетелей зерцало;
Радуйся, голубице чистая и непорочная;
Радуйся, агнице незлобивая;
Радуйся, страдалице невинная;
Радуйся, мученице бескровная;
Радуйся, невеста Христова;
Радуйся, благочестивых родителей плод красный и богодарованный;
Радуйтеся, преподобнии матери, многия скорби и болезни понесши;
Радуйтеся, Ангелино и Екатерино, ко Господу и Пречистой о нас молитвенницы непрестаннии.
Кондак 3
Силою любви Христовой сердца своя купно связавше, крест тяжкий и многоскорбный терпеливно понесли есте, поя укрепляющему вас Господу: Аллилуиа.
Икос 3
Имуще богомудрых наставников стада Христова, в мире живуще, монашеское житие провождали есте, от ближних сие сокрывающе, сему дивящеся, тако вам вопием:
Радуйтеся, преблаженная двоице подвижниц Христовых;
Радуйтеся, подражательницы жития преподобных;
Радуйтеся, странницы земныя юдоли многоскорбныя;
Радуйтеся, отвергшие прелести жития греховнаго;
Радуйтеся, яко победили демонския полчища;
Радуйтеся, яко посрамили нечистых коварство;
Радуйтеся, книги одушевлении богомудрых учений;
Радуйтеся, сосуди Духа Святаго;
Радуйтеся, неизреченное благоухание преподобного жития;
Радуйтеся, Ангелино и Екатерино, ко Господу и Пречистой о нас молитвенницы непрестаннии.
Кондак 4
Буря мирския суеты и греховных вожделений не поколебала тя, мати Екатерино, в мире живущую. Светильник веры Христовой в сердце бо имеюще, заповеди Господни исполняла еси, поя: Аллилуиа.
Икос 4
Слышаще о предивней Ангелине, юродством высоту духовную сокрывающую, потщалася во всецелое послушание себе предати ей. Сие благое произволение похваляюще, тако тебе зовем:
Радуйся, дивное явление истинного послушания;
Радуйся, образе нестяжания;
Радуйся, служение миру, плоти и диаволу возненавидевшая;
Радуйся, гордость и самолюбие поправшая;
Радуйся, послушнице кроткая и смиренная;
Радуйся, реко благодати, тихая и светоносная;
Радуйся, шипок благовонный богоугоднаго жития;
Радуйся, сладкозвучная свирель богомудрых наставлений;
Радуйтеся, возлюбленнии чада Господни;
Радуйтеся, Ангелино и Екатерино, ко Господу и Пречистой о нас молитвенницы непрестаннии.
Кондак 5
Богоносных отцев и матерей нраву подражающе, непрестанную молитву Иисусову в себе, яко дыхание имели есте, смирением и чистотою сердец своих сияюще, Богу же непрестанно вопиюще: Аллилуиа.
Икос 5
Видяще божественную благодать от вас исходящую, ополчи диавол противу вас человецы, злобою, яко пламенем пылающие, от них же многия беды и скорби понесли есте. За сие же ныне слышите сия:
Радуйтеся, благодати вместилища;
Радуйтеся, храмы одушевленнии Пресвятыя Троицы;
Радуйтеся, пучиною злобы человеческия не потоплении;
Радуйтеся, клевету и поношение безропотно понесшии;
Радуйтеся, уничеженнии человеками на земли;
Радуйтеся, прославлении Богом на небеси;
Радуйтеся, посмеяние и хулу ни во что же вменившие;
Радуйтеся, обидевших вас конечно простившие;
Радуйтеся, Церкви Христовой столпы праведности непоколебимии;
Радуйтеся, Ангелино и Екатерино, ко Господу и Пречистой о нас молитвенницы непрестаннии.
Кондак 6
Проповедница любви к Богу и ближним явилася, о мати Ангелино преподобная, в житии своем Христовы заповеди исполняти нас поучала еси, образ сему собою являюще. Ныне же предстоя Престолу Божию вопиеши: Аллилуиа.
Икос 6
Возсия в тебе, мати, новая старица духоносная, о чадех духовных велие попечение имущая. Велие же сострадание к миру погибающему имея, день и нощь о помиловании всех молитвы возносила еси. От нас же приими похвалы сии:
Радуйся, старческия благодати наследница;
Радуйся, о спасении погибающих крепкая молитвенница;
Радуйся, Пресвятыя Богородицы неустанная прославительнице;
Радуйся, величия Небесныя Госпожи усердная воспевательнице;
Радуйся, созерцание таин духовных;
Радуйся, зрение глубин сердечных;
Радуйся, явлением всех Святых обрадованная;
Радуйся, Омофором Пречистыя огражденная;
Радуйтеся, ангельских чинов и святых соборов сожительницы;
Радуйтеся, Ангелино и Екатерино, ко Господу и Пречистой о нас молитвенницы непрестаннии.
Кондак 7
Хотяще спасения ближних, многия труды и подвиги, паче же молитвы деннонощныя в тайне совершали есте, матери преподобнии, погибающие души от погибели вечныя избавляюще. За сие благодаряще Господа, поем: Аллилуиа.
Икос 7
Новых небесных покровительниц, в вас, преподобнии, имеюще, от козней диавольских, болезней, скорбей и бед пречудно избавляемся есьмы. О сем вас тепле благодаряще, со умилением вопием:
Радуйтеся, радости духовныя подательницы;
Радуйтеся, о прощении согрешений наших теплии молитвенницы;
Радуйтеся, елеем молитв ваших исцеляющии струпы греховныя;
Радуйтеся, предстательством своим избавляющии муки вечныя;
Радуйтеся, телес наших здравие;
Радуйтеся, душ наших спасение;
Радуйтеся, изсушение слез горьких;
Радуйтеся, утешение скорбных;
Радуйтеся, матернее попечение о нас всегда являющии;
Радуйтеся, Ангелино и Екатерино, ко Господу и Пречистой о нас молитвенницы непрестаннии.
Кондак 8
Странствие земное скончавше, душею праведною в селения праведных воспарила еси, мати Екатерино пречестная, идеже купно со старицей и сестрой о Христе пребывающе, прославляете Творца всех песнию: Аллилуиа.
Икос 8
Все житие свое о угождении Господу попечение имеюще, о плоти своей небрегла еси, многообразно трудами и подвигами ю утесняюще. Душу же свою богоугодными делами и плодами духовными, яко многоценными сокровищами украсила еси, Небесному Жениху в жертву благоуханную принесши. За сие прими сия похвалы:
Радуйся, мудрости духовныя стамно златая;
Радуйся, избраннице Христова, праведная и святая;
Радуйся, древо рая Иисусова;
Радуйся, грозде лозы Христовой;
Радуйся, молчанием уста своя украсившая;
Радуйся, послушанием, яко венцем драгим, себе увенчавшая;
Радуйся, голубиная простото;
Радуйся, агничное незлобие;
Радуйтеся, кандила многосветлии у Престола Божия горящии;
Радуйтеся, Ангелино и Екатерино, ко Господу и Пречистой о нас молитвенницы непрестаннии.
Кондак 9
Всякия козни диавольския помощию Божией доблественно побеждали есте, преподобнии, Именем Иисусовым, яко копием крепким вооружившись, полцы нечистых духов вспять повергали есте, поя: Аллилуиа.
Икос 9
Ветия многоглаголивии не возмогут изрещи многия подвиги ваша духовнии, паче же брань невидимую со духи нечистыми, юже до кончины своея провождали есте. Мы же, Господом вразумляеми, приносим вам сии победные венцы:
Радуйтеся, воинства Христова адаманты безценнии;
Радуйтеся, ратоборцы неустрашимии;
Радуйтеся, молнии, чародейство попаляющии;
Радуйтеся, громи, враги устрашающи;
Радуйтеся, ревнительницы славы Божия;
Радуйтеся, заступницы гонимых и обидимых;
Радуйтеся, злобы и вражды угашение;
Радуйтеся, истины явление;
Радуйтеся, нелицеприятнии обличительницы беззаконий человеческих;
Радуйтеся, Ангелино и Екатерино, ко Господу и Пречистой о нас молитвенницы непрестаннии.
Кондак 10
Спасителя Бога всем сердцем своим возлюбивше, тяжкия муки телесныя терпеливно понесла еси, мати Ангелино преподобная. Ныне же победными венцами блистающе, радостно вопиеши со ангелы и святых соборами: Аллилуиа.
Икос 10
Стена несокрушимая, мира Владычица до кончины твоея праведныя укрепляше тя. Ты же, о мати преподобная, о чадех духовных болезнуя, покрову Пречистыя их предала еси. От них же ныне благодарне слышиши сия:
Радуйся, дерзновенная предстательнице у Престола Божия;
Радуйся, о нас непрестанно умоляющая Пречистую;
Радуйся, твердое прибежище верным;
Радуйся, пламеню, пожигающий врагов невидимых;
Радуйся, радосте наша;
Радуйся, по Бозе и Пречистой упование наше;
Радуйся, телесными страданьми убелившаяся;
Радуйся, душу праведную в руце Божии предавшая;
Радуйтеся, лице Господне непрестанно созерцающии;
Радуйтеся, Ангелино и Екатерино, ко Господу и Пречистой о нас молитвенницы непрестаннии.
Кондак 11
Пение похвальное вам с любовию совершающе, молим вас усердно, преподобнии, молитвами своими избавьте нас геены огненныя и сподобите купно с вами восхваляти Пресвятую Троицу песнию: Аллилуиа.
Икос 11
Светоноснии светильницы, мрак греховный разгоняющии, являетеся матери Ангелино и Екатерино, преблаженнии. Помощию же вашею о гресех своих покаяние приносяще и демонского помрачения избавляющеся, благодарне вам зовем сице:
Радуйтеся, спящия совести пробуждение;
Радуйтеся, окаменелых сердец умягчение;
Радуйтеся, трубы громогласнии, к покаянию призывающии;
Радуйтеся, милость Божию кающимся грешником испрошающии;
Радуйтеся, иноческих добродетелей насадительницы;
Радуйтеся, душевредных страстей искоренительницы;
Радуйтеся, сораспявшиеся Христу;
Радуйтеся, предстоящии Престолу Небесного Царя;
Радуйтеся, небесных обителей достойнии наследницы;
Радуйтеся, Ангелино и Екатерино, ко Господу и Пречистой о нас молитвенницы непрестаннии.
Кондак 12
Благодать данную вам от Господа ведуще, со усердием притекаем к вашему заступлению, преподобнии. Покровом молитв ваших оградите чада ваша духовнии, да прославляется непрестанно имя Божие песнию: Аллилуиа.
Икос 12
Поюще ваше богоугодное житие, матери преблаженнии, восхваляем пламенную любовь вашу ко Господу и ближним, во гресех погибающим. Поминаем подвиги и труды ваши сокровенно содеянныя, воспеваем терпение, смирение и милосердие ваше. Вы же, предстояще Небесному Жениху, поминайте нас, ныне тако вам вопиющих:
Радуйтеся, имиже вера в душах человеческих укрепляется;
Радуйтеся, имиже прелесть греховная сокрушается;
Радуйтеся, мудрым девам подражательницы;
Радуйтеся, милосердия и любви к ближним проповедницы;
Радуйтеся, блаженства с праведными достойнии;
Радуйтеся, лице Небесного Жениха созерцающии;
Радуйтеся, о нас, недостойных, не забывающии;
Радуйтеся, вопиющих к вам защищающии;
Радуйтеся, о нашем спасении непрестанно владыку и Пречистую умоляющи;
Радуйтеся, Ангелино и Екатерино, ко Господу и Пречистой о нас молитвенницы непрестаннии.
Кондак 13
О, предивнии угодницы Христовы, преподобнии матери наши Ангелино и Екатерино. Нынешнее сие молении приемше, ниспошлите чтущим вас небесное благословение и помощь, да избавимся мук вечных и сподобимся купно с вами вечно славословити Творца всех пением: Аллилуиа.
Молитва
О, преподобнии и богоноснии угодницы Христовы, Ангелино и Екатерино прехвальнии! Земли Харьковския прекрасное украшение, небесных обителей светозарнии бисеры, любви ко Христу и людем неизмеримая глубино, чудес и исцелений неоскуднии источницы, голубицы чистии и непорочнии, агницы кротции и смиреннии, небесные покровительницы сердобольнии и чадолюбивии, матери наши духовнии!
Услышите ныне наш вопль сердечный, от тины греховныя, от пучины скорбей и бед нами возносимый. Подвигнетеся своим обычным велиим милосердием, испросите нам у Господа и Пресвятой Владычицы Богородицы спасение душам нашим, здравие телесем и болезней скорое исцеление. Скорбей, бед и напастей избавление, от враг видимых и невидимых крепкое защищение.
О, Преблаженнии матери! Не оставьте нас, своих чад духовных, к вам с любовию и усердием притекающих. Споспешествуйте в благих делех и начинаниях наших. Оградите нас от падений греховных и утвердите шествовати путем заповедей Христовых. Возжгите сердца наша и всех людей православных пламенем Христовой любви. Да просвещаться светом невещественныя вашия благодати, достигнем Горняго Отечества, идеже с вами купно пребывающе, будем всегда прославляти преславное имя Пресвятыя Троицы, Отца и Сына и Святаго Духа, ныне и присно и во веки веков. Аминь.
Тропарь, глас 2
Мира лукаваго прелесть греховную отвергше, Небесному Жениху все житие в жертву принесли есте, ныне же предстоя Престолу Божию поминайте чтущих вас, Ангелино и Екатерино преподобнии.
Кондак глас 2
Любовию Христовою сияюще, верных сердца просветили есте, Ангелино и Екатерино преславнии, чуднаго жития образ верным явили есте, ныне же предстоя Христу Богу, молите спастися чтущим вас.
Ублажаем, вас, преподобнии матери наша Ангелино и Екатерино и чтим святую память вашу, вы бо молите о нас Христа Бога нашего.
