Служба преподобной и богоносной матери нашей Фаине, Старобельской чудотворице.

На велицей вечерни
На Господи воззвах: Стихиры, глас 5
Подобен: «Радуйся, Живоносный Кресте».

Преподобная мати Фаино,/ яко чистая агница/ в обитель Скорбященскую притекла еси,/ идеже тя славная Параскева/ в дщерь возлюбленную прият./ Ея же молитвами/ и богомудрыми наставленьми/ безбедно на высоту духовныя мудрости/ преславно возлетела еси,/ темже с нею купно молися/ спастися чтущим тя.
Преподобная мати Фаино,/ исповедница веры Христовой явилася еси,/ гонения от безбожных претерпевше,/ темничныя же заключения/ ссылки, глад и жажду/ Христа ради мужественно понесшее,/ непоколебимую любовь к Небесному Жениху/ явила еси./ Ныне же Ему предстоя,/ молися прилежно/ спастися чтущим тя.
Преподобная мати Фаино,/ пастырем Христовых овец явилася еси./ Духовныя сироты/ под покров благодати своея приявше,/ во едино стадо Христово собрала еси./ Любовию ко Творцу сердца их возжигающе,/ к покаянию и сокрушению о гресех призывающе,/ молитве и посту наставляюще,/ смирению и терпению научающе./ Ныне же во славе небесней пребывающе,/ молися спастися чтущим тя.

Ины стихиры, глас 2,
Подобен: «Егда от древа»:

Егда услышала еси/ словеса преподобныя Параскевы,/ яко Пречистая сопричте тя/ агницам обители Своея Скорбященския,/ всем сердцем своим девственным/ любовию к Жениху Христу возгорелася еси,/ угодной быти Ему восхотевше./ Темже молим тя прилежно/ просвети души наша.
Егда монашеское пострижение прияла еси,/ преподобная мати Фаино,/ воистину миру умерла еси,/ вся прелести века сего отвергше./ Плоть же свою/ постом и подвиги смиряюще,/ духови покорну сотворила еси./ Темже молим тя прилежно,/ просветити души наша.
Егда зрела еси/ погибающия во гресех человецы,/ себе никогдаже пощадив,/ на лютую брань со духи злобы поднебесныя/ за души, ими в погибель влекомыя,/ небоязненно вступала еси,/ узы греховныя растерзающе./ Темже молим тя прилежно,/ просвети души наша.

Слава, глас 6:

Днесь совершающе память твою,/ преподобная мати Фаино,/ восхваляем житие твое,/ в немже от юности своея/ работати Господеви навыкла еси./ Совершенную же любовь/ ко Христу показующе,/ дом родительский оставльше,/ в обители же Скорбященской водворившись/ и тамо добродетельно пожив,/ душу свою праведную/ в храм Духу Святому/ уготовала еси./ Ныне же молитвы своя теплыя/ Триипостасному Богу вознеси/ о всех с верою и любовию/ чтущих святую память твою.

И ныне, глас той же

Кто Тебе не ублажит, Пресвятая Дево; кто ли не воспоет Твоего пречистаго Рождества, безлетно бо от Отца возсиявый Сын Единородный, Той же от Тебе Чистыя, пройде, неизреченно воплощься, естеством Бог сый, и естеством быв человек нас ради, не во двою лицу разделяемый, но во двою естеству неслитно познаваемый. Того моли Чистая Всеблаженная, помиловатися душам нашим.

Чтение преподобническия три.
На литии самогласны 1

Благодатию божественною озаряема,/ яко луч спасительный/ во тьме греховней сущим явилася еси,/ преподобная мати Фаино,/ греха отбегати научающе,/ работати Господеви наставляюще./ О вечной же жизни помышляти/ и любовь к Богу и ближним имети/ верных наставляла еси.
Благодатию Духа Святаго орошенная,/ яко кладезь неизчерпаемый благодати/ жаждущим спасения явилася еси,/ преславная мати Фаино./ Огнь страстей греховных угашающе,/ добродетели в душах человеческих возращающе,/ утешение же духовное/ и токи благодати/ верным неоскудно источала еси.

Слава и ныне, глас той же.

Яко боготканную порфиру,/ человеческую плоть Сыну Божию/ от кровей Своих девственных/ непостижимо исткала еси/ Пресвятая Дево. Темже ныне ангелами прославляешися,/ святых соборами воспеваешися,/ от нас же земных превозносишися,/ яко Матерью Бога Вышняго/ быти сподобилася еси.

На стиховне стихиры глас 2.
Подобен: «Доме Евфрафов».

Днесь ликует обитель твоя,/ преподобная мати Фаино,/ память твою святую совершающе/ и славу подвигов и чудес воспевающе,/ ихже в житии преславно совершила еси.
Стих: Дивен Бог во святых Своих.
Монахов множество/ и верных людей собор/ прославляют днесь тя,/ преславная мати Фаино,/ тя бо молитвенницу пред Господом имеюще/ от бед и скорбей избавление приемлем.
Стих: Честна пред Господем смерть преподобных Его.
Путем спасительным шествующе,/ расточенные овцы стада Христова под покров свой собрала еси,/ мати Фаино, предивная./ За сие же ныне тя прославляюще,/ воспеваем матернюю любовь твою,/ юже в житии своем явила еси.

Слава, глас и подобен той же.

Преподобная мати Фаино,/ днесь предстоя Христу Богу,/ молися прилежно/ сохранити обитель твою / и спасти чтущия тя.

И ныне глас и подобен той же.

От праведныя Елисаветы/ целование приемше,/ Материю Бога Вышняго нареклася еси,/ Пречистая Дево./ Плод бо Божественный во чреве имуще,/ божественное Селение Христа Жизнодавца/ преславно показалася еси.

Тропарь глас 4

Града Старобельска светило преславное, за чистоту православия добрая воительница, исповедница и чудотворица, преподобная мати наша Фаино, днесь предстоя Престолу Божию, молися прилежно о нас, чтущих тя.

Ин Тропарь, глас 4.

От юности возлюбила еси Христа, преподобная мати, и Тому Единому в житии своем поработати восхотев, дом отеческий, жития ради иноческого оставила еси, подвиг же исповеднический достойно понесла еси. Духовной наставницей людям православным явилася еси, сего ради, почитающе память твою, вопием ти: Радуйся, Фаино, преподобная мати наша.

На Утрени
На Бог Господь Тропарь той же.
По ī стихословии седален глас 5.

Скорбящих и унылых утешающе, на Господа и Пречистую Богородицу все упование возлагати научала еси, преподобная мати Фаино. Чудесную же помощь верным подающе, в вере укрепляла еси, благодарити за все Господа научающе (Дважды).

Слава, и ныне, Богородичен.

Божественная Агница, Агнца Спаса Христа рождшая, неизчетное стадо чистых агниц, дев Святых в Царствие Небесное вводиши, образ девственнаго жития им показавше.

По īīстихословии седален
Глас 4

Чистотою души в горняя возлетевше, во гресех утопающих не оставила еси, мати преподобная. День бо и нощь в молитвах и трудех пребывающе, спасению многих послужила еси, ко вратом Царствия Небеснаго приведши (Дважды).

Слава, и ныне, Богородичен.

Творцу и Богу нашему в слезных молитвах о спасении всех предстояще, помяни нас окаянных, Владычице, радуйся Тебе на всяк день с любовию и верою приносящих.

По Хвалите имя Господне:
Припев:

Ублажаем тя преподобная мати наша Фаино и чтим святую память твою, наставнице монахов и собеседнице ангел

Псалом избранный:
Терпя потерпех…
По полиелеи седален, глас 8

Исповедницу Христову днесь воспоим вернии, та бо прещений безбожных гонителей не убоявшись, любовь ко Творцу мужественно показала еси, за Него даже до смерти пострадати возжелевше (Дважды).

Слава, и ныне, Богородичен.

Радуйся Двере непроходимая, Еюже нам Христос пройде. Радуйся, свеще божественная, Еюже возгореся Огнь Божества; радуйся, Престоле огнезрачный Небеснаго Царя; радуйся, Вместилище Невместимаго Бога; радуйся, Пресвятая Дево, Мати Божия.

Степенна, 1 антифон 4 гласа.

Прокимен: Дивен Бог во Святых Своих, Бог Израилев.
Стих: В церквах благословите Бога, Господа от источник Израилевых.

По 50 – м псалме стихира
Глас 6

Преподобная мати наша Фаино,/ ныне в горних селениях пребывающе/ со ангельскими лики/ и святых соборами/ молися прилежно Христу/ сохранитися граду твоему,/ обители же благочестием просияти/ и верныя люди/ от бед и напастей избавити.

Канон, глас 8

Егоже краестрочие:

Преподобная мати наша Фаино, любовию своею сердца просвети.

Песнь 1

Ирмос: Колесницегонителя фараона погрузи чудотворяй иногда Моисейский жезл, крестообразно поразив и разделив море, Израиля же беглеца, пешеходца спасе, песнь Богови воспевающе.
Припев: Преподобная мати наша Фаино моли Бога о нас.
Посли благодать Твою Господи, да достойно воспоем Твою агницу, юже в возлюбленную невесту Себе избрал еси.
Родительского благочестия райское прозябение явилася еси, чистотою жития своего процветше.
Егда узре тя преподобный Алексий Голосеевский, великой молитвенницей тя нарече, скорбный путь исповедничества ти предсказуя.
Преподобныя Параскевы Старобельския словеса услышавше, любовию ко иноческому житию, яко свеща пресветлая, возгорелася еси.
Слава: От мира лукаваго уходяще, вопль бесовский слышала еси, тя погибшей для греховного жития именующий.
И ныне: Дево Пресвятая, егда узрела еси первую икону, святым Лукой созданную, на ней же лик Твой и Богомладенца Христа написан бысть, образу сему, благодать Свою и Рождшагося от Тебе ниспослала еси, Пречистая Богомати.

Песнь 3

Ирмос: Небесного круга верхотворче Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.
О твоем богоизбранничестве предузнавше, блаженная Параскева у святых врат срете тя, под духовный покров свой приемлюще.
Блаженная Параскева о твоем прославлении в лице святых предсказа, рекше, яко акафистное пение люди приносити ти будут.
Нетленному Жениху обручити себе восхотевше, многоскорбное монашеское житие провождала еси, терпением небесныя венцы стяжевая.
Ангельским нравом украшаяся, смирением, кротостию, любовию и иными добродетельми, яко невеста Христова, одеялася еси, паче же девственной чистотою сияюще.
Слава: Яко звезда на тверди небесней, в обители Скорбященской благочестием возсияла еси, молитвами преподобныя Параскевы на высоту духовную возлетевше.
И ныне: Море не возможе потопити икону Твою, Владычице, юже горе Афонстей даровавше, ею обитель Иверскую, яко безценным сокровищем, украсила еси.

Седален, глас 4

Многоскорбным путем ко спасению шествуя, гонение же от безбожных доблественно терпяще, верою и любовию ко Христу, душу свою непоколебиму содеяла еси, преподобная мати Фаино. Темже ныне на небесех, яко верная раба Господня, венцами небесной славы увенчалася еси, приснославная.

Слава и ныне. Богородичен:

Господь и всея твари Создатель от Тебе неизреченно родивыйся, Благодатная, в храм яко человек осьмодневен принесен бысть, по закону Моисееву обрезатися изволивый.

Крестобогородичен:

Со креста снята Сына Своего и Бога, Пречистая плачуще зряще, Тело Его слезами омывала еси, Пречистыми же руками своими Его объемлюще.

Песнь 4

Ирмос: Ты моя крепость Господи, Ты моя и сила, Ты мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти: силе Твоей слава, Человеколюбче.
Аще и зрела еси сестры своя о Христе, от безбожников и обновленцев убиваемы и в землю живыми погребаемы, не убоялася мати Фаино прещений лютых, пострадати за верность Небесному Жениху желающе.
Токи слез горьких из очес своих источающе, оставила обитель Святую, безбожницы изгоняема, в вере же утверждение непоколебимое имуще.
Имуще наставницу себе богомудрую, преподобную Параскеву, от сетей вражиих избавилася еси, ея богодухновенным словесем внемлюще.
Новое пристанище в обители Раздобаровой обретше, добродетельное житие в ней явила еси, святостию своею сияюще.
Слава: Аще и телом на земли житие провождала еси, преподобная, но душею миру мертвою явилася еси, прелестей его конечно отвратившися.
И ныне: Шатания междоусобныя не терпяще, от образа, стрелою пронзенного и слезы точащего, помощь Свою, Пречистая Богомати новоградцам даровала еси, от врагов пречудно избавивше.

Песнь 5

Ирмос: Вскую мя отринул еси от лица Твоего, Свете Незаходимый, и покрыла мя чуждая тьма, окаянного, но обрати мя и к свету заповедей Твоих пути моя направи молюся.
Ангельского жития инокинь Успенско – Серафимовской обители не терпяще, безбожницы изгнаша тя, преподобная мати, купно с блаженною Параскевою и сестрами о Христе, веру вашу восхотевше поколебати.
Фаино, мати преподобная, кто возможет изрещи скорбь твою, безбожными гонимую и немилосердными человеками поношаемую.
Аще и терпела гонения мати преподобная, но все терпеливно понесла еси, о вечной жизни всегда помышляюще.
Истинныя веры поборница явилася еси, обновленческое нечестие обличивше, даже до смерти пострадати желающе, Фаино преподобная.
Слава: Непоколебимый столп Церкви Православныя явилася еси, преподобная, темничная заключения и ссылки мужественно претерпевше, дерзость же гонителей своих посрамивше.
И ныне: О новопросвещенных чадах Церкви Христовой промышляюще, дивную икону Свою во граде Казани явила еси, Владычице, ею многажды Отечество наше от врагов избавляюще.

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися и молюся, яко Иона: от тли, Боже, возведи мя.
Любовию ко Господу и ближним пламенеюще, хлад греховный в сердцах человеческих изгоняла еси, благодатию божественною их согревающе.
Юродством своим добродетельное житие от человеков сокрывающе, суетныя славы избегала еси, единыя славы на небесех возжелевше.
Благодатными дарованиями изобилующе, человецы в вере укрепляла еси, житие богоугодное провождати призывающе.
О чадех духовных всегда болезнуя, молитвою своею их пречудно сохраняла еси, от бед и падений греховных избавляюще.
Слава: Велие дерзновение пред Господом имеюще, молитвою своею дожди благоплодныя на землю низвождала еси, о скорбех человеческих печалуя.
И ныне: Источник воды целебныя от стопы Своея извела еси Пречистая, гору Почаевскую славною обителью украсивше, икону же Свою чудотворную зело прославивше.

Кондак, глас 3

Яко звезда пресветлая на мысленней тверди светящая, явилася еси, преподобная мати Фаино, нас грешных просвещающе, от скорбей и бед спасающе, и от недуг исцеляюще. Темже убо вопием ти: не лиши твоего теплаго предстательства нас, ныне чтущих тя.

Ин Кондак, глас 8

Красоту мира лукаваго возненавидев, Жениху Христу от юности уневестилася еси. Многия благодатныя дары от Него прияв, страждущим помогала еси, Фаино преславная.

Икос

Восхвалим днесь, вернии, славную исповедницу Христову Фаину. Та бо многия гонения, темничныя заключения и ссылки претерпевше, непоколебима в любви ко Христу явилася еси, душу свою в жертву благоуханную принесши. Темже восхваляюще ю, тепле вопием: Радуйся, Фаино, невеста Христова преславная.

Песнь 7

Ирмос: От Иудеи дошедше, отроцы в Вавилоне иногда верою Тройческою пламень пещный попраша, поюще: отцев Боже, благословен еси.
Юдоль многоскорбную человеческую зряще, токи милосердия людем источила еси, горесть скорбей своею любовию услаждающе.
Святаго источника Киселевой балки благодать разумеюще, прибегати к нему усердно наставляла еси, место сие Вторым Иерусалимом именующе.
В небесах над Киселевой балкой, Пречистую Богородицу узрела еси, Покровом Своим место святое покрывающую и верныя от бед и напастей защищающую.
Освященная благодатию Духа Святаго, страх и трепет бесовом явилася еси, сих из страждущих человеков изгоняюще.
Слава: Елей благодатных исцелений верным неоскудно подавала еси, немощи человеческия исцеляюще. На одре же болезни лежащих пречудно здравыми воздвигала еси, да прославляется имя Христово во веки.
И ныне: Юродиваго Прокопия мольбам внемлющее, град Устюг, Владычице, сохранила еси, знамение милости от иконы Своея чудотворныя источивше.

Песнь 8

Ирмос: Седмерицею пещь халдейский мучитель богочестивым отроком неистовно разжже, силою же лучшею спасены, сия видев, Творцу и Избавителю вопияше: отроцы благословите, священницы, воспойте, людие, превозносите во вся веки.
Свое земное течение преславно совершивше, к исходу в жизнь вечную достойно себе приуготовила еси, угодной быти Небесному Жениху помышляюще.
Егда свое преставление скорое уразумела еси, преподобная, духовных чад мантией, яко крылами, покрыла еси, от козней диавольских их ограждающе.
Река благодатных дарований показалася еси, Фаино преславная, благодатию богомудрых словес своих души верных благоплодными сотворяюще.
Дивную кончину твою видяще, ближния твоя, преподобная, скорби велией исполнишася, в тебе милосердной матери лишившися.
Целование последнее дающе чада духовнии, тело твое и гроб слезами орошаше, о своем сиротстве горце рыдающе.
Слава: Аще и сокры земля тело твое, преподобная, но душею праведною чадам духовным незримо спребывала еси, от бед и врагов ограждающе, в недоумениях же скорое вразумление являюще.
И ныне: Прибегающе, Владычице, к Твоему чудотворному образу «Всех Скорбящих Радосте» именуемому, в скорбех скорое утешение приемлем, неоскудную помощь Твою, нам недостойным, зряще.

Песнь 9

Ирмос: Ужасеся о сем небо и земли удивишася концы, яко Бог явися человеком плотски, и чрево Твое бысть пространнейшее небес. Тем Тя, Богородицу, ангелов и человек чиноначалия величают.
Радость велию даровала верным преподобная, мощи своя, яко многоцелебный источник, в обители Скорбященской явивше.
О исцелении немощей к тебе молимся, преблаженная мати, ведуще твое матернее милосердие к нам недостойным.
Светильник, озараяяй сердца благодатию, возсия во граде Старобельске, люди от тьмы греховныя избавляюще.
Видяще многия чудеса исцеления тобою, мати Фаино, ныне совершаемыя, умиляемся сердцем, Вседержителя благодаряще, яко тобою нам радость и утешение даровася.
Елей милости своея источи нам, мати сердобольная, струпы греховныя исцеляюще, окаменелость же сердец наших умягчающе, да тобою исцеленнии, здравии душею и телом будем.
Слава: Твоя матерняя любовь нас объемлет, мати преподобная, врази далече отгоняющая, скорби же на радость претворяющая.
И ныне: Изнемогающия в скорбех человецы утешающе, явила пречудную икону Свою «Державную», верным знамение показующе, яко Царскую власть в Державе нашей в руце Свои прияла еси, мольбам Святых Царственных страстотерпцев внемлюще.

Светилен:

Светом чудес твоих озарила сердца верных, преподобная, в вере укрепление подающе. Ибо вси по Бозе и Пречистой к тебе прибегающии, скорую помощь в нуждах житейских обретают, пречудное исцеление приемлют и от козней диавольских избавляются.

Слава: и ныне: Богородичен.

Светом матерния любви озаряеши род человеческий Мати Божия, мрак греховный далече прогоняюще, да избавльшеся пленения бесовского, ко спасению неленостно шествовати будем.

На хвалитех стихиры
Глас 8. Подобен: « О преславного чудесе!»

О, преславнаго чудесе!/ Се бо во граде Старобельске/ пресветлая звезда явися,/ обитель Скорбященскую озаряющая,/ верных сердца возвеселяющая/ и человеков в вере укрепляющая/. Неоскудная бо матерняя любовь преподобныя/ вся приходящия к ней просвещает./ Темже молим тя, Фаино преблаженная,/ просвети благодатию души наша.
О, преславнаго чудесе!/ Се бо явися неизчерпаемый кладезь/ божественныя благодати,/ от него же пиющии/ просвещение ума приемлют,/ премудрости духовныя исполняются/ и всякия прелести бесовския свобождаются./ Темже молим тя, Фаино преподобная,/ ниспосли утешение душам нашим.
О, преславнаго чудесе! Се бо дерзновенная молитвенница/ предстоит Престолу Божию,/ о всех верных/ теплыя молитвы своя возносяще,/ да прощение согрешений приемше,/ милости Божией причастницы явимся./ Темже молим тя, мати Фаино,/ от муки вечныя избавити души наша.

Слава, глас 6.

Днесь на небеси Престолу Божию/ предстоит в великой небесной славе/ преподобная мати Фаина/ купно со преподобной Параскевой/ и всеми Богу угодившими/ агницами обители Скорбященской,/ молитвы своя многомощныя/ о спасении всего мира возносяше./ Град же свой и обитель Скорбященскую/ молитвами своими, яко покровом/ от бед и напастей сохраняюще/ и нас, чтущих ю,/ вечнаго спасения и радости нескончаемыя/ молитвами своими сподобляюще.

И ныне, Богородичен, глас той же.

Пресвятая Мати Божия,/ чистотою Херувимы превозшедшая/ и паче Серафим Богу ближайшая/ ибо от чрева Твоего Пречистаго Господь возсия./ Моли прилежно Сына Твоего,/ да оставление согрешений приимем/ и вечнаго блаженства насладимся.