Канон блаженному Макарию , Христа ради юродивому Новопсковскому и Марковскому чудотворцу

Глас 8

Песнь 1

Ирмос: Поим Господеви, проведшему люди Своя сквозе Чермное море, яко един славно прославися.

Припев: Блаженне отче Макарие, моли Бога о нас.

Покровитель и теплый молитвенник нам буди, отче Макарие, пучины же житейских треволнений избегнувше к тихому пристанищу, вечнаго спасения, помощию твоею, да сподобимся достигнути.

Егда в море житейском постигнут нас беды и напасти, не остави нас, скорый наш заступниче, молитвами своими тишину и отраду нам неоскудно подающе.

Слава: Ум грехами помраченный просвети и сердце благодатию озари, да последуем стопами твоими, угодниче Божий, заповеди Господни неленостно исполняюще.

И ныне: Молися, Девице, о рабех Твоих ко Благодателю, купно со блаженным Макарием и настави нас житие богоугодное проводити.

Песнь 3

Ирмос: Ты еси утверждение притекающих к Тебе , Господи, Ты еси свет омраченных, и поет Тя дух мой.

Вопием к тебе, блаженне Макарие, помощи твоея требующе, врази бо видимии и невидимии стужают ны.

Пламенем страстей опаляеми, молим тя, угодниче Божий, росою молитв своих души наша оживотвори, помышляти о горнем нас научающе.

Слава: Козни лукавых потреби, отче наш Макарие, стеною молитв своих от коварства духов нечистых нас сохраняюще.

И ныне: Исцели, Пречистая, немощи душ и телес наших, да благодарение Богу и Творцу нашему на всяк час возносити будем.

Седален, глас 2

От любве душевныя вопием ти, покровителю наш небесный, в скорбех и печалех подаждь ослабу и утешение и от враг, восстающих на ны, пречудное избавление.

Слава , и ныне : Богородичен

Богородице Дево, Всеблагая Заступнице наша, Владыку прилежно со блаженным Макарием моли да одесную престола Господня в день судный стояти будем.

Песнь 4

Ирмос: Услышах, Господи, смотрения Твоего таинство, разумех дела Твоя, и прославих Твое Божество.

Молим тя, блаженне отче, подати нам исцеление от недугов душевных и телесных, да прославим о тебе Творца и Бога нашего.

Спасение вечное нас сподоби улучити и райския обители наследовати, идеже блаженства, радости, и ликования праведных причастницы будем.

Слава: Скверных помышлений наитие потреби и греховныя язвы душ наших исцели, да в чистой совести молитвы своя Господу возносим.

И ныне: Покровом своим покрый нас, Всеблагая Богородице, да стрелы бесовския не прикоснутся душ наших.

Песнь 5

Ирмос: Утренююще вопием Ти: Господи, спаси ны; Ты бо еси Бог наш, разве тебе иного не вемы.

Слезы проливаем в молитвах к тебе, предстателю наш и молитвенниче, скорби бо и напасти окружиша ны.

Свете пресветлый, просвети тьму уныния, души наша мраком своим покрывшую и в бездну отчаяния нас влекущую.

Слава: Сон греховный тяготит сердца наша, Макарие прехвальный, ты же не остави нас погибающих, но к покаянию стопы наша направи.

И ныне: Всех скорбящих Радосте, услади горесть скорбей, сердцами нашими обладающую и радость духовную подаждь нам.

Песнь 6

Ирмос: Ризу мне подаждь светлу, одеяйся светом яко ризою, Многомилостиве Христе Боже наш.

Церковь Христову ересьми, расколами и отступствы стужаему огради молитвами своими, отче Макарие, и Ея врагов расточи, да посрамятся нечестивии и козни их да сокрушатся.

Престол Православных Царей на земле Русской, молитвами своими воздвигни, отче наш Макарие, Русь Святую погибшую оживляюще.

Слава: Веру в сердцах наших укрепи, упование на Промысл Божий утверди, да последуем стопами твоим, угодниче Божий, в делании заповедей Господних.

И ныне: Всеблагая Помощнице, купно со блаженным Макарием молися усердно Сыну Твоему и Богу нашему да утвердит Цесаревича нашего путем истинным шествовати.

Кондак, глас 7

Страждущим людем скорый помощник явился еси, святе Макарие, болезни человеческия пречудно исцеляюще, скорбныя и унылыя ободряще, верныя в Истинней вере укрепляюще и любити Творца своего научающе, бесовския же полчища молитвами попаливше, беззаконных дерзость посрамил еси, темже молим тя, праведниче, прилежно – защити от враг видимых и невидымых чтущия тя.

Икос

Уничиженныя души наша многими грехми, предстателю наш милосердный, благодатию очисти и наследовати блаженство вечное сподоби, рукописание же грехов наших потреби и мытарей немилосердных в посрамление приведи да купно с тобою будем вечно воспевати Пресвятую Троицу.

Песнь 7

Ирмос: От Иудеи дошедше отроцы, в Вавилоне иногда, верою Троическою пламень пещный попраша, поюще: отцев Боже, благословен еси.

Пастырей истинных укрепи, монашествующим споспешествуй и всем , труждающимся спасения ради ближних, свое отеческое благословение ниспосли, святе Макарие.

Воинам православным буди небесный покровитель, верным же во властех сущих подаждь во благих делах свое отеческое споспешение и от враг всех нас избави, Макарие блаженне.

Слава: Вдовиц защити и от падений сохрани, сиротам помози, недугующих исцели, заблудшия настави и во гресех сущих к покаянию призови, отче наш Макарие.

И ныне: Взыщи погибающия души, Владычице Пресвятая, да не порадуется враг о погибели нашей, но да наследим вечное спасение помощию твоею и молитвами угодника Божия Макария.

Песнь 8

Ирмос: Царя Небеснаго, Его же поют вои ангельстии, хвалите и превозносите во вся веки.

Девствующим буди стеною необоримою, от козней вражиих сохраняюще, да чистоту души и тела соблюсти возмогут.

Супругам же любовь и согласие ниспосли, отроки и отроковицы на путь благочестия настави, младенцы воспитай и всех нас мирному и богоугодному житию следовати сподоби

Слава: Путешествующим спутешествуй, в недоумениях вразуми, враждующуя умиротвори и всех требующих твоея помощи, отче Макарие скоро услыши и покровом молитв от зла огради.

И ныне: Смиривши спаси нас, высокомудрием и гордостию живущих и соделай нас сосудами благодати Духа Святаго, Препетая Владычице.

Песнь 9

Ирмос: Воистину Богородицу Тя исповедуем, спасеннии Тобою, Дево Чистая, с безплотными лики Тя величающе.

Отче Макарие предивный, во всех житейских нуждах нам помози, милосердию и любви к ближним нас научи и даруй нам имети сердце сокрушенное и смиренное, его же Бог не уничижит.

Скоропослушный помощниче, Макарие блаженне, буди нам крепкою стеною и защитою необоримою, от козней чародейских нас защищающе и погибельных сетей лукавого нас избавляюще.

Слава: Отпущение грехов испроси нам, Макарие премилосердне, геены огненныя и вечных мук избави и зрети лице Сладчайшего Господа Иисуса сподоби.

И ныне: Молитися Тебе не престанем и никогдаже не отступим от Тебе, Заступнице наша, Тя бо Едину Надежду имамы.

Молитва

О, преблаженный угодниче Христов Макарие. Вемы, яко воистину скоропослушный помощик и теплый молитвенник всем, прибегающим к тебе являешися. Сего ради припадаем к тебе усердно и просим: пролий теплую молитву о нас ко Господу и милость Божию нам испроси. Помози нам жити богоугодно, образ любви к ближним показующе. Освяти наша чувства и помышления, благослови благия желания и в добрих делех благословение даруй.
От сна нас восставших ко благу направи и от зла сохрани, день проводити благочестиво сподоби и в трудах житейских споспешествуй, ко сну грядущих о будущей жизни помышляти настави и покаяние приносити вразуми, спяща нас от демонских козней огради.
Молися прилежно о сродницех и благодетелех наших, ближним нашим путь спасения укажи и ко благу настави. Всем же чтущим святую память твою даруй мир, любовь, здравие, спасение и во всяком деле благом твое отеческое вспоможение.
Да тобою ограждаеми и наставляеми достигнем обителей райских, идеже воспрославим о тебе преславное Имя Пресвятыя Троицы, Отца и Сына и Святаго Духа. Аминь.