Акафист священноисповеднику Виталию, митрополиту Нью-Йоркскому, Первоиерарху Русской Православной Церкви.

Кондак 1

Возбранный пастырю Церкви Православныя, душу свою о спасении овец Христовых не пощадивый, любовию восхваляем тя отче наш Виталие и со умилением зовем ти : Радуйся, Виталие, о нас молитвенниче ко Христу дерзновенный.

Икос 1

Ангелов лики и святых соборы похваляют ревность твою по Бозе, юже явил еси, отче наш Виталие. Мы же на земли сущии, недоумеюще како тя возможем восхвалити достойно, токмо сице вопием:
Радуйся, ангелов сомолитвенниче;
радуйся, праведных сликовствователю;
Радуйся, горних обителей украшение;
радуйся, на земли сущих радование;
Радуйся, Церкви небесныя диадимо;
радуйся Церкви земныя непоколебимый столпе;
Радуйся, Виталие, о нас молитвенниче ко Христу дерзновенный.

Кондак 2

Видяще отступство архиеерев Церкви Русския в разсеянии сущей возгорелся еси ревностию по Бозе Вседержителе поя: Аллилуиа.

Икос 2

Разум от Господа просвещен имуще, нечестивых уста заградил еси, Святителю Виталие. Вернии же в тебе крепкое утверждение в вере Православной обретше, с веселием взываху ти сицевая:
Радуйся, свитче грозных обличений;
радуйся, книго одушевленная богомудрых наставлений;
Радуйся, апостольския проповеди благоухание;
радуйся, святительского жития сияние;
Радуйся, скорое устрашение нечестивых;
радуйся, тихая отрадо верных;
Радуйся, Виталие, о нас молитвенниче ко Христу дерзновенный.

Кондак 3

Силою любви Божественныя соедини расточенныя овцы Христовы, Виталие преславне, заблудшия просвети, падшия к покаянию подвигни, да вси купно возблагодарим о тебе Жизнодавца Христа поя Ему: Аллилуиа.

Икос 3

Имуще в тебе, святителю Виталие, теплаго ко Христу молитвенника, молим тя покрыти покровом молитв своих верныя чада Церкви Христовой, ныне возносящих тя песньми сицевыми:
Радуйся, свещниче пред Престолом Божиим горяй;
радуйся, выну лице Иисусово созерцаяй;
Радуйся, паству свою не оставивый;
радуйся, слезныя молитвы о ней возносящий;
Радуйся, благоухание молитв богоугодных;
радуйся, источниче благодати неоскудный;
Радуйся, Виталие, о нас молитвенниче ко Христу дерзновенный.

Кондак 4

Бури нападений на Церковь Христову, безбожными воздвигаемыя, потреби святителю Божий, да верныя люди в мире и тишине богоугодно поживут поя: Аллилуиа.

Икос 4

Слышаще о твоих , отче Виталие, трудех и подвизех неустанных, их же в житии своем явил еси, умиляемся сердцем и молим тя и нас в богоугоднем житии утвердити, да тако тебе зовем:
Радуйся, монашеских добродетелей рачителю;
радуйся, мир и вся яже в нем оставивый;
Радуйся, постом и молитвою утеснивый плоть свою;
радуйся, тесный и многоскорбный путь возлюбивый;
Радуйся, земных небесный покровителю;
радуйся, небесных обителей земный ангеле;
Радуйся, Виталие, о нас молитвенниче ко Христу дерзновенный.

Кондак 5

Богословием ум свой напитавый, земныя прелести нивочто же вменил еси, святителю Божий. Сего ради небесныя радости причастник ныне являешися, поя Христу Богу: Аллилуиа.

Икос 5

Видеша вернии страдания твоя, Виталие прехвальне, их же ради спасения верных понесл еси, умиляхуся сердцем и соплетаху ти словесныя венцы сия:
Радуйся, радости вечныя достойный;
радуйся, утешения горняго насладивыйся;
Радуйся, упокоивыйся в обителях праведных;
радуйся, похвало святителей Божиих;
Радуйся, просвещение земли Русския;
радуйся, столпе Церкви Христовой;
Радуйся, Виталие, о нас молитвенниче ко Христу дерзновенный.

Кондак 6

Проповедует мир весь, тебе святителю Виталие, скораго помощника и теплаго молитвенника, яко всяк притекаяй к тебе велию милость обретает и вопиет благодарне: Аллилуиа.

Икос 6

Возсиял еси, светом славы небесныя угодниче Божий, верным людем скорую помощь подавая. Сего ради земля Русская и вся верныя, в разсеянии сущии, тако тебе вопиют:
Радуйся, тихая отрадо;
радуйся, утешение скорбных душ;
Радуйся, скорбей утоление;
радуйся, от бед и врагов избавление;
Радуйся, крепкий покрове верным;
радуйся, защитниче вопиющим к тебе;
Радуйся, Виталие, о нас молитвенниче ко Христу дерзновенный.

Кондак 7

Хотяще епископы – отступницы крепость веры твоя поколебати, к безумным тя ввергоша, ты же смиренно гонение от лжебратий терпящее, молитву теплую ко Господу возносил еси, поя: Аллилуиа.

Икос 7

Новаго исповедника Христова, святителя Виталия, вернии возвеличим, яко нашего ради спасения тяжкий крест страдальческий понесл еси. Сего ради воспоем ему таковая:
Радуйся, нечестивых победителю;
радуйся, отступников обличителю;
Радуйся, унижением славу небесную обретый;
радуйся, клеветою ризы своя убеливый;
Радуйся, главо богомудрая;
радуйся, уста медоточная;
Радуйся, Виталие, о нас молитвенниче ко Христу дерзновенный.

Кондак 8

Странно бысть зрети верным, тя, Предстоятеля Церкви Христовой, нечестивими терзаема, унижения и бияния ради паствы своея терпяща. Мы же твоя страдания похваляюще о тебе поем Творцу: Аллилуиа.

Икос 8

Весь мир православный ужасеся, зряще унижение велие твое. Ты же клеветою, яко терновым венцем увенчанный, славно земное течение совершил еси, купно со святыми ныне веселяся, от нас же приими сия:
Радуйся, яко лукавый посрамлен отбеже;
радуйся, яко сонм отступников посрамися;
Радуйся, Григорию Богослову уподобление;
радуйся, страданий Иоанна Златоуста понесение;
Радуйся, оцтом и желчию клеветы напоенный;
радуйся, лжеепископами на кресте страданий распятый;
Радуйся, Виталие, о нас молитвенниче ко Христу дерзновенный.

Кондак 9

Всем чтущим тя, отче наш Виталие, ниспошли свое небесное благословение, да тобою укрепляеми и наставляеми наследим вси блаженство праведных поя Сладчайшему Иисусу: Аллилуиа.

Икос 9

Ветия суемудренныя нечестивии посрами святителю Божий, верныя люди в Православии укрепи, заблудшия овцы во едино стадо Христово соедини, да вси купно тебе славословим тако:
Радуйся, пастрырю наш добрый;
радуйся, оградо стада Христова;
Радуйся, помраченныя просвещаяй;
радуйся, заблудшия ко спасению направляяй;
Радуйся, лучу, мрак греховный разгоняяй;
радуйся, росо, зной страстей угашаяй;
Радуйся, Виталие, о нас молитвенниче ко Христу дерзновенный.

Кондак 10

Спасение исходатайствуй всем похваляющим страдания твоя, Виталие прехвальне, да покровом молитв твоих от враг видимых и невидимых ограждаеми, безпреткновенно поем Богу: Аллилуиа.

Икос 10

Стена крепкая и врагами неодоленная являешися ныне угодниче Божий, яко молитвами своими заблудшия на путь спасения возвращаеши и лукавство отступников обличаеши. Мы же твоих молитв о себе просяще тако тебе зовем:
Радуйся, путеводная звездо;
радуйся, жилище благодати Божией;
Радуйся, многоплодная лозо винограда Христова;
радуйся, рабе Господень благий и верный;
Радуйся, к покаянию призываяй;
радуйся, Истину являяй;
Радуйся, Виталие, о нас молитвенниче ко Христу дерзновенный.

Кондак 11

Пение Пресвятей Троице купно со святыми совершающее, нас земных не оставил еси, своим предстательством на путь спасения нас направляюще, да будем верно пети Богу: Аллилуиа.

Икос 11

Светозарный образ Богоматери, миро благоуханное источаюший, первым на руце свои от мученика Иосифа приял еси, святителю преблаженный. Мы же таковую милость Пречистыя к тебе похваляюще тако славословим;
Радуйся, покровом Пречистыя осененный;
радуйся, мироточением Ея образа обрадованный;
Радуйся, воспевателю Преблагословенныя Матери Божией;
радуйся, Ея милости нам просящий;
Радуйся, о Церкви Христовой Ю умоляющий;
радуйся, паству свою сохранити Богородицу просящий;
Радуйся, Виталие, о нас молитвениче ко Христу дерзновенный.

Кондак 12

Благодать Духа Святаго укрепи тя, святителю Виталие, егда соборище отступников покоритися им тебе понуждаху. Ты же их нечестие обличивше, верным путь спасительный указал еси, поя Христу: Аллилуиа.

Икос 12

Поюще тебе похвалы, угодниче Божий, молим Державу Русскую от нечестия и отступства свободити, да покаянием милость Божию обретше народ русский путем спасительным потечет, твою память чтуще тако:
Радуйся, со Царственными Великомучениками предстояй Престолу Божию;
радуйся, святителя Филарета достойный преемниче;
Радуйся, святителя Иоанна сомолитвенниче;
радуйся, со мучеником Иосифом о нас теплейший предстателю;
Радуйся, святителей Российских похвало;
радуйся, Исповедников Российских радование;
Радуйся, Виталие о нас молитвенниче ко Христу дерзновененый.

Кондак 13

О, преславный угодниче Божий святителю Виталие, нас, чтущих тя, от погибели вечныя сохрани и лику праведных сопричти, да вечно будем славословити Святую Троицу песнию: Аллилуиа.

Молитва

О, преславный святителю Христов Виталие. Днесь усердно возносяще тебе похвальная пения, сия мним яко твоя любы к нам не оскуде. В житии бо своем явил себе пастыря истиннаго, душу свою за паству свою положив. Сего ради припадем к тебе и молим помиловати чада свою духовныя и от сетей лукаваго сохранити. Пастырю наш добрый, верныя от погибели вечныя избави, Церковь Христову от волков душетленных огради, лукавыя козни отступников потреби. Отступства и расколы в Церкви утиши, епископы и священницы путем истинным шествовати укрепи. Воздвигни в земле Русской престол Православных Царей. Государю нашему Цесаревичу Георгию Михайловичу милость у Христа Бога испроси. Таже всем верным яви свою скорую помощь, болящия исцели, скорбящия утеши, бедствующим помози.
Молим тя, угодниче Божий, не остави нас погибнути в свирепых волнах греховных, но яви свое пастырское милосердие и путем спасительным шествовати нас настави, да угодивше Господу купно с тобою воспоем Святую Троицу Отца и Сына и Святаго Духа. Аминь.

Тропарь, глас 4

Правило веры и образ терпения, истинного пастыря яви тя стаду твоему, душу свою за паству положивша; сего ради венцами небесныя славы украсилси еси, отче священноначальниче Виталие, моли Христа Бога спастися душам нашим.

Кондак, глас 3

В Церкви Русстей священноисповедник показался еси: гонение от лжебратии претерпевше, исповеднический крест понесл еси и спасл еси верныя от отступства; сего ради ныне прославляешися, яко великий святитель Божиий.