Акафист преподобномученику Иоанну Босому Святогорскому, Христа ради юродивому.

Кондак 1

Избранный светильниче Донбасса и обители Святогорския предивное украшение, преподобномучениче Иоанне Босый, похвальная восписуем ти ныне. Ты же, яко имеяй велие дерзновение ко Господу, от враг видимых и невидимых избави всех нас, любовию тя ныне тако воспевающих: Радуйся, Иоанне Босый, от бед и напастей Донбасс и всех верных предивно избавляющий.

Икос 1

Ангелов лицы восевают на небеси твоих подвигов пречудное сияние, на земли же вернии похваляют твоих страданий неизреченное благоухание. Мы же ныне ко твоей милости прибегающе, яко победнии словеснии венцы тебе приносяще, со умилением глаголем сия похвалы:

Радуйся, незримое земли Донбасския забрало;

радуйся, святых отец Святогорския обители похвало.

Радуйся, венец победы на небеси носяй;

радуйся, на земли страждущих укрепляяй.

Радуйся, яко ангелов лицы тя воспевают;

радуйся, яко верных собори тя ублажают.

Радуйся, Иоанне Босый, от бед и напастей Донбасс и всех верных предивно избавляющий.

Кондак 2

Видяще Господь доброту души твоея, яко ангела земнаго верным тя дарова, да кровом крыл молитв своих от погибели вечныя избавиши всех верно зовущих Богу: Аллилуиа

Икос 2

Разум небесным светом имуще озаренный, в обитель Святогорскую, яко солнце пресветлое притекл еси, лучами святости тамо живущих озарюще. Сие воспоминающе, тако тебе зовем:

Радуйся, Святых Гор святое озарение;

радуйся, святогорских иноков утешение.

Радуйся, монашествующих наставляющий;

радуйся, подвизающихся ободряющий.

Радуйся, поста и молитвы благоухание;

радуйся, смирения и кротости сияние.

Радуйся, Иоанне Босый, от бед и напастей Донбасс и всех верных предивно избавляющий.

Кондак 3

Сила Вышняго укрепляше тя, преподобномучениче, егда безбожных гонение Церковь Христову восхоте поколебати. День и нощь верных в вере укрепляюще, воспевал Творцу Богу: Аллилуиа

Икос 3

Имуще тя, наставника добра и тепла молитвенника, вернии путем ко спасению добре шествующе, тако тебе воспеваху:

Радуйся, от юности Христа Бога возлюбивый;

радуйся, Творцу в жертву благоуханную себе принесый.

Радуйся, Пречистыя Богоматери молитвенниче теплейший;

радуйся, житию святых подражателю усерднейший.

Радуйся, боголюбивых пастырей наставниче;

радуйся, ревнителей благочестия покровителю.

Радуйся, Иоанне Босый, от бед и напастей Донбасс и всех верных предивно избавляющий.

Кондак 4

Буря безбожныя ярости огнем молитв твоих, праведниче, попаляшеся. Ты бо силою Господней бесовския козни и неистовства злых человек низлагающе, пел укрепляющему тя Богу: Аллилуиа

Икос 4

Силою Христовою облеченный, яко новый пророк отступников грозно обличал еси, святе Иоанне. Мы же дивящеся таковому твоему по Бозе ревнованию, воспеваем сии похвалы:

Радуйся, грозных пророчеств кимвале;

радуйся, бестрашных обличений громе.

Радуйся, спящие совести пробуждаяй;

радуйся, омраченныя умы просветляяй.

Радуйся, лжепастырей устрашение;

радуйся, оступников посрамление.

Радуйся, Иоанне Босый, от бед и напастей Донбасс и всех верных предивно избавляющий.

Кондак 5

Боготечней звезде, землю Донбасскую озараяющей, подобен явился еси, святе Иоанне. Мы же воспоминающе подвиги твоя преславныя, восхваляем Господа песнию: Аллилуиа

Икос 5

Видеша верных гонение велие от спиры безбожных терпящия, тепле ко Господу молился еси, да непоколебими в вере овцы Христовы пребудут. Мы же твоего молитвенного покрова стяжати хотяще, тако ти славословим:

Радуйся, милосердный споспешниче верных;

радуйся, присный молитвенниче о страждущих.

Радуйся, любовию Христовою нас напояющий;

радуйся, ближних любити наставляющий.

Радуйся, путь ко спасению указуяй;

радуйся, малодушие сердец потребляяй.

Радуйся, Иоанне Босый, от бед и напастей Донбасс и всех верных предивно избавляющий.

Кондак 6

Проповедник веры Христовой явился еси, мучениче Иоанне, людие светом истиннаго Православия озаряюще, да посрамлени будут гонителие безбожнии, не ведущие Богу пети: Аллилуиа

Икос 6

Возсияв на земли Донбасстей, яко солнце праведности пресветлое, лучами благодати божественныя сердца верных утешающе. Мы же тя, праведнаго, похваляем ныне тако:

Радуйся, благодати тезоименитый;

радуйся, праведниче духоносный.

Радуйся, реко благодати;

радуйся, кладенец премудрости.

Радуйся, укрепление верных;

радуйся, посрамление безбожных.

Радуйся, Иоанне Босый, от бед и напастей Донбасс и всех верных предивно избавляющий.

Кондак 7

Хотяще быти верный воин Христов, блаженне Иоанне, небоязненно богопротивных обличал еси, поя укрепляющему тя Христу: Аллилуиа

Икос 7

Новаго мученика Христова, тя святый Иоанне похвалюще, поминаем страдания твоя и любовь ко Творцу, ему же ныне предстояще, поминай в молитвах своих всех чтущих тя песньми сицевыми:

Радуйся, адаманте веры Христовой;

радуйся, незыблемое вещание Православия.

Радуйся, яко тобою сердца верных освящаются;

радуйся, яко тобою помраченныя умы просвещаются.

Радуйся, пище нетленная;

радуйся, питие неисчерпаемое.

Радуйся, Иоанне Босый, от бед и напастей Донбасс и всех верных предивно избавляющий.

Кондак 8

Странно верным бысть зрети, тя праведна, злейшим мукам от безбожных гонителей преданна. Ты же тепле ко Господу моляся, воспевал Богу хвалебную песнь: Аллилуиа

Икос 8

Весь, яко пламенем, любовию ко Христу объят бывый, в мучениях лютых душею светолепною, страданьми велиими, яко крылами в горния обители возлетел еси. Мы же память страданий твоих совершающе, тако вопием:

Радуйся, диадемо мученических ликов;

радуйся, шипок райских обителей.

Радуйся, землю Донбасскую кровию своею освятивый;

радуйся, мощами своими Донбасс облагоухавый.

Радуйся, дражайшее украшение града Бахмута;

радуйся, покровителю святогорских иноков.

Радуйся, Иоанне Босый, от бед и напастей Донбасс и всех верных предивно избавляющий.

Кондак 9

Всякия скорби и напасти, стужающия нас, потреби угодниче Христов Иоанне, да беспреткновенно будем Господу угождати и верно вопити Ему: Аллилуиа

Икос 9

Ветия многовещании не возмогут изрещи высоту святости твоея, мучениче Иоанне, мы же любовию чтуще тя, небеснаго покровителя нашего, сице вопием:

Радуйся, покрове любящих тя;

радуйся, забрало чтущим тя.

Радуйся, утешение в скорбех;

радуйся, отрадо сущих в печалех.

Радуйся, благодатная росо;

радуйся, животворный источниче.

Радуйся, Иоанне Босый, от бед и напастей Донбасс и всех верных предивно избавляющий.

Кондак 10

Спасение вечное хотяще обрести твоими молитвами, преславный Иоанне, память твоих страданий совершающе, благодарне о тебе вопием: Аллилуиа

Икос 10

Стена нерушимая от бед и врагов нас ограждающая, буди нам, угодниче Христов Иоанне. Мы же подражати тебе в любви ко Творцу и ближним хотяще, сице тебе вопием:

Радуйся, молитв неумолкающих о нас благоухание;

радуйся, благодатныя помощи сокровищнице.

Радуйся, златословесный наставниче добродетельных;

радуйся, смиренномудрый вразумителю заблудших.

Радуйся, яко пробуждаеши спящия совести;

радуйся, яко призываеши нас к покаянию.

Радуйся, Иоанне Босый, от бед и напастей Донбасс и всех верных предивно избавляющий.

Кондак 11

Пение молебное тебе, святый мучениче Иоанне, приносяще, милосердаго заступления от тебе прияти уповаем. Ты же на небесех предстоще, молися тепле о нас, верно вопиющих: Аллилуиа

Икос 11

Светозарную свещу Церкви Христовой, верным путь ко спасению озаряющую, мним тя быти, святе Иоанне. Ты же молитву богоугодную принеси о нас, чтущих тя хвалебно сицевыми словесы:

Радуйся, яко Церковь Христову украшаеши;

радуйся, яко землю Донбасскую защищаеши.

Радуйся, лика новомученическаго похвало;

радуйся, святых земли Русския радование.

Радуйся, воине Христов;

радуйся, наставниче иноков.

Радуйся, Иоанне Босый, от бед и напастей Донбасс и всех верных предивно избавляющий.

Кондак 12

Благодати источник в тебе ведуще, молим тя, мучениче Иоанне, просветити заблудших, спасти погибающих, да твоею помощию спасение улучивше, воспоют верно Творцу Богу: Аллилуиа

 Икос 12

Поюще твое праведное житие, угодниче Христов святый Иоанне, поминаем подвиги и труды твоя. Ты же любовию к верным сияющий, приведи ко спасению всех нас, чтущих тя похвалами сими:

Радуйся, святый Иоанне, помози чтущим тя;

радуйся, славный мучениче, защити хвалящия тя.

Радуйся, блаженне, просвети любящия тя;

радуйся, преподобне, настави воспевающия тя.

Радуйся, праведниче, молися о совершающих память твою;

радуйся, защитниче, от врагов избави вещающия страдания твоя.

Радуйся, Иоанне Босый, от бед и напастей Донбасс и всех верных предивно избавляющий.

Кондак 13

О, преславный мучениче Христов Иоанне, приими ныне моление сие наше и от всякаго зла избави нас, да беспреткновенно будем воспевати Пресвятую Троицу песнию: Аллилуиа, аллилуиа, аллилуиа

(Сей кондак глаголется трижды, послежде глаголем Икос 1 и Кондак 1)

 

Молитва

О, святый угодниче Божий, преславный мучениче Иоанне, призри с небесныя высоты на всех нас, любовию чтущих святую память твою. Твою бо любовь к верным проповедуют мнозии милости, от тебе, яко от богоблагодатного источника истекающия. Сего ради усердно к тебе прибегающе, молим всех нас избавити от врагов лютых, видимых и невидимых, нам зло и погибель хотящих совершити. Избави Церковь Христову от расколов, ересей и всех врагов Ея расточи.

Таже просим от тебе помощи в добрых делех и утешения в скорбех, да в житии своем будем добре угождати Господеви и неугодных Ему дел всегда твоею помощию будем избегати. Еще молимся прилежно о страждущей земли Донбасстей, да покрыеши ю покровом молитв своих от всякаго зла. Паче же молим тя сподобити нас вечнаго спасения, да по отшествии от земнаго жития одесную Престола Божия предстояти будем, воспевающе в Троице единаго Бога Отца и Сына и Святаго Духа ныне и присно, и во веки веков. Аминь.

 

Тропарь, глас 3

Да веселится земля Донбасская,/ молитвами твоими, святый мучениче Иоанне, ограждаема,/ да красуется обитель Святогорская,/твоими подвигами прославляемая,/ мы же, любовию совершающе память твою,/ тепле тебе вопием:/ радуйся, святый Иоанне, мучениче многострадальный.

Кондак, глас 3

В обители Святогорстей начало подвигов положивше,/ во граде Бахмуте на небеса мученическим подвигом восшел еси,/ на небеса же страданьми, яко крылома возлетевше,/от руки Господней победными венцами увенчался еси,/ мы же похвалюще житие твое преславное,/ любовию тебе вопием:/ радуйся, Иоанне, небесный покровителю наш преславный.