Канон святителю Иоанну Шанхайскому.

(глас 4)

Песнь 1

Ирмос: Моря чермную пучину, невлажными стопами, древний пешешествовав Израиль, крестообразныма Моисеовыма рукама, Амаликову силу в пустыни победил есть.

Припев: Святителю отче Иоанне, моли Бога о нас.

Благо есть воспевати угодники Божия, в ихже лице нам радостно светит святый Иоанн, утешая, врачуя его призывающия, научая нас образом многотруднаго жития своего ревновати о помощи в бедах сущим.

О желание сердца боголюбиваго! Возжелал еси еще в возрасте детищном быти истины поборником! Тако бо плениша тя повести о непощадивших жизни своя за правду Божию множествах дивных святых!

Привременно недоуменен был еси о еже воинский ли путь, или гражданский себе избрати, но зреяше в душе твоей крепчайшая мысль: всего себе предати на служение святей Христовей Церкви.

Богородичен: Величит душа Твоя, Владычице, Господа нашего и радуется дух Твой о Бозе Спасе и Сыне Твоем! И како смели бы мы воспевати песнь Твою, аще не благоволила бы Сама пророчески рещи, яко ублажат Тя вси роди.

Песнь 3

Ирмос: Веселится о Тебе Церковь Твоя, Христе, зовущи: Ты моя крепость, Господи, и прибежище, и утверждение.

С веселием совершающе память твою, архипастырю наш и наставниче, поклоняемся честным и нетленным мощем твоим.

Восприял еси святое пострижение, оболкся во всеоружие Божия, ополчився противу духов злобы поднебесных и побеждая их.

Не давал еси сна довольна очима твойма, не возлегл еси на одр, во еже почити: уподобился еси отцем древним, о подвижниче!

Богородичен: Богоизбранная Отроковице, приведенная в Храм Господень, воспитавшаяся во Храме во Святая Святых, истинно вышши еси всех, Дево чистая.

Песнь 4

Ирмос: Вознесена Тя видевши Церковь на кресте, Солнце праведное, ста в чине своем, достойно взывающи: слава силе Твоей, Господи.

Множества российских архипастырей наставник, яже в разсеянии Церкве начинатель, сам гора любве был еси: темже тя, святе Иоанне, собор верных чудом наших дней именова и в подвизех крепкостоятельна.

Аще хощете святаго жива видети, в град Битоль поспешайте, людие, зрите тамо отца Иоанна: тако сербский именитый архипастырь рече, нравом же и делы Иоанновыми восхищенный.

Юноши карпаторусстии, сербского богословия питомцы, о тебе с великим умилением повествоваху, о твоем к себе непощадении и к ним любви, еже како осенял еси их крестным знамением, ходя между спящими, покой их соблюдая.

Богородичен: Пречистая Мати Господа нашего и Дево, милующая и грешнейших рабов Своих, яко милосердия сокровищнице пребогатая, обнови нас, обнищавших безмерно, всех скорбящих Заступнице и Радосте!

Песнь 5

Ирмос: Ты, Господи мой, свет и мир пришел еси, свет святый, обращаяй из мрачна неведения верою воспевающия Тя.

Подражатель истинный Христов был еси, душу полагающий за паству свою, и предстал еси Пастыреначальнику непостыдно.

Исцелений дар дадеся ти еще в пресвитерстве, приумножил еси его и во дни святительства и усовершаеши в ином и вечном житии.

Преподобному Науму был еси содёйственник во исцелениих, со иконою его святою посещая домы человек страждущих.

Богородичен: Богородице Дево, вселенней Благая Помощнице, Целительнице душ и телес наших: услыши нас и в день сей молящихся Тебе.

Песнь 6

Ирмос: Возопи, прообразуя погребение тридневное, пророк Иона, в ките моляся: от тли избави мя, Иисусе, Царю сил.

Яви тя, святителю чудне, Владыка Христос Церкви Своея Святыя строителя

и учителя, даром утешений же и исцелений облагодатствованна.

Поспешал еси и в домы страждущих, и в палаты больничныя к недугующим, о нихже сказа ти Господь, яко пречистых Таин Его преподатель.

Ты младенцем ходатай цельбы их, святый Иоанне, явился еси, скорбь родительских душ пременяя на радость, и всем возрастом показался еси вожделенный помощник.

Богородичен: О тебе, Богородице Дево, святии вси радостне празднуют, и на Тя уповаем мы, раби Твои многогрешнии: веселися и радуйся, Мати Христа Вседержителя.

Кондак, глас 4

Сердце твое объемлет всех, любовию молящихтися, Иоанне святителю, и поминающих подвиг жития твоего: безболезненно же легкое преставление твое бысть, Одигитрии Пречистыя верный служителю.

Икос

Воистину таков архиерей, егоже мир весь недостоин обретеся, Церкве Православней подобаше: пламенен служитель Таин Божественных, благоговение имеяй, честно и непорочно Церковный уставы охраняяй: той бо пастырски сердца наша согреваше и в вере утверждаше, молитвою же своею росу утешений скорбным источаше и благочестию всех нас учаше, яко да и мы, немощны суще, сподобимся неразлучнаго с ним в Царствии Божии вселения.

Песнь 7

Ирмос: В пещи авраамстии отроцы персидстей любовию благочестия паче, нежели пламенем опаляеми, взываху: благословен еси в храме славы Твоея, Господи.

В леснинстем монастыре тя инокиня узре на воздусе над землею пламенне молящася пред иконою Богоматере Иверскою, от тебе зело возлюбленною, и пресветло блистающася нетварными лучами: таковыя святости высоте дивящеся, умильно Богу вопием: благословен еси в Церкви славы Твоея, Господи.

В шанхайстем храме дивное инокине Августе видение открыся: та бо виде огнь съ небесе во святую чашу снизходящий, святому Иоанну служащу: таковыя благодати явлению дивящеся, умильно Богу вопием: благословен еси в церкве славы Твоея, Господи.

В больнице бразильстей чудо преславное сотворися: пастырь добрый Иоанн знамение крестное сотвори и умирающей евреяныне гласом велиим рече: «Христос воскресе!» — и та абие от одра смертнаго воста, врачем дивящимся зело, и возопи: благословен еси в Церкви славы Твоея, Господи.

Богородичен: Покровом Твоим, от всех родов благословенная Владычице, Твоя рабы от бед и искушений со кровенны соблюди, и от ловлення мытарей воздушных в час истязания всех нас ненаветны покажи, да выну вопием Ти: благословенна Ты в женах, Избавителя душ наших рождшая.

Песнь 8

Ирмос: Руце распростер Даниил, львов зияния в рове затче, огненную же силу угасиша, добродетелию препоясавшеся, благочестия рачители отроцы взывающе: благословите вся дела Господня Господа.

Мелетию безсоннику духом горящим подражая, на ребра твоя никогдаже почил еси, труды трудом усердно прилагая: темже покоя неизглаголаннаго не лишился еси на небеси, и ныне сладость лицезрения Иисуса Сладчайшаго вечно вкушаеши.

Дара сподобился еси пророчества, чистоты ради целомудренныя твоея души и смирения ради великаго: многим во сне являлся еси, тех от смерти и напастей избавляя, нам же, праведный Иоанне, путь ко спасению верно показуя.

Церкве Вселенския служитель, апостол сих времен последних явился еси: темже и по смерти нетления благоуханием вселенней проповедуеши Православие.

Богородичен: Яже от земли до небес досязаше лествица небесная, по нейже Бог Слово к человеком сниде, благословенная Чистая несказанно чудо, недомысленно видение, спасай к Тебе прибегающия.

Песнь 9

Ирмос: Камень нерукосечный от несекомыя горы Тебе, Дево, краеугольный отсечеся, Христос, совокупивый разстоящаяся естества, тем веселящеся, Тя Богородице,величаем.

Молитвами твоими к Богу многих скорбящих слезы пресушил еси, и душам, любящим тя, радость вечную, Иоанне скоропослушниче, уготовляеши.

Новый Златоуст, Церкве Охридския ангел, Николаи сице о тебе глаголаше: внемлите, чадца, отцу Иоанну: той бо ангел Божий есть во одежде человека.

Мудрость мира сего безумство показуя, с детьми во храме играл еси, богослужению вышнему внимая, сим и нам являя, яко токмо младенчески смиренным и простым дано есть Царствие Небесное.

Богородичен: Света чертог, преблагословенная Дево, была еси вся озарившаго и светоносна угодника Своего показавшаго: и ныне, тму отъемлющи страстей, нас, Едина Приснодево, к Тебе притекающих, от мрака мук вечных избави.