Акафист священноисповеднику Никите, иерею Харьковскому.

 

Кондак 1

Избранный исповедниче Христов и молитвенниче о нас богоблагодатный, святый Никито, града Харькова украшение и верных небесный покровителю, похвальная восписуем ти. Ты же, яко имеяй велие дерзновение ко Господу от всех бед и скорбей избави ны, тако ти со умилением воспевающих: Радуйся, Никито, исповедниче Христов и всех верных прескорое утешение.

Икос 1

Ангелов Творец и всего мира Содетель избра тя, отче Никито, да будеши верный пастырь овец Христовых, ко спасение словесное стадо на всяк час направляюще. Мы же сему благоволению Божию к тебе дивящеся, тако ти воспеваем:

Радуйся, славы Пресвятыя Троицы воспевание;

радуйся, величия Творца неба и земли восхваление.

Радуйся, язвы Господа своего в уме содержавый;

радуйся, любовь Господню в сердце своем понесый.

Радуйся, Духа Святаго жилище преукрашенное;

радуйся, даров Святаго Духа сокровищнице.

Радуйся, Никито, исповедниче Христов и всех верных прескорое утешение.

Кондак 2

Видяще Господь доброту сердца твоего милосерднаго, отче преблаженный, содела тя пастыря истиннаго, ко спасению верных направляющего  и научающего в истине и смирении воспевати Богу: Аллилуиа

Икос 2

Разумев велию любовь к роду человеческому Пресвятыя Богородицы, на всяк день и час Богоблагодатней молился еси, отче наш Никито, о пастве своей богодарованней Ю умоляюще. За сие же ныне превозносим тя:

Радуйся, Богородицы Девы величие воспевавый;

радуйся, Небесныя Госпожи славу возвещавый.

Радуйся, икон Небесныя Владычицы теплейший чтителю;

радуйся, чудес Честнейшей Херувим непрестанный вещателю.

Радуйся, слезныя молитвы к Божией Матери на всяк день приносивый;

радуйся, хвалу Славнейшей без сравнения Серафим всегда возносивый.

Радуйся, Никито, исповедниче Христов и всех верных прескорое утешение.

Кондак 3

Силою любви Христовой сердце свое с паствою, Богом ти данною, связавый, отче наш Никито, ея ради себе никогдаже пощадити не восхотел еси, поя Творцу неба и земли: Аллилуиа

Икос 3

Имуще ум свой, Духом Святым просвещенный, праведне Никито, яко ангел Божий у святаго престола предстоял еси, благоуханныя молитвы своя, яко фимиам, Господеви возносще. Вернии же, чистоту сердца твоего зряще, тако ти воспеваху:

Радуйся, земный Херувиме, чистотою души сияяй;

радуйся, земный Серафиме, любовию Христовою пылаяяй.

Радуйся, Архангельския ревности по Бозе преемниче;

радуйся, Ангельского воспевания славы Господней подражателю.

Радуйся, яко бесплотен на земли поживый;

радуйся, ангеле земный, многия от погибели вечныя сохранивый.

Радуйся, Никито, исповедниче Христов и всех верных прескорое утешение.

Кондак 4

Буря безбожнаго гонения, спирою богопротивных на Церковь Христову воздвигнутая, не  устраши тя, исповедниче Никито. Ты бо за Господа пострадати желающе, непрестанно в сердце молился Ему, да укрепит тя, верно зовущаго на вск день: Аллилуиа

Икос 4

Слышаше твоих страданий за Церковь Христову величие, умиляемся сердцем и приносим ти, отче Никито, о твоих исповеднических подвигах сии словеснии похвальнии венцы:

Радуйся, новомучеников сомолитвенниче;

радуйся, исповедников сожителю.

Радуйся, в темничном заключении небесную славу обретый;

радуйся, в страданиях и лишениях блаженство вечное стяжавый.

Радуйся, алкавый и жаждавый Христа ради;

радуйся, за Церковь Христову пострадавый.

Радуйся, Никито, исповедниче Христов и всех верных прескорое утешение.

Кондак 5

Боготечной звезды во граде Харькове явления подобие бысть пришествие твое, отче Никито в богоспасаемый град сей. Вернии же в тебе истиннаго пастыря Христова познавше, прославляху о тебе Бога песнию: Аллилуиа

Икос 5

Видяще вернии твое, отче Никито, святолепное служение Господеви, умиляхуся сердцем, тебе подражати тщашеся. На всяк же день похвалюще твою ревность по Бозе Вседержителе песньми сицевыми:

Радуйся, пастырю богоблагодатный овец Христовых;

радуйся, священниче Бога Живаго.

Радуйся, благоуханная кадильнице молитв сокровенных;

радуйся, светозарная свеще богослужений тайных.

Радуйся, яко одеяние твое бысть чистота;

радуйся, яко в сердце твоем начертася имя Иисусово.

Радуйся, Никито, исповедниче Христов и всех верных прескорое утешение.

Кондак 6

Проповедник богоугодного жития иноческого, явился еси, исповедниче Христов Никито, окрест себе ревнителей делания монашеского собравше. Сие похвалюще, Господу поем песнь: Аллилуиа

Икос 6

Возсия подвигами иноческими и житием богоугодным сонм дев и вдовиц, за тобою ко Христу, праведне Никито, шествующе.  Мы же зряще твое о спасение верных тщание, тако вопием:

Радуйся, преподобных равностоятелю;

радуйся, древних подвижников ближний друже.

Радуйся, скрижале иноческих добродетелей;

радуйся, книго монашеских наставлений.

Радуйся, поста и молитвы правило;

радуйся, молитвы Иисусовой непрестанный делателю.

Радуйся, Никито, исповедниче Христов и всех верных прескорое утешение.

Кондак 7

Хотяще в тебе стяжати наставника и молитвенника теплейшаго, вернии к тебе, яко овцы сиротствующие притекаху, твоим богоугодным словесем внимающе и поюще во имилении сердец Богу: Аллилуиа

Икос 7

Нового небесного покровителя и заступника в тебе ведуще, архиереи и священницы православнии тебе хотяще подражати, твое небесное величие воспевают и славословят тя песньми сицевыми:

Радуйся, Никито, образе агнцев и пастырей;

радуйся, отче праведный, покровителю благочестия.

Радуйся, созерцаяй небесную красоту;

радуйся, предстояяй одесную престола Господня.

Радуйся, наставниче предобрый, во богоугоднем житии всех нас укрепи;

радуйся, тайнозрителю смиренный, сердца наша к горнему возвыси.

Радуйся, Никито, исповедниче Христов и всех верных прескорое утешение.

Кондак 8

Странник на земли бывше, к небесному отечеству бодре шествовал еси, отче наш Никито, за собою стадо Христово ведуще. Мы же любовию твоею облиставаеми, яко сироты на земли живуще, горце плачем, словесных овец расточение, таже и ко отступлению влекомых сия созерцающе. Темже просим тя, отче премилосердне, о них теплую молитву ко Господу вознести, Ему же лицы ангельстии непрестанно вопиют: Аллилуиа

Икос 8

Весь сонм чтителей твоих, отче наш Никито, твоих богоугодных подвигов высоту вещают, твое многоплодное житие прославлюще. Вернии же, иже иноческое житие провождати хотящии, тако ти вопиют:

Радуйся, Никито, похвало монашествующих;

радуйся, подвижниче, благодатное умиление иночествующих.

Радуйся, яко покровительствуеши девственное житие возлюбившим;

радуйся, яко помогаеши хотящим стяжати монашеския добродетели.

Радуйся, кроткий вразумителю, чистоту сердца сем нам даруй;

радуйся, отец чадолюбивый, вечное спасение наследовати нам помози.

Радуйся, Никито, исповедниче Христов и всех верных прескорое утешение.

Кондак 9

Всякия греховныя помыслы от себе далече отгнавше, умы чад своих духовных богоугодными помыслами и любовию Христовой озарял еси, отче преблаженне Никито. Сия же в вере истинней укрепляюще, да вси будут, яко единое стадо Христово, единомыслием и богоугождением связани суще, Богу на всяк день поюще: Аллилуиа

Икос 9

Ветия многоглаголивии не возмогут изрещи сокровищницу твоих добродетелей, праведне отче Никито. Вернии же твое смирение и кротость возносяще, умиляются сердцем и тако тебе вопиют:

Радуйся, Никито, зерцало добродетельного жития;

радуйся, угодниче Божий, покрывающий верных от бед.

Радуйся, заблудших ко спасению наставляяй;

радуйся, помраченныя умы просвещаяй.

Радуйся, милосердный врачу, болезни наша исцели;

радуйся, священниче богоугодный, ко спасению всех нас приведи.

Радуйся, Никито, исповедниче Христов и всех верных прескорое утешение.

Кондак 10

Спасти хотя своих чад духовных от словесных волков, в погибель души человечестии повергающия, богопросвещенными словесы на камени веры Христовой сердца верных утверждал еси, моляся о них тепле Богу, поюще хвалебную песнь: Аллилуиа

Икос 10

Стеною молитв своих верныя покрываеши, угодниче Христов Никито, от бед, скорбей и врагов пречудно их избавляюще. В супружестве же сущия, помощника скораго и тепла молитвенника в тебе обретше, хвалебно тя прославляху:

Радуйся, Никито, покровителю семейств благочестивых;

радуйся, защитниче чтущих память твою.

Радуйся, в супружестве сущих любовию связуяй;

радуйся, чада в благоразумии наставляяй.

Радуйся, страже неусыпный, врази невидимыя от всех нас отгони;

радуйся, щите крепкий, козни видимых врагов разруши.

Радуйся, Никито, исповедниче Христов и всех верных прескорое утешение.

Кондак 11

Пение хвалебное ти приносяще, молим тя, Никито преблаженне, вознести молитвы своя о Церкви Христовой, да потребятся ереси и расколы Ю стужающия. Мы же в вере и благочестии тобою укрепляеми, благодарне будем пети Богу: Аллилуиа

Икос 11

Светоприемный светильник молитв твоих умы и сердца верных озаряет, отче Никито, во мраце отступлений от веры Христовой, окружающия их. Тобою бо от пути погибельного пречудно избавлются и тако тебе, исповедниче Христов, благодарне вопиют:

Радуйся, Никито, путеводная звездо верным;

радуйся, лучу благодати Христовой.

Радуйся, твоими бо молитвами от лжепастырей избавляемся;

радуйся, твоим бо заступлением от врагов Церкви защищаемся.

Радуйся, воине Христов, расточенныя овцы Христовы воедино собери;

радуйся, поборниче правды, заблудшия пастыри к покаянию приведи.

Радуйся, Никито, исповедниче Христов и всех верных прескорое утешение.

Кондак 12

Благодать молитв твоих, отче наш Никито, землю Харьковскую и всех верных от бед и напастей покрывает. Мы же совершающе память твою преславную, поем о тебе Богу: Аллилуиа

Икос 12

Поюще твое праведное к Богу отшествие, поминаем болезни и труды твоя, отче наш Никито, чтим исповеднический подвиг твой и мысленно лобызаем узы твоя, яже ради Христа понесл еси. Ныне же от нас, чтущих любовию святую память твою, приими сия похвалы:

Радуйся, Никито, радование сердец наших;

радуйся, елею благодатный, греховныя раны врачующий.

Радуйся, яко тобою горькия слезы изсушаются;

радуйся, тобою бо скорби и напасти потребляются.

Радуйся, небесный покровителю наш, от вечных мучений всех нас исхити;

радуйся, скоропослушный предстателю наш, веселие вечное нам испроси.

Радуйся, Никито, исповедниче Христов и всех верных прескорое утешение.

Кондак 13

О, небесный наш покровителю, исповедниче Христов Никито, приими ныне малое моление наше, в похвалу тебе, от сердец наших возносимое. Ты же, яко имеяй дерзновение ко Господу, от вечныя погибели всех нас исхити, верно поющих Богу хвалебную песнь: Аллилуиа, аллилуиа, аллилуиа

(Сей кондак глаголется трижды, послежде глаголем Икос 1 и Кондак 1)

 

Молитва

О, святый исповедниче Христов и земли Харьковския небесный покровителю, отче Никито преславне, призри ныне с небесныя славы на всех чтущих святую память твою. Тебе бо нашего помощника и скорого заступника прославляюще, к покрову молитв твоих многомощных с любовию и усердием притекаем.

Вознеси многомощную молитву о Церкви Христовой. Верных чад Ея во едино богоспасаемое стадо соедини. Покрый покровом молитв своих всех верных, от тебе помощи и заступления просящих. Даруй архипастырям и пастырям православным ревность о спасении верных, монашествующих в смирении и богоугоднем житии укрепи, девствующим чистоту сохранити помози.

В супружестве сущих  любовию и единомыслием соедини, чада в послушании и благоразумии сохрани, неплодным, просящим у Бога чадорождение, своим предстательством утешение подаждь и молитвами своими многомощными просимое им даруй.

Во всех благих делех всем нам споспешествуй, истиною и правдою сердца укрепи. Болящия милостию своею посети и исцеление от недугов скоро подаждь, страждущим помози, в скорби сущих утеши. От враг видимых и невидимых всех нас огради, да последуем беспреткновенно путем заповедей Христовых и ко спасению стопы своя направим, твоими молитвами твоих укрепляяся, отче Никито премилосердный.

Таже просим испросити у Господа благорастворение воздухов и изобилие плодов земных. Еще молимся тебе, угодниче Христов, молитвами своими покрый землю Слободскую, в нейже преславно подвизался еси. Град Харьков и по вере живущих в нем от всякаго зла и бед сохрани. Еще молим тя, угодниче Христов, врагов наших к покаянию привести и на путь искупления злых дел и грехов направити.

О, наш небесный покровителю, отче Никито, не остави нас в пучине грехов и свирепых волн моря житейского потопляемых, но подаждь руку помощи и ко спасительному пути стопы наша направи. Да твоими молитвами достигнем вечнаго спасения, славяще Единаго в Троице Бога Отца и Сына и Святаго Духа. Аминь.

Тропарь, глас 3

Небесных селений красоту своими страданьми стяжавый,/ любовию к ближним просиял еси,/ сего ради Творец неба и земли,/ тя молитвенника и заступника верным дарова,/ да лучами скорыя помощи своея/ чтущих тя облиставаеши/и от бед и врагов их избавляеши,/ исповедниче Христов Никито преславный.

Кондак, глас 3

В земли Харьковстей яко светильник пресветлый просиял еси,/ сокровенное иерейское служение совершающе,/ монашествующих же добрый наставник показався,/ всех верных шествовати ко спасению наставил еси,/ безбожного гонения дерзость посрамляюще./ Ныне же предстоя престолу Божию, /молися о всех любовию чтущих тя,/ исповедниче Христов Никито преславный.