Акафист святителю Лазарю исповеднику, архиепископу Одесскому.

Кондак 1

Избранный исповедниче и изрядный угодниче Христов, верным людем источаяй миро утешения и любви божественныя неисчерпаемые токи. Восхваляем подвиги и труды твоя, спасения ради ближних подъятыя и с любовию зовем ти: Радуйся, святителю отче наш Лазаре, пастырю Церкви Христовой несокрушимый.

Икос 1

Ангела ли земнаго наречем тя, преблаженне святителю, яко ангельское житие явил еси. Небеснаго ли гражданина, яко в горних обителях ликуеши еси.
Мы же, не могуще восхвалити тя по достоянию, токмо с любовию зовем ти:
Радуйся, серафимскою любовию пламенеяй;
радуйся, херувимскою чистотою блистаяй;
Радуйся, ангельского нрава благоухание;
радуйся, собора святых радование;
Радуйся, предстояй престолу Пресвятыя Троицы;
радуйся, созерцаяй пресладкое лице Иисусово;
Радуйся, святителю отче наш Лазаре, пастырю Церкви Христовой несокрушимый.

Кондак 2

Видяще твою любовь ко Господу, юже во отрочестве явил еси, умиляемся сердцем и благодарне поем о тебе Богу: Аллилуиа

Икос 2

Разум от Господа просвещен имуще, любовию ко иноческому житию прилепился еси. От преподобнаго Феодосия же иноческий образ приявше, путем тесным и многоскорбным потекл еси. Сего ради восхваляем тя тако:
Радуйся, благочестиваго корене отрасль пречестная;
радуйся, любви Христовой стамно златая;
Радуйся, юношеския чистоты образе;
радуйся, иноческих добродетелей зерцало;
Радуйся, возлюбивый преподобных житие;
радуйся, унаследовавый святых нравы;
Радуйся, святителю отче наш Лазаре, пастырю Церкви Христовой несокрушимый.

Кондак 3

Сила любви ко Христу укрепляше тя, отче Лазаре, егда безбожницы мучениями поколебати веру твою в Бога восхотевше. Ты же, мужественно за Христа страдающе, воспевал Спасителю своему: Аллилуиа

Икос 3

Имуще крепкое упование на молитвы Пречистыя, Ея помощию мучения лютыя претерпел еси, исповедника Христова собою явивше. Сего ради соплетаем ти словесныя венцы сия:
Радуйся, мученикам Христовым подражаяй;
радуйся, исповедникам Христовым последуяй;
Радуйся, венцев небесных наследниче;
радуйся, блаженства праведных сопричастниче;
Радуйся, яко мучителей посрамил еси;
радуйся, яко страданьми убелился еси;
Радуйся, святителю отче наш Лазаре, пастырю Церкви Христовой несокрушимый.

Кондак 4

Бурю гонения безбожницы воздвигоша на тя, отче праведне, из обители Глинския тя изгнавше. Ты же на Господа, Промыслителя своего уповающе, день и нощь молился еси, да управит стопы твоя на путь спасения, поя Ему: Аллилуиа

Икос 4

Слышаще о твоих, отче Лазаре, трудех неустанных, их же явил еси, в послушании у пастырей и старцев катакомбных пребывающе, умиляемся сердцем и тако ти глаголем:
Радуйся, послушания глубино;
радуйся, смирения высото;
Радуйся, иноческих добродетелей сосуде златый;
радуйся, воли своея конечне отвергийся;
Радуйся, целомудрие облобызавый;
радуйся, чистоту в сердце вместивый;
Радуйся, святителю отче наш Лазаре, пастырю Церкви Христовой несокрушимый.

Кондак 5

Боготечная звезда явися ти святитель Леонтий, отеческое попечение о Катакомбной Церкви явивше. Ты же, святе, Бога за сию велию милость благодаряще, воспевал Ему в духовней радости: Аллилуиа

Икос 5

Виде Господь доброту души твоея, отче Лазаре, постави тя пастырем овец Своих, да ко спасению их направиши, сего ради славословим тя тако:
Радуйся, овча кроткое и богомудрое;
радуйся, путеводителю овец Христовых;
Радуйся, сиротства духовного пресечение;
радуйся, в унынии сущих утешение;
Радуйся, звездо, мрак скорбный озаряющая;
радуйся, свирель, плачущия увеселяющая;
Радуйся, святителю отче наш Лазаре, пастырю Церкви Христовой несокрушимый.

Кондак 6

Проповедует род христианский твоя труды неустанныя, святителю, их же понесл еси, да расточенныя овцы Христовы во едино стадо собереши и научиши шествовати путем спасительным, поя Христу Богу: Аллилуиа

Икос 6

Возсия в тебе, угодниче Божий, новый пастырь добрый, душу свою за овцы Христовы полагающий, от них же и от нас слышиши ныне песни сия:
Радуйся, сосуде благодати Божией;
радуйся, источниче духовныя сладости;
Радуйся, рабе Господень, благий;
радуйся, угодниче Христов, предобрый;
Радуйся, глашатаю, ко спасению призываяй;
радуйся, пастырю, волцы хищныя устрашаяй;
Радуйся, святителю отче наш Лазаре, пастырю Церкви Христовой несокрушимый.

Кондак 7

Хотяще в стране Донбасстей расточенныя овцы Христовы во едино стадо собрати, потекл еси, прилежно ища верныя, поюще Господу своему: Аллилуиа

Икос 7

Новый столп Церкви Православныя, землю Луганскую благодатию озаряющий, блаженный Макарий благословение свое ти даде о возрождении Церкви Православныя труждатися, да спасению многих послужиши. О сем Господа благодаряще возносим ти сия похвальныя словеса:
Радуйся, Луганскую землю святостию озаривый;
радуйся, в ней сокровище духовное обретый;
Радуйся, блаженным Макарием благословенный;
радуйся, его молитвами укрепленный;
Радуйся, путниче, в Горний Иерусалим текий;
радуйся, верныя ко спасению направивый;
Радуйся, святителю отче наш Лазаре, пастырю Церкви Христовой несокрушимый.

Кондак 8

Странник явился еси на земли, отче преблаженне, паству свою неустанно посещающе. Мы же, воспоминающее труды твоя велия, спасения ради верных подъятыя, восхваляем Господа, пречудно укреплявшего тя, поя Ему: Аллилуиа

Икос 8

Весь ум свой вперив в горняя, в дольних сущия овцы Христовы, гонимыя от безбожных, не оставил еси, отеческое попечение им являюще. Сего ради от них ныне возносится ти таковая похвала:
Радуйся, орле небесных обителей;
радуйся, верный рабе Небесного Домовладыки;
Радуйся, странниче, путем спасения ходяй;
радуйся, елею, душевныя недуги врачуяй;
Радуйся, таланты ти данныя преумноживый;
радуйся, стократный плод Господу принесый;
Радуйся, святителю отче наш Лазаре, пастырю Церкви Христовой несокрушимый.

Кондак 9

Всех благих Податель Господь чудо сотвори, отче наш Лазаре, егда во время гонения лютаго тайное поставление твое во епископа Церкви Катакомбныя совершися. Вернии же радовашеся неизреченно и прославляху за сие Творца всех песнию: Аллилуиа

Икос 9

Ветия многовещаннии не возмогут воспети достойно твоя добродетели, святителю Божий. Мы же похвалити тя дерзающе сице ти глаголем:
Радуйся, мироварнице дел благих;
радуйся , книго одушевленная добродетелей святых;
Радуйся, сострадания к ближним исполненный;
радуйся, милостию к кающимся одеянный;
Радуйся, божественныя мудрости уста медоточная;
радуйся, кладезю спасительных наставлений;
Радуйся, святителю отче наш Лазаре, пастырю Церкви Христовой несокрушимый.

Кондак 10

Спасти хотя паству свою от волков хищных, мужественно на защиту овец Христовых восстал еси, за сие многия гонения, клеветы и унижения претерпевше, непрестанно моляся, да укрепит Господь тя Своею благодатию, Ему же ангелов лицы поют непрестанно: Аллилуиа

Икос 10

Стена верным и столп Церкви Православныя еси, святителю отче наш Лазаре. Мы же житие твое многоскорбное поминающе, восхваляем любовь твою ко овцам Христовым, превозносим терпение и всепрощение твое, приносяще ти сицевая:
Радуйся, лживых устен заграждение;
радуйся, неправды обличение;
Радуйся, громе, устрашаяй врази;
радуйся, мечу, посецаяй козни вражии;
Радуйся, имже проречеся правда;
радуйся, имже явися истина;
Радуйся, святителю отче наш Лазаре, пастырю Церкви Христовой несокрушимый.

Кондак 11

Пение молебное пред иконою Иверскою совершающе, юже ти мученик Христов Иосиф посла, о Церкви Христовой и верных людех день и нощь Пречистой молился еси, да помилует Господь и не оставит без милости всех верно вопиющих Ему : Аллилуиа

Икос 11

Светозарная звезда, икона Иверская, велие утешение ти дарова, Лазаре многострадальный. Гонение, унижение и клевету мужественно терпяще величия Божией Матери усердный воспеватель явился еси. Сего ради тако тебе зовем:
Радуйся, Божией Матери служителю усердный;
радуйся, воспевателю славы Пречистой неустанный;
Радуйся, к Честнейшей херувим молитвенниче;
радуйся, Славнейшую серафим непрестанно воспевавый;
Радуйся, покровом Девы Марии осененный;
радуйся, пред Владычицей мира о нас молящийся;
Радуйся, святителю отче наш Лазаре, пастырю Церкви Христовой несокрушимый.

Кондак 12

Благодатию Божией ко исходу в горняя достигше, душу свою в руце Господни предал еси, святителю Христов, отче наш Лазаре, ныне же купно с соборами святых прославляеши Святую Троицу песнию: Аллилуиа

Икос 12

Поюще твоя добродетели, восхваляем любовь твою к верным, еюже и по успении своем озаряти нас не престаеши. Мы же в тебе скорого помощника и теплаго молитвенника обретше, поем похвальныя песни таковыя:
Радуйся, росо, пламень страстей угашаяй;
радуйся, в скорбех помощь подаваяй;
Радуйся , источающий целебныя токи;
радуйся, вразумляющий в недоумении сущих;
Радуйся, чудотворче предивный;
радуйся, молитвенниче о нас теплейший;
Радуйся, святителю отче наш Лазаре, пастырю Церкви Христовой несокрушимый.

Кондак 13

О, преславный святителю Христов, отче наш Лазаре, теплый о нас молитвенниче и в скорбех скорый помощниче, избавити нас вечных мучений Господа умоли, да сподобимся купно с тобою пети Богу: Аллилуиа, аллилуиа, аллилуиа

(Этот кондак читается трижды, после этого Икос 1 «Ангела ли …» и Кондак 1 «Избранный исповедниче…»)

Молитва

О пресветлый светильниче Церкви Христовой и о чтущих тя теплый молитвенниче, угодниче Христов и чудотворче отче наш Лазаре!
К тебе, яко к верному рабу Божию и усердному служителю Пречистой со усердием и любовию прибегающе прилежно молимся. Воздвигни нас от падения греховнаго и просвети помраченныя умы и сердца наша. Вемы святителю Божиий, яко недостойни твоего теплаго о нас ходатайства пред престолом Пресвятыя Троицы, но и вемы твою велию любовь к верным чадам Церкви Христовой. Сего ради возносим ти своя усердныя молитвы, да подаси нам в скорбех утешение, в болезнех телесных и душевных пречудное исцеление, во вражде сущим примирение.
Умоли Господа, преславный исповедниче Христов, да простит нам грех клятвопреступления нашего и восставит в стране нашей Престол Православных Царей. Покрый покровом молитв своих Государя нашего Цесаревича Георгия Михайловича и покори под нозе его всякаго врага и супостата. Буди Ему теплым молитвенником и крепким заступником во вся дни жития его.
Паче же просим тя, молитвенниче наш теплейшей, молися прилежно о Церкви Христовой, врагами стужаемой и разрушаемой, об овцах стада Христова, душепагубными волками растлеваемых и погубляемых. Пролий теплыя своя молитвы, да помиловании будем и узрим свет веры Христовой, землю нашу озаряющий, Церковь Христову из разрушения воздвигнутую и славою небесною сияющую.
Яви свое отеческое попечение верным, в разсеянии сущим и от бед, скорбей, напастей и всякого зла их сохрани. Любовию и пламенной верой паству Церкви Русския, в разсеянии сущую, соедини и вся разделения и отступства в Ней вскоре потреби.
Отче преблаженный, невинное гонение ради праведности своея понесый, прими нас, чтущих святую память твою, под крепкий покров свой, да постыдятся невидимыя и видимыя врази наши, погибели нашея ищущия. Да тобою озбавившеся вечного мучения достигнем вожделенных обителей небесных, идеже купно с тобою воспоем преславное имя Пресвятыя Троицы, Отца и Сына и Святаго Духа во веки веков. Аминь.

Величаем тя, святителю Христов отче наш Лазаре и чтим святую память твою, ты бо молиши о нас Христа Бога нашего.

Тропарь, глас 6

Славный святым отцем наледниче / душу свою за верныя положил еси/день и нощь о спасении паствы труждаяся/ путем ко спасению неленостно шествовал еси./ О, теплейший молитвенниче от мрака греховнаго избавляющий! / О, скорый помощниче во утешение скорбящим явленный!/ Моли о нас, святителю отче Лазаре,/ да последуем путем спасения/ и узрим в народе нашем сияние веры Православныя.

Кондак, глас 3

Мучения безбожных мужественно претерпевше, / гонение от лжебратии терпеливно понесл еси,/ ко Пресвятой Владычице Богородице тепле моляся,/ да покровом Своим Церковь Христову защитит / и паству твою на камени веры Христовой утвердит, / еяже ради душу свою положил еси, / отче наш Лазаре.